Uzou Avọ 6

Ọmọ Eyaa Na

VIUKPENỌ a zihe kpohọ Nazarẹt, Josẹf avọ Meri a tẹ daji obọ Bẹtlẹhẹm. Yọ nọ Jesu ọ kpako te edẹ eree no, a tẹ yawo iẹe, wọhọ epanọ Uzi Ọghẹnẹ kẹ Mosis o ta. O tẹ jẹ wọhọ nọ o rọ uruemu na re a kẹ ọmọzae ọfofa odẹ riẹ evaọ ẹdẹ avọ eree na. Fikiere a te se odẹ ọmọ rai Jesu, wọhọ epanọ Gebriẹl ẹnjẹle na ọ kake vuẹ ai na.

O vrẹ amara ọvo no, yọ Jesu ọ kpako te edẹ 40 no. Kọ bovẹ ọsẹ gbe oni riẹ a rehọ e riẹ kpohọ enẹna? Kpohọ etẹmpol na evaọ Jerusalẹm, onọ o rọ emaele kakao no oria nọ a wohọ. Wọhọ epanọ Uzi Ọghẹnẹ kẹ Mosis o rọ, edẹ 40 e tẹ vrẹ no nọ a te yẹ ọmọzae, oni riẹ o re dhidhe orufuọ eva etẹmpol na.

Ere Meri o ru. Evra esese ivẹ o ro dhidhe riẹ. Onana u te dhesẹ eyero ugho Josẹf avọ Meri. Uzi Mosis u dhesẹ nọ a rẹ rehọ omogodẹ, ọnọ ọ ghare vi evrae gaga, ro dheidhe. Rekọ otẹrọnọ obọ oni na u te onana ha, ọ vẹ rehọ irueruẹ ivẹ hayo ilekuku ivẹ ro dheidhe.

Evaọ etẹmpol na ọkpọkuọzae jọ ọ tẹ wọ Jesu. Odẹ riẹ Simiọn. Ọghẹnẹ o dhesẹ kẹe no nọ o ti whu hu bẹsenọ ọ te ruẹ Kristi nọ Jihova ọ yaa na no, hayo Mesaya na. Nọ Simiọn ọ ziọ etẹmpol na evaọ ẹdẹ ọnana, ẹzi ọfuafo ọ tẹ kpọe bru ọmọ nọ Josẹf avọ Meri a wọ na.

Nọ Simiọn ọ wọ Jesu o te yere Ọghẹnẹ, anọ: “Olori, rure odibo ra ọ jọ enẹna nyawa tou, epanọ whọ tae; keme ibiaro mẹ e ruẹ esiwo ra [no], onọ whọ ruẹrẹ [họ] evaọ aro ahwo kpobi, elo nọ ọ rẹ te via kẹ ahwo Egedhọ jegbe oruaro rọ kẹ Izrẹl ahwo ra.”

U gbe Josẹf avọ Meri unu nọ a yo onana. Kẹsena Simiọn ọ tẹ ghale ai ọ tẹ ta kẹ Meri nọ a rehọ ọmọ riẹ “mu kẹ ekie gbe ẹkparọ ahwo Izrẹl buobu” jegbe nọ uweri, wọhọ ọgbọdọ ọdada, o ti duwu ẹwẹ riẹ.

Ohwo ọfa nọ ọ jọ etẹe họ Anna, ọruaro-aye nọ ọ kpako te ikpe 84 no. Evaọ uzẹme, o re no etẹmpol na ha. Evaọ auwa ọyena o te bi kẹle o te bi yere Ọghẹnẹ jẹ be ta kpahe Jesu rọ kẹ ahwo nọ e rẹ gaviezọ kpobi.

Ẹvẹ eware enana kpobi e were Josẹf avọ Meri eva te evaọ etẹmpol na! Uzẹme, enana kpobi e kẹ rai imuẹro nọ ọmọ na yọ Ọnọ Ọghẹnẹ ọ Y’eyaa riẹ na. Luk 2:21-38; Iruo-Izerẹ 12:1-8.

▪ Okevẹ o wọhọ nọ a rẹ kẹ ọmọzae ọfofa Izrẹl odẹ?

▪ Eme a gwọlọ mi oni-ọmọ Izrẹl nọ ọmọzae riẹ o te te edẹ 40 no, kọ ẹvẹ orugba ẹgwọlọ ọnana u dhesẹ kpahe eyero ugho Meri?

▪ Amono a vuhu Jesu evaọ etenẹ, kọ ẹvẹ a ro dhesẹ onana?