Jọ Ohwo Abọ-Ẹzi
1 Ileleikristi uzẹme a vuhumu nọ omodawọ ovuovo o riẹ nọ u wuzou vi ẹbọ gbe ẹyọrọ edikihẹ abọ-ẹzi hi. Ababọ edikihẹ abọ-ẹzi ma sae ta nọ ma be gọ Ọghẹnẹ hẹ. (1 Kọr. 2:14-16) Fikiere o gwọlọ re ma ruiruo gaga re ma bọ edikihẹ abọ-ẹzi. Ẹvẹ ma sae rọ jọ ohwo abọ-ẹzi, kọ eme họ osaohwa riẹ?
2 Uwuhrẹ gbe Eroro: Uwuhrẹ o gwọlọ vi ese gheghe ọrọ Ebaibol na gbe ebe nọ a kporo no Ebaibol ze ọvo. O gwọlọ ẹro nọ ma rẹ tọvi je muẹrohọ uwuhrẹ na ziezi. Dede nọ o rrọ uruemu ahwo jọ re a wuhrẹ, o rrọ ere kẹ amọfa ha. O gwọlọ nọ ahwo otiọye na a rẹ bọ isiuru kẹ uwuhrẹ.—Ol. 34:8; 1 Pita 2:2.
3 Eroro o kẹre te oke nọ a rẹ rehọ ro roro kpahe ẹme jọ gaga. Ma rẹ sai roro kpahe ẹtanigbo na, ekwakwa Jihova nọ i dhesẹ oma via evaọ emama, abọ sa-sa ọrọ eruẹaruẹ Ebaibol na, gbe epanọ ma sai ro fi ehri-izi Ebaibol h’iruo k’omobọ mai. Oma nọ ma rẹ dawo re ma dẹ oke nọ o kare edo gbe ebrukpẹre eware nọ e rẹ whaha ẹromuhotọ evaọ etoke eroro i re ru iroro tọvi uwuhrẹ na.—Emu. 24:63; Luk 4:42.
4 Ma rẹ yọroma re ma siọ ẹnyaharo abọ-ẹzi mai ba erivo. Aye jọ nọ o kpohọ iwuhrẹ je w’obọ evaọ iruo odibọgba na no oke emaha ze ọ ruẹ nọ o gwọlọ vi ekpohọ ewuhrẹ gbe usiuwoma Ileleikristi na ọvo, keme uwhremu na o kie ruọ ọfariẹ-ogbe. Nọ o ziheze no, ọ ta nọ: “Me roro vẹre nọ mẹ yọ ohwo abọ-ẹzi, rekọ me vuhumu nọ mẹ jẹ faki ru ọvo. Nọ me kie ukie abọ-ẹzi no, me te mu uwuhrẹ ogaga omobọ ohwo họ je fi ei h’iruo k’oma mẹ. Mẹ lẹ Jihova kẹ obufihọ. Fikiere, me te muhọ ẹrro evaọ abọ-ẹzi, mẹ tẹ bọ usu omobọ ohwo nọ me wo anwẹdẹ hẹ kugbei.”
5 Orọnọ Isiuru Uwo Ho: Jihova ọ gwọlọ nọ oware ogaga o via k’omai no re ma te ti wo areghẹ hẹ. Avọ areghẹ, Ẹme riẹ ọ hrẹ omai nọ: “Wha jọ eva Ẹzi nya, wha gbẹ sae ti ru urusio uwo gba ha.” (Gal. 5:16) Ma te thihakọ re ma jọ ahwo abọ-ẹzi, ma ti wo iroro-oziẹbro ofuafo evaọ aro Ọghẹnẹ enẹna gbe uzuazọ ebẹdẹ bẹdẹ evaọ obaro.—Ol. 1:1-3.