Uwuhrẹ 7

Esikẹle Ọghẹnẹ Evaọ Olẹ

Fikieme u je wuzou re a lẹ kẹse kẹse? (1)

Ono ma rẹ lẹ se, kọ eva oghẹrẹ vẹ? (2, 3)

Eme họ emamọ eware nọ a rẹ lẹ kẹ? (4)

Oke o vẹ whọ rẹ rọ lẹ? (5, 6)

Kọ elẹ kpobi Ọghẹnẹ ọ rẹ gaviezọ kẹ? (7)

1. Olẹ yọ omurokpotọ nọ a rẹ rọ t’ẹme kugbe Ọghẹnẹ. U fo re whọ lẹ se Ọghẹnẹ kẹse kẹse. Erei whọ sai ro si kẹliẹe kpekpekpe wọhọ ogbẹnyusu ọghaghae. Jihova ọ re ruaro jẹ ga thesiwa, ghele ọ rẹ gaviezọ kẹ elẹ mai! Kọ whọ be lẹ se Ọghẹnẹ kẹse kẹse?—Olezi 65:2; 1 Ahwo Tẹsalonika 5:17.

2. Olẹ yọ abọ egagọ mai. Fikiere, Jihova Ọghẹnẹ ọvo ma rẹ lẹ se. Okenọ Jesu ọ jọ otọakpọ, kẹse kẹse ọ jẹ lẹ se Ọsẹ riẹ, orọnikọ se omọfa ha. Ma re ru epavo na. (Matiu 4:10; 6:9) Ghele na, elẹ mai kpobi a rẹ lẹ ae evaọ odẹ Jesu. Onana u re dhesẹ nọ ma wo adhẹẹ kẹ ọkwa Jesu gbe nọ ma fi ẹrọwọ họ idhe ẹtanigbo riẹ.—Jọn 14:6; 1 Jọn 2:1, 2.

3. Okenọ ma tẹ be lẹ ma rẹ t’ẹme n’udu mai ze kẹ Ọghẹnẹ. U fo re ma lẹ elẹ mai no uzou ze hayo se ai no obe olẹ jọ ze he. (Matiu 6:7, 8) Ma sae jọ oghẹrẹ kpobi, oria kpobi, gbe evaọ oke kpobi lẹ avọ omaọghọ. Ọghẹnẹ ọ rẹ sai yo elẹ nọ ma lẹ h’eva evaọ udu mai. (1 Samuẹle 1:12, 13) O rọ ziezi re a gwọlọ oria nọ okare edo nọ u sioma no ahwo re ma jọ lẹ elẹ obọ mai.—Mak 1:35.

4. Eme whọ rẹ sae lẹ kpahe? Oware kpobi nọ u re kpomahọ usu ra kugbei. (Ahwo Filipai 4:6, 7) Olẹ oriruo na u dhesẹ nọ ma rẹ lẹ kpahe odẹ Jihova gbe ẹjiroro riẹ. Ma sae jẹ yare kẹ eware ugboma mai re ọ rehọ ae k’omai, kẹ erọvrẹ izieraha mai, jẹ kẹ obufihọ nọ ma re ro mudhe kẹ ẹdawọ. (Matiu 6:9-13) Elẹ mai e rẹ jọ erọ oriobọ họ. Eware nọ e rọwo kugbe oreva Ọghẹnẹ ọvo ma rẹ lẹ kẹ.—1 Jọn 5:14.

5. Whọ rẹ sae lẹ oke kpobi nọ udu ra o tẹ w’owhẹ re who yere hayo jiri Ọghẹnẹ. (1 Iruẹru-Ivie 29:10-13) Whọ rẹ lẹ okenọ who te wo ebẹbẹ gbe nọ ẹrọwọ ra ọ tẹ rọ otọ ẹdawọ. (Olezi 55:22; 120:1) U fo re whọ lẹ taure whọ tẹ re emu ra. (Matiu 14:19) Jihova o zizie omai re ma lẹ “koke koke.”—Ahwo Ẹfẹsọs 6:18.

6. O mae fo re ma lẹ otẹrọnọ ma raha uzi ulogbo jọ. Evaọ oke oyena ma rẹ yare kẹ ohrọriọ gbe erọvrẹ Jihova. Ma tẹ ta izieraha mai kẹe je ru utho ẹgba mai kpobi re ma siọ eware eyena ba ẹwariẹ, Ọghẹnẹ ọ “ruẹrẹ oma kpahe kẹ erọvrẹ.”—Olezi 86:5, NW; Itẹ 28:13.

7. Elẹ ahwo nọ i kiẹrẹe ọvo Jihova ọ rẹ gaviezọ kẹ. Re Ọghẹnẹ o te yo elẹ ra, whọ rẹ dawo ẹgba ra kpobi hrọ re whọ rria lele izi riẹ. (Itẹ 15:29; 28:9) Okenọ whọ tẹ be lẹ whọ rẹ rehọ omakpotọ hrọ. (Luk 18:9-14) U fo re who ru lele oware nọ whọ be lẹ kẹ. Whọ vẹ rehọ ere dhesẹ nọ who wo ẹrọwọ gbe nọ whọ ghinẹ riẹ oware nọ whọ be lẹ kẹ. Erei ọvo Jihova ọ sae rọ k’uyo kẹ elẹ ra.—Ahwo Hibru 11:6.