“Họre Uvi Ohọre Orọwọ Na”
1 Pọl ukọ na ọ hrẹ Timoti nọ ọ “họre uvi ohọre orọwọ na.” (1 Tim. 6:12) Pọl omariẹ ọ rria lele eme eyena. Evaọ obọ ekuhọ uzuazọ riẹ, ọ ta avọ imuẹro nọ ọye omariẹ ọ họre uvi ohọre no. (2 Tim. 4:6-8) Evaọ edhere kpobi, o ru odibọgba na avọ aruọwha, udu, gbe akothiho. Ẹkwoma aruorokele oriruo riẹ, ma rẹ sai wo imuẹro ọvona inọ ma bi ru utho ẹgba mai evaọ ohọre mai kẹ ẹrọwọ Oleleikristi na.
2 Ru Omadawọ nọ O Gwọlọ: Pọl o ru iruo gaga evaọ odibọgba na. (1 Kọr. 15:10) Ere ma bi ru re nọ ma be gwọlọ re ma duku enọ i te evaọ ẹkwotọ mai na. (Mat. 10:11) Re ma nyate ejọ rai oma, o rẹ sae gwọlọ nọ ma rẹ kake kparoma evaọ irioke re ma se isẹi kẹ ahwo nọ ma nyaku evaọ iyẹrẹ na. Hayo o rẹ gwọlọ re ma ru iruo evaọ abọ-owọwọ re ma sae nyaku ahwo okenọ a te zihe ziọ iwou rai no.
3 O rẹ rehọ omonyẹ gbe emamọ omaa re ma nya evaọ ẹruoke okenọ ma te bi kokohọ kugbe utu obe uwuhrẹ mai kẹ usiuwoma ota. Wọhọ oriruo, ahwo uviuwou Ebẹtẹle na jọ a rẹ dhẹ edhere na iminiti 60 t’ẹnya te eziheze re a sai w’obọ evaọ odibọgba na kugbe ukoko nọ a dhe rai fihọ eva urere-oka. Epavo na re, ma rẹ sae rọ ẹro adhẹẹ rri iwhowho uvie gbe iviuwou jọ evaọ ukoko mai na nọ e rẹ nya ugbothabọ rekọ a re te etẹe eva ẹruoke. Iriruo ẹdadamu gbe omakokohọ itieye na i fo aruorokele.
4 U re no omai eva ze re ma nya lele isiuru nọ ma duku kpobi. Makọ okenọ ma te bi fi ebe họ ada eva iyẹrẹ hayo evaọ edhere ọnyakuo, u fo re ma daoma rehọ adrẹse hayo inọmba ifonu ohwo na. Kẹsena ma ve weze bru ei re ma bọ isiuru na jẹ daoma mu uwuhrẹ Ebaibol họ.
5 Ru Iruo na Ẹsikpobi: Pọl ọ ta usiuwoma na kẹse kẹse je ru ei totọ ziezi. (Rom 15:19) Kọ ẹvẹ o rrọ kẹ owhẹ? Kọ who bi w’obọ evaọ odibọgba na ẹsikpobi? Kọ who w’obọ evaọ usiuwoma ota no amara nana? O rọ isiuru iwuhrẹ ọ Uwuhrẹ Obe Ukoko na re a ruẹ nọ ohwo kpobi evaọ utu rai o w’obọ evaọ odibọgba na evaọ August. A ti fiobọhọ k’owhẹ ru ere.
6 Ẹkwoma aruorokele oriruo Pọl evaọ uketha emamọ usi na vọvọ, ma te gbẹ “họre uvi ohọre orọwọ na” haro.