Efihada ọ Ibroshọ na Edhere nọ O Re Su Kpohọ Uzuazọ Ebẹdẹ Bẹdẹ—Kọ Who Duku Ei No?
1 Ahwo buobu a be gwọlọ uvi edhere nọ a rẹ rọ gọ Ọghẹnẹ. A gwọlọ uzuazọ ebẹdẹ bẹdẹ. Rekọ diẹse a je duku ei? Ọwhọ ọ be wọ omai re ma dhesẹ edhere ọkeke ọyena kẹ ai. Iruẹru eda o be kpọ izuazọ ima ahwo buobu nẹnẹ. Ma gwọlọ fi obọ họ kẹ ai re a no otọ ekpakpọ yena. Ibroshọ ọkpokpọ na Edhere nọ O Re Su Kpohọ Uzuazọ Ebẹdẹ Bẹdẹ—Kọ Who Duku Ei No? yọ obọdẹ okwakwa nọ ma re ro fi obọ họ kẹ ahwo. Idhere jọ nọ ma sai ro fi ei họ ada ena.
2 Kọ egagọ na kpobi yọ idhere sa-sa nọ i bi su ahwo bru Ọghẹnẹ? (Rono Ẹme-Emuhọ na ze.) “Iviena rri uwoho nana nọ o rrọ ibroshọ nana. (Ẹwẹ-obe avọ 2 gbe 3) Ahwo buobu a rọwo nnọ egagọ yọ idhere sa-sa nọ i bi su ahwo bru Ọghẹnẹ. Ẹvẹ who roro? (Kuvẹ kẹ uyo.) Rri oware nọ edhe-ẹme avọ ivẹ eva ẹwẹ-obe avọ ivẹ na o ta. (Sei.) Wọhọ uviuwou nọ a jọ etenẹ dhesẹ na, ahwo a gbẹ riẹ edhere nọ a rẹ nya ha. Ibroshọ nana o ti fi obọ họ k’owhẹ duku edhere nọ o re su kpohọ uzuazọ ebẹdẹ bẹdẹ.”
3 Kọ egagọ kpobi i bi wuhrẹ uzẹme na? (Rono Uwuhrẹ 1 na ze.) “Ẹvẹ who roro? Kọ egagọ kpobi i bi wuhrẹ uzẹme na? (Nọ ọ tẹ kuyo no, ta h’aro nnọ.) Ichọche buobu i bi mu via, yọ ahwo jọ a sai roro nọ ọnọ whọ nya kpobi yọ Ọghẹnẹ whọ be gọ na. Dede na, a jọ 1 Ahwo Tẹsalonika 5:21 vẹvẹ omai unu inọ ma yọrọ oma. (Sei.) Fikieme egagọ kpobi e gbẹ rọ rrọ erọ Ọghẹnẹ hẹ? Muẹrohọ ihie-ẹme ivẹ ọsosuọ eva ẹwẹ-obe avọ 5, edhe-ẹme avọ 3 ọrọ Uwuhrẹ 1 evaọ ibroshọ nana. (Sei.) Nọ egagọ kpobi e rẹ sae jọ uzẹme he na, ẹvẹ ma sae duku ọrọ uzẹme na? Ibroshọ nana o ti dhesẹ oghẹrẹ nọ a re ro ru ei k’owhẹ.”
4 Kọ ma rẹ gọ esẹ-anwae mai? (Rono Uwuhrẹ avọ 4 ze.) “Ahwo buobu a rẹ gọ esemọ. Iruemu iwhori buobu e roma hwa egagọ esemọ. Fikieme ahwo a jẹ be gọ hayo kpẹwẹ esemọ? Iviena muẹrohọ oware nọ edhe-ẹme 1 gbe ọrọ avọ 2 evaọ ẹwẹ-obe avọ 12 ibroshọ nana e ta. (Sei.) Kọ esemọ nọ i whu no e riẹ oware nọ ma bi ru? (Kẹ ohwo nọ whọ be t’ẹme kẹ na uvẹ re ọ kuyo.) Joma se oware nọ Ebaibol na e ta eva Ọtausiwoma Na 9:5, 10. Nọ a riẹ oware ovo ho na, u fo re ma gọ ae he. Whọ sai gbe se kpahe onana evaọ Uwuhrẹ avọ 4 ọrọ ibroshọ nana.”
