Epanọ A rẹ rọ Rehọ Obe ọ Ebaibol Wuhrẹ na Mu Obe-Uwuhrẹ Ebaibol Họ

O rẹ were omai ibuobu re ma ru obe-uwuhrẹ Ebaibol, rekọ ẹbẹbẹ na họ epanọ ma rẹ rọ to iẹe họ. Obe okpokpọ na Eme Ebaibol na O Gine Wuhrẹ? o rẹ sai fiobọhọ k’omai. A ruẹrẹ eme-emuhọ nọ e rrọ ẹwẹ-obe avọ 3-7 na họ epanọ whọ sae rọ rehọ obe okpokpọ na mu ẹmeọta Ebaibol họ kugbe ohwo. Makọ ahwo nọ a re nwani wo ona tere he evaọ odibọgba na, o te jọ lọlọhọ kẹ ae re a rehọ iẹe mu ebe-iwuhrẹ Ebaibol họ.

◼ Whọ sae dawo edhere nana ẹkwoma eroruiruo ẹwẹ-obe avọ 3:

Nọ whọ tẹ fodẹ oware jọ nọ o via hayo ẹbẹbẹ jọ nọ ọ rrọ iroro ahwo evaọ ẹkwotọ rai no, whọ vẹ kpọ iroro ohwo nọ whọ be t’ẹme kẹ na kpohọ enọ nọ a kere mu gbalọ evaọ ẹwẹ-obe avọ 3 na, whọ vẹ ta kẹe re ọ kpahe ẹme. Who ve rovie kpohọ ẹwẹ-obe avọ 4-5.

◼ Hayo whọ sai muhọ ẹkwoma eme jọ nọ whọ rẹ ta kpahe ẹwẹ-obe avọ 4-5:

Whọ sae ta nọ: “Kọ otẹrọnọ inwene nọ a jọ etenẹ dhesẹ na i gine rugba, o gbẹ jọ oware evawere?” Hayo whọ sae nọ inọ: “Evaọ usu eyaa nana, ovẹ whọ mae gwọlọ rehọ ẹro ruẹ nọ u rugba?” Gaviezọ ziezi kẹ ẹme nọ ọ te kpahe.

Otẹrọnọ ohwo na o dhesẹ uvi isiuru kpahe ikereakere jọ, dhesẹ oware nọ Ebaibol na e ta kẹe ẹkwoma edhe-ẹme nọ e ta kpahe ẹme na evaọ obe na nọ who re se. (Rri ẹkpẹti nọ ọ rrọ ẹwẹ-obe nana.) Ru ei wọhọ epanọ who re ru obe-uwuhrẹ Ebaibol na. A rẹ sae rehọ iminiti isoi rite ikpe jọ unuẹthẹ ru onana eva iweze ọsosuọ na.

◼ Edhere ọfa họ whọ rẹ ta kẹ ohwo na re ọ ta iroro riẹ ẹkwoma eroruiruo ẹwẹ-obe avọ 6:

Kpọ iroro ohwo nọ whọ be t’ẹme kẹ na rri enọ nọ e rrọ obotọ ẹwẹ-obe na, whọ vẹ nọe inọ: “Kọ whọ sae tubẹ jọ usu enọ nana roro kpahe ojọ no ẹdẹjọ?” Otẹrọnọ o dhesẹ isiuru kpahe onọ jọ, who ve rovie kpohọ edhe-ẹme nọ o kuyo onọ na evaọ obe na. (Rri ẹkpẹti nọ ọ rrọ ẹwẹ-obe nana.) Nọ wha bi se ẹme na kugbe na, obe-uwuhrẹ Ebaibol who bi ru na.

