Onọ O Mai Woma nọ Ma rẹ Kẹ Jihova
1 Uzi Jihova kẹ emọ Izrẹl o ta inọ erao nọ a re ro dheidhe kẹe e rẹ jọ enọ e “kare epe.” Arao nọ ọ rrọ oma kọkọ họ a rẹ rehọ iẹe he. (Izerẹ 22:18-20; Mal. 1:6-9) Ofa riẹ re, nọ a te dhe idhe, iwhri na kpobi—abọ nọ ọ mai woma evaọ arao na—e rrọ rọkẹ Jihova. (Izerẹ 3:14-16) Wọhọ Ọsẹ Izrẹl gbe Olori Ologbo rai, Jihova o fo ọnọ a rẹ rehọ onọ o mai woma kẹ.
2 Wọhọ epanọ o jọ evaọ oke anwae, oghẹrẹ idhe mai nẹnẹ e rrọ Ọghẹnẹ oja gaga. Egagọ mai i re dhesẹ uvi adhẹwẹ rọkẹ Jihova. Uzẹme, iyero mai omomọvo i wo ohẹriẹ. Ghele na, ma wo uvi ẹjiroro nọ ma rẹ rọ kiẹ oma mai riwi sọ ma be kẹe onọ o mai woma kpobi.—Ẹf. 5:10.
3 Egagọ Ẹwẹ-Kpobi: Re odibọgba mai ọ ruẹse wha orro se Jihova je duobọte udu enọ e be kezọ kẹ omai, o rẹ jọ orọ okafe gheghe he. Eme nọ ma rẹ ta kpahe Ọghẹnẹ mai gbe ẹjiroro ogbunu riẹ i re no udu nọ o vọ avọ ovuhumuo ze. (Ol. 145:7) Onana u dhesẹ epanọ ẹnya lele emamọ omaa isase Ebaibol gbe uwuhrẹ omobọ-ohwo e roja te.—Itẹ 15:28.
4 Onọ o mai woma nọ ma rẹ kẹ Jihova o tẹ jẹ kẹre te aro nọ ma re ro kele uyoyou riẹ kẹ ahwo. (Ẹf. 5:1, 2) Uyoyou nọ ma wo kẹ ahwo o rẹ wọ omai rọ ovuẹ uzẹme nọ u re siwi uzuazọ na bru ahwo buobu te epanọ o rẹ sae lọhọ te kpobi. (Mak 6:34) O rẹ wọ omai dhesẹ isiuru omobọ-ohwo kẹ ahwo nọ ma be ta ẹme kẹ. O rẹ lẹliẹ omai hai roro kpahe ae nọ iweze ọsosuọ na e tẹ vrẹ no, jẹ lẹliẹ omai zihe vẹrẹ vẹrẹ. O rẹ wọ omai dao utho ẹgba mai kpobi re ma fi obọ họ kẹ ai nyaharo evaọ abọ-ẹzi.—Iruẹru 20:24; 26:28, 29.
5 ‘Idhe Ujiro’: Edhere ọfa nọ ma rẹ rọ kẹ Jihova onọ o mai woma họ ẹkwoma osegboja mai evaọ odibọgba na. Nọ ma tẹ ruẹrẹ omaa mai họ ziezi jẹ tẹro vi odibọgba na, ma rẹ sai wo iyẹrẹ iwoma tobọ rono oke usiuwoma ota mai ze. (1 Tim. 4:10) Emamọ omaruẹrẹhọ o rẹ lẹliẹ omai ta ẹme vevẹ avọ imuẹro, nọ o rẹ lẹliẹ ahwo kezọ kẹ omai ziezi. (Itẹ 16:21) Nọ ma be wha emamọ usi na se amọfa na, a rẹ sai ghine se emamọ eme nọ i bi no omai udu ze ‘idhe ujiro.’—Hib. 13:15.