5 Kọ ma rẹ dhozọ eda? (Rono Uwuhrẹ avọ 5 ze.) “Ma bi weze bru ahwo re ma jiroro kpahe onọ jọ nọ ahwo buobu a roro kpahe no: Kọ ma rẹ dhozọ eda? Ẹvẹ who roro? (Kẹ ohwo nọ whọ be t’ẹme kẹ na uvẹ re ọ kuyo.) Ahwo buobu a wo orọwọ na inọ oware uyoma o tẹ via, yọ eda e wha riẹ ze. Oye o whariẹ ze nọ ahwo jọ a jẹ rọ ẹro so ekwakwa-ẹbo na. Kọ u fo re ma rẹroso ekwakwa-ẹbo kẹ uketha? Muẹrohọ oware nọ ibroshọ nana ọ ta evaọ ẹwẹ-obe avọ 18, edhe-ẹme avọ 16. (Sei.) Jihova Ọghẹnẹ, Erumeru na, o wo ogaga vi Setan thethabọ. Ọ rẹ sae thọ omai no obọ Setan. (Se Jemis 4:7.) Rọ kẹ evuẹ efa, se Uwuhrẹ avọ 5 ọrọ ibroshọ nana.”
6 Kọ Ọghẹnẹ ọ jẹ egagọ kpobi rehọ? (Rono Uwuhrẹ avọ 6 ze.) “Kọ Ọghẹnẹ ọ jẹ egagọ kpobi rehọ? Fikinọ egagọ buobu nọ e ta nọ ae yọ Ileleikristi nọ e rọwo Ọghẹnẹ, Jesu, gbe Ebaibol na, ahwo buobu a roro nnọ oyena o lẹliẹ Ọghẹnẹ jẹ ae rehọ. Ẹvẹ who roro? (Hẹrẹ uyo nọ ọ te kẹ.) Jesu ọ ta oware jọ kpahe onana eva Matiu 7:13, 14. (Sei.) Oghẹrẹ egagọ ivẹ ọvo e riẹ, ọrọ uzẹme gbe ọrọ ọrue. Ọrọ uzẹme na o bi su kpohọ uzuazọ ebẹdẹ bẹdẹ. Ọrọ ọrue na o bi su kpohọ ọraha kufiẹ. Kọ ẹvẹ ma sai ro vuhu ọrọ uzẹme na? Jesu ọ kuyo na eva Matiu 7:16-20. (Sei.) Otẹrọnọ egagọ ọ rrọ ọrọ uzẹme ọ rẹ mọ emamọ ibi, rekọ ọ tẹ rrọ onọ u no obọ Setan ze o rẹ mọ ibi iyoma. Ibroshọ nana o ta kpahe emamọ ibi na evaọ ẹwẹ-obe avọ 19, edhe-ẹme avọ 4. (Sei.) Kọ whọ rọwo? U te je dhesẹ ibi iyoma egagọ buobu. Ababọ avro, whọ te gwọlọ se Uwuhrẹ avọ 6 ọrọ ibroshọ nana.”
7 Kọ eware igbunu nọ a rẹ jọ egagọ ru i re dhesẹ iẹe fihọ ọrọ uzẹme? (Rono Uwuhrẹ avọ 7 ze.) “Mẹ nyaze re mẹ te kuyo onọ nana: Kọ eware igbunu nọ egagọ i re ru oye u re dhesẹ iẹe fihọ uzẹme? (Kẹ ohwo nọ whọ be t’ẹme kẹ na uvẹ re ọ kuyo.) Ere ahwo buobu a bi roro, ẹsejọhọ fikinọ Jesu o je ru eware igbunu. Rekọ Jesu ọ ta ẹme nana nọ ọ rrọ Matiu 7:21-23 na re. (Sei.) Muẹrohọ, ọ ta nnọ ahwo jọ a te ta nnọ a be ruẹaro, le izi iyoma, rehọ odẹ riẹ ru iruo ilogbo buobu. Ghele na, ọ rẹ te se ai. Edhe-ẹme avọ 10 eva ẹwẹ-obe avọ 24 ọrọ ibroshọ nana ọ ta nnọ. (Sei.) Ono ọ te ruọ Uvie na? Orọnikọ ohwo kpobi nọ ọ be ta nọ ‘Olori, Olori’ hi rekọ ọnọ o bi ru oreva Ọghẹnẹ. Kọ ẹvẹ ohwo ọ sai ro vuhu egagọ uzẹme na? Ibroshọ nana ọ jọ Uwuhrẹ avọ 7 kuyo na.”
8 Enana họ izoẹme gbe ikereakere jọ nọ ma sai ro fi ibroshọ nana họ ada. Otẹrọnọ ohwo na o dhesẹ isiuru, mu obe-uwuhrẹ Ebaibol họ evaọ uwuhrẹ nọ who ro fi ei họ ada na hayo evaọ Uwuhrẹ 1 na. Nọ wha te wuhrẹ ibroshọ na reno, ruabọhọ uwuhrẹ na evaọ ibroshọ Gwọlọ na. Rehọ okwakwa nana ru iruo ziezi rọ kpọ ahwo buobu kpohọ edhere nọ o re su kpohọ uzuazọ ebẹdẹ bẹdẹ!