◼ Whọ sae rehọ ẹwẹ-obe avọ 7 to obe-uwuhrẹ Ebaibol họ:

Se ihie-ẹme esa ọsosuọ nọ e rrọ ẹwẹ-obe na, nọ i dhesẹ edhere enọ-gbe-iyo nọ ma re ro wuhrẹ Ebaibol na. Who ve rovie kpohọ uzou avọ 3, je dhesẹ oghẹrẹ nọ ma re ro ru obe-uwuhrẹ Ebaibol ẹkwoma edhe-ẹme 1-3 nọ who re ro ruiruo. Ru ọruẹrẹfihotọ nọ who ti ro zihe re wha ta kpahe iyo enọ nọ a nọ fihọ edhe-ẹme avọ 3 na.

◼Epanọ Who re ro Ru Ọruẹrẹfihotọ nọ Who re ro Zihe:

Nọ who te bi ku uwuhrẹ oke ọsosuọ na họ, ru ọruẹrẹfihotọ nọ wha te rọ ruabọhọ ẹmeọta na oke ofa. Whọ sae ta nọ: “Evaọ umutho iminiti jọ ọvo, ma wuhrẹ oware nọ Ebaibol na e ta kpahe ẹme jọ nọ o wuzou gaga. Evaọ oke ofa, ma sae ta kpahe [nọ onọ jọ fihotọ nọ wha te ta kpahe]. Kọ mẹ sai zihe ze oke utionana evaọ oka notha?”

Nọ oke nọ Jihova o fihọ u bi si kẹle na, ọ be gbẹ ruẹrẹ omai kpahe kẹ iruo nọ a k’omai na. (Mat. 28:19, 20; 2 Tim. 3:17) Joma rehọ okwakwa aghae okpokpọ nana ro mu ebe-iwuhrẹ Ebaibol họ.

Epanọ A re ro Fi Obe Ebaibol Wuhrẹ na họ Ada

Uko-obeva nana u wo idhere sa-sa nọ a re ro fi obe ọ Ebaibol Wuhrẹ na họ ada. Re e sai wiruo ziezi, rehọ eme obọra tae, nwene eme ra re i kiehọ ahwo nọ a rrọ ẹkwotọ ra, jẹ riẹ igogo-eme nọ e rrọ obe na nọ a sae rọ rehọ Ebaibol na lele ohwo tẹme. A sae rehọ idhere-ẹmeọta efa nọ i kiehọ ẹkwotọ rai ro ruiruo.—Rri Odibọgba Uvie Mai ọrọ January 2005, ẹwẹ. 8.

Amagẹdọn

◼ “Nọ ahwo buobu a te yo ẹme na ‘Amagẹdọn,’ iroro rai i re kpohọ ọraha okpemuotọ. Kọ u re gbe owhẹ unu nọ a tẹ vuẹ owhẹ inọ Amagẹdọn yọ oware nọ a re rẹro riẹ avọ evawere? [Kuvẹ kẹ uyo. Who ve se Eviavia 16:14, 16.] Muẹrohọ ẹme nana nọ u dhesẹ oghẹrẹ nọ uzuazọ o te jọ nọ Amagẹdọn ọ tẹ vrẹ no.” Se edhe-ẹme avọ 21 eva ẹwẹ-obe avọ 82.

Ebaibol

◼ “Ahwo a rẹ ta nọ Ebaibol na yọ Ẹme Ọghẹnẹ. Kọ u tube gbe owhẹ unu no oware nọ a bi ro se obe nọ ahwo-akpọ a kere inọ yọ Ẹme Ọghẹnẹ? [Kuvẹ kẹ uyo. Who ve se 2 Pita 1:21 gbe edhe-ẹme avọ 5 eva ẹwẹ-obe avọ 19.] Obe nana u dhesẹ uyo nọ Ebaibol na e kẹ kpahe enọ nana.” Dhesẹ enọ nọ e rrọ ẹwẹ-obe avọ 6 na.

