Kọ Who Wo Ovuhumuo kẹ Odiri Jihova?
1 Otẹrọnọ Jihova ọ gbẹ hai wo odiri evaọ ikpe 10, 20, je viere he, nọ o kuvẹ ọ isẹri-ise ekẹkẹe, kọ whọ hae sae riẹ uzẹme na? Ẹvẹ ma vọ avọ uyere te nnọ ọ kuvẹ kẹ ahwo buobu efa re “a zite ekurẹriẹ.” Ghele na, ẹdẹ ẹdhọ-oguo ologbo Jihova na “ọ rẹ te tha wọhọ oji.” (2 Pita 3:9, 10) Fikiere, a re rri odiri Ọghẹnẹ thọthọ wọhọ ulehie evaọ ẹrọze urere uyerakpọ ọnana ha.—Hab. 2:3.
2 Riohrọ Ahwo: Odiri okrẹkri Jihova ọ rro vi otoriẹ mai. Ẹjiroro riẹ ọ rẹ thọrọ omai ẹro vievie he. (Jona 4:1-4, 11) Jihova ọ be ruẹ uyero ọkora ahwo-akpọ yọ o wo ohrọoriọ kẹ ae. Jesu o ru epọvo na re. Avọ ohrọ kẹ ogbotu nọ ọ ta usiuwoma kẹ, ọ gwọlọ nọ a re ru iruo usiuwoma ota na kẹre re amọfa buobu a sai wo uvẹ nọ a re ro wo uzuazọ ebẹdẹ bẹdẹ.—Mat. 9:35-38.
3 Okenọ ukpokpoma gbe okpẹtu e tẹ roma via, kọ ma re wo ororokẹ rọkẹ ahwo nọ a riẹ uzẹme na ha? Ahwo inẹnẹ a wọhọ “igodẹ nọ i wo othuru hu” nọ a be daoma epanọ a re ro thihakọ je wo otoriẹ ozighi nọ ọ rrọ akpọ na. (Mak 6:34) Ẹkwoma ewhowho emamọ usi na avọ ọwhọ, ma rẹ sasa enọ i wo eva-ezi oma je dhesẹ ovuhumuo mai rọkẹ odiri Jihova.—Iruẹru 13:48.
4 Iruo Mai E Rrọ Kpata Kpata: Ukpe n’ukpo ahwo 323,439 e họ-ame yọ bu vi ahwo 14,000,000 a kpohọ Ekareghẹhọ na. Ẹvẹ irẹro ẹvi na e rro te inọ amọfa buobu a te dhẹ vabọ no ọraha eyero omuomu ọnana! Oghẹrẹ nọ “otu buobu” na ọ te rro te, ma riẹ hẹ. (Evia. 7:9) Epanọ iruo usiuwoma ota mai na u ti kri te, ma riẹ hẹ. Rekọ Jihova ọ riẹ. A rẹ te vuẹ emamọ usi na te ẹgwọlọ riẹ, “kẹsena urere u te zi te.”—Mat. 24:14.
5 Oke nọ u kiọkọ o rrọ kpẹkpẹe, yọ ẹdẹ Ọghẹnẹ ọ kẹlino. (1 Kọr. 7:29a; Hib. 10:37) Ababọ avro, “usiwo ubikẹle omai enẹna vi [oke] nọ ma to rọwo.” (Rom 13:11) Jọ ẹjiroro odiri Ọghẹnẹ ọ thọrọ omai ẹro ho. Ikpoye, joma ta usiuwoma na avọ ovẹrẹ re amọfa nọ a wo isiuru kẹ ẹrẹreokie a sai wo ohrọ ulogbo Jihova.