Ẹvẹ Ma Sai ro Fi Obọ họ kẹ Erivẹ-Orọo nọ E Rrọ Ukoko Ho?
1 Ahwo nọ idibo Jihova buobu a rọo a rẹ whẹtiẹ inievo na h’oma, je wo isiuru kpahe ukoko na rekọ a bi si uke kpemu no ẹjọ idibo Ọghẹnẹ. Ọzae uwou-orọo jọ ọ ta nọ: “Iroro ọ ẹnya n’uwou ruọ uwou o jọ ọzadhe ologbo k’omẹ.” Efa a sai wo iruemu jọ nọ e wọso Ikereakere na nọ o gwọlọ nọ a re si obọ no, hayo a sai roro nnọ a rẹ sae nya te omaa iruẹru ukoko ẹsikpobi nọ ọrivẹ-orọo rai o bi lele na ha. Ẹvẹ ma sai ro fi obọ họ kẹ ae?
2 Dhesẹ Isiuru Omobọ Ohwo: Isiuru nọ who re wo kpahe amọfa je mu ẹro họ eware nọ e be kẹ ae uduama o sai rovie edhere kẹ ae nọ a rẹ rọ j’owọ kẹ uzẹme Ebaibol na. (Fil. 2:4) Ẹsibuobu, enọ e jẹ egagọ ọrivẹ-orọo rai rehọ vẹre he a rẹ fodẹ isiuru uyoyou nọ Isẹri efa a dhesẹ. Ọzae uwou-orọo nọ ma jọ obọ ehru fodẹ na ọ ta nọ: “José, ọkpako ukoko na jọ, o wo isiuru kpahe omẹ gaga. Me roro nnọ uduotahawọ riẹ họ oware nọ u ru nọ me je se obe uwuhrẹ gboja ziezi.” Ọzae uwou-orọo ọfa ọ ta nnọ inievo nọ i weze bru ei ze a jẹ hae daoma t’ẹme kpahe eware nọ o wo isiuru kpahe. Ọ ta nọ: “Me te mu ubiẹro ofa họ ero rri egagọ [aye mẹ]. Egbẹnyusu riẹ yọ ahwo nọ a wo eriariẹ ziezi enọ e rẹ sae t’ẹme kpahe eware sa-sa.”—1 Kọr. 9:20-23.
3 Kẹ Uvi Obufihọ: Obufihọ ẹwo nọ a re dhesẹ kẹ erivẹ-orọo nọ e rrọ ukoko ho o sai je duobọte ai udu. (Itẹ 3:27; Gal. 6:10) Okenọ omoto ọzae uwou-orọo jọ nọ ọ rrọ ukoko ho ọ raha, Osẹri ọmoha jọ o te fi obọ họ kẹe. Ọzae na ọ ta nọ: “Oware nọ o ru na u duobọte omẹ udu gaga.” Oniọvo-ọmọzae ọfa ọ rehọ okpẹdoke soso ro fi obọ họ kẹ ọzae oniọvo-ọmọtẹ jọ nọ ọ rrọ ukoko ho di ogba wariẹ ighẹ riẹ họ. Okenọ a bi ruiruo je bi gbiku kugbe na, a te zihe ruọ egbẹnyusu. Eka ivẹ e ruọ emu no, ọzae na ọ tẹ nya bru oniọvo-ọmọzae na, ọ tẹ ta kẹe nọ: “U te epanọ me re ro ru inwene jọ no evaọ uzuazọ mẹ. Kọ whọ sai wuhrẹ Ebaibol kugbe omẹ?” Ọ nyaharo kpata kpata yọ enẹna ọ rrọ Osẹri nọ ọ họ-ame no.
4 Nọ ma be gwọlọ enọ i te nọ e rrọ ẹkwotọ mai na, jọ ma gbe fi obọ họ kẹ ahwo nọ a rọo ibe egegagọ mai.—1 Tim. 2:1-4.