◼ “Nẹnẹ, ahwo a wo eria nọ evuẹ i je te ai obọ vi epaọ ọsosuọ. Rekọ oria vẹ who roro nọ ma rẹ sae jọ ruẹ uvi uthubro nọ o rẹ sai fiobọhọ k’omai yeri emamọ uzuazọ avọ evawere? [Kuvẹ kẹ uyo. Who ve se 2 Timoti 3:16, 17, gbe edhe-ẹme avọ 12 eva ẹwẹ-obe avọ 23.] Obe nana u dhesẹ epanọ ma sai ro yeri uzuazọ nọ o rẹ were Ọghẹnẹ jẹ kẹ omai erere.” Dhesẹ ẹkpẹti gbe uwoho nọ o rrọ ẹwẹ-obe avọ 122-123 na.

Uwhu/Ẹkparomatha

◼ “U re gbe ahwo buobu unu oware nọ o rẹ via kẹ ohwo nọ o whu no. Kọ who roro nọ o lọhọ k’omai re ma riẹ? [Kuvẹ kẹ uyo. Who ve se Ọtausiwoma Na 9:5 gbe edhe-ẹme avọ 5-6 eva ẹwẹ-obe avọ 58.] Obe nana u te je dhesẹ irere nọ eyaa Ebaibol na kpahe ẹkparomatha o te wha se ahwo nọ a whu no.” Dhesẹ uwoho nọ o rrọ ẹwẹ-obe avọ 75.

◼ “Nọ ohwo nọ ma you o te whu, o rrọ ẹkoma ohwo kpobi re ọ gwọlọ wariẹ rue riẹ. Ọ gbẹ rrọ ere? [Kuvẹ kẹ uyo.] Ahwo buobu a ruẹ omosasọ rono eyaa Ebaibol na kpahe ẹkparomatha ze no. [Se Jọn 5:28, 29 gbe edhe-ẹme avọ 16-17 eva ẹwẹ-obe avọ 71-72.] Uzou nana o tẹ jẹ kẹ uyo enọ enana.” Dhesẹ enọ emuhọ nọ e rrọ ẹwẹ-obe avọ 66 na.

Uzuazọ Ibẹdẹ Bẹdẹ

◼ “Ahwo buobu a gwọlọ omokpokpọ gbe uzuazọ uthethei. Kọ otẹrọnọ o lọhọ, o rẹ were owhẹ re whọ rria bẹdẹ bẹdẹ? [Kuvẹ kẹ uyo. Who ve se Eviavia 21:3, 4 gbe edhe-ẹme avọ 17 eva ẹwẹ-obe avọ 54.] Obe nana o ta kpahe epanọ ma sai ro wo uzuazọ ibẹdẹ bẹdẹ, gbe oghẹrẹ nọ uzuazọ o te jọ nọ eyaa yena i te rugba no.”

Uviuwou

◼ “O rrọ isiuru mai kpobi re ma yeri uzuazọ uviuwou evawere. Kọ whọ gbẹ rọwo ere? [Kuvẹ kẹ uyo.] Ebaibol na e ta kpahe oware jọ nọ ohwo kpobi eva uviuwou na ọ rẹ sai ru rọ zọhọ fihọ uzuazọ uviuwou evawere—oyehọ aro oro kele Ọghẹnẹ evaọ uyoyou udhesẹ.” Se Ahwo Ẹfẹsọs 5:1, 2 gbe edhe-ẹme avọ 4 eva ẹwẹ-obe avọ 135.

Iwou

◼ “Eva eria buobu, re a ruẹ iwou nọ e rrọ kpatiẹ nọ ugho ohwo u re te o rrọ bẹbẹ gaga. Kọ who roro nọ ẹdẹjọ ọ te jariẹ nọ ohwo kpobi o ti wo emamọ uwou nọ ọ rẹ rria? [Kuvẹ kẹ uyo. Who ve se Aizaya 65:21, 22 gbe edhe-ẹme avọ 20 eva ẹwẹ-obe avọ 34.] Obe nana u dhesẹ epanọ eyaa Ọghẹnẹ nana i ti ro rugba.”

Jihova Ọghẹnẹ

◼ “Ahwo buobu nọ a rọwo Ọghẹnẹ a rẹ gwọlọ si kẹle iẹe. Kọ whọ sae riẹ nọ Ebaibol i zizie omai inọ ma si kẹle Ọghẹnẹ? [Kuvẹ kẹ uyo. Who ve se Jemis 4:8a gbe edhe-ẹme avọ 20 eva ẹwẹ-obe avọ 16.] A kere obe nana re u fiobọhọ kẹ ahwo wuhrẹ kpahe Ọghẹnẹ ziezi ẹkwoma Ebaibol obọ rai.” Dhesẹ enọ emuhọ nọ e rrọ ẹwẹ-obe avọ 8 na.

◼ “Ahwo buobu a rẹ lẹ nọ odẹ Ọghẹnẹ o jọ fuafo (hayo ọrẹri). Kọ whọ riẹ odẹ na? [Kuvẹ kẹ uyo. Who ve se Olezi 83:18 gbe edhe-ẹme avọ 2-3 eva ẹwẹ-obe avọ 195.] Obe nana u dhesẹ oware nọ Ebaibol na i gine wuhrẹ kpahe Jihova Ọghẹnẹ gbe ẹjiroro riẹ kẹ ahwo-akpọ.”

Jesu Kristi

◼ “Nya akpọ na wariẹ, ahwo a yo kpahe Jesu Kristi no. Ahwo jọ a rẹ ta nọ Jesu yọ ọzae nọ ọ viodẹ wọhọ amọfa gheghe. Amọfa a rẹ gọe wọhọ Ọghẹnẹ Erumeru na. Kọ who roro nọ oware nọ ma rọwo kpahe Jesu Kristi u muẹme?” [Kuvẹ kẹ uyo. Who ve se Jọn 17:3 gbe edhe-ẹme avọ 3 eva ẹwẹ-obe avọ 37.] Si iroro kpohọ enọ emuhọ nọ e rrọ obotọ uzoẹme na.

Olẹ

◼ “Kọ whọ sai roro no kpahe epanọ Ọghẹnẹ o re ro yo elẹ? [Kuvẹ kẹ uyo. Who ve se 1 Jọn 5:14, 15 gbe edhe-ẹme avọ 16-18 eva ẹwẹ-obe avọ 170-172.] Uzou nana u te je dhesẹ oware nọ ma jẹ lẹ se Ọghẹnẹ gbe oware nọ ma re ru nọ o je yo elẹ mai.”

Egagọ

◼ “Enẹna ahwo buobu a bi rri egagọ akpọ na wọhọ nọ eye e be wha ebẹbẹ ahwo-akpọ ze viukpọ ifue kẹ ebẹbẹ na. Kọ who roro nọ egagọ i bi su ahwo evaọ emamọ edhere? [Kuvẹ kẹ uyo. Who ve se Matiu 7:13, 14 gbe edhe-ẹme avọ 5 eva ẹwẹ-obe avọ 146.] Uzou nana u dhesẹ eware ezeza nọ e rẹ sai fiobọhọ k’omai vuhu egagọ nọ Ọghẹnẹ ọ jẹrehọ.” Dhesẹ eware nọ a kere fihọ ẹwẹ-obe avọ 147 na.

Okpẹtu/Uye-Oruẹ

◼ “Nọ okpẹtu ọ tẹ roma via, enọ buobu e rẹ roma via sọ Ọghẹnẹ ọ be ginẹ daezọ ahwo je bi muẹrohọ uye-oruẹ rai. Kọ whọ sai roro kpahe oyena no ẹdẹjọ? [Kuvẹ kẹ uyo. Who ve se 1 Pita 5:7 gbe edhe-ẹme avọ 11 eva ẹwẹ-obe avọ 11.] Obe nana u dhesẹ epanọ Ọghẹnẹ o ti ro si uye-oruẹ ahwo-akpọ notọ riẹriẹriẹ.” Dhesẹ enọ emuhọ nọ e rrọ ẹwẹ-obe avọ 106.

Ẹmo/Udhedhẹ

◼ “Eva oria kpobi, ahwo a be gwọlọ udhedhẹ. Kọ who roro nọ ẹruore udhedhẹ eva akpọ na yọ ewezẹ gheghe? [Kuvẹ kẹ uyo. Who ve se Olezi 46:8, 9.] Obe nana o ta kpahe epanọ Ọghẹnẹ o ti ro ru ẹjiroro riẹ gba jẹ rọ udhedhẹ akpọ-soso ze.” Dhesẹ uwoho nọ o rrọ ẹwẹ-obe avọ 35, je se edhe-ẹme avọ 17-21 eva ẹwẹ-obe avọ 34.

[Box on page 5]

Idhere nọ Ma rẹ rọ Fodẹ Ọruẹrẹfihotọ Unevaze Na

“Otẹrọnọ whọ gwọlọ ru unevaze jọ nẹnẹ kẹ iruo akpọ-soso mai na, o te were omẹ eva gaga.”

“Dede nọ ma bi se unuigho fihọ ebe mai hi, o rẹ were omai nọ ahwo a te ru unevaze kẹ iruo akpọ-soso mai na.”

“Oghẹrẹ nọ ma be rọ wha iruo nana haro o sai gbe owhẹ unu. Ma be wha iruo akpọ-soso mai na haro ẹkwoma unevaze nọ ahwo a bi ru. O tẹ ruọ owhẹ re who ru unevaze jọ nẹnẹ kẹ iruo na, o te were omẹ gaga.”

Rehọ (1) Onọ, (2) Ikereakere, (3) Uzou nọ Ẹme na O no ze ro Ruiruo

Edhere ọlọlọhọ nọ a re ro fi Eme Ebaibol na O Gine Wuhrẹ? họ ada họ (1) nọ onọ nọ o rẹ lẹliẹ ohwo ta iroro riẹ via, (2) se ikere nọ i kiehọ ẹme nọ wha be ta, gbe (3) kpọ iroro ohwo rri uzoẹme nọ o jọ obe na ru ẹme na vẹ ẹkwoma enọ emuhọ nọ e rrọ otọ uzoẹme na nọ who re se. Otẹrọnọ ohwo na o dhesẹ isiuru, whọ rẹ sai dhesẹ oghẹrẹ nọ ma re ru obe-uwuhrẹ Ebaibol ẹkwoma idhe-ẹme ọsosuọ uzou na nọ who re ro ruiruo. A rẹ sae rọ edhere nana mu obe-uwuhrẹ Ebaibol họ eva iweze ọsosuọ hayo evaọ oke ozihebro.

◼ “Kọ who roro nọ o lọhọ re ahwo-akpọ gheghe a riẹ Ọnọma Erumeru na, wọhọ epanọ a dhesẹ fihọ etenẹ eva Ebaibol na?” Se Iruẹru 17:26, 27, re whọ kuvẹ kẹ uyo. Who ve rovie kpohọ uzou 1.

◼ “Avọ ebẹbẹ nọ ma be rẹriẹ ovao ku nẹnẹ na, kọ who roro nọ o lọhọ re ma wo omosasọ gbe ẹruore nọ a jọ etenẹ dhesẹ na?” Se Ahwo Rom 15:4, re whọ kuvẹ kẹ uyo. Who ve rovie kpohọ uzou avọ 2.

◼ “Otẹrọnọ who wo ẹgba nọ who re ro ru ei, kọ whọ sai ru inwene enana?” Se Eviavia 21:4, re whọ kuvẹ kẹ uyo. Who ve rovie kpohọ uzou avọ 3.

◼ “Kọ who roro nọ emọ mai e te sae reawere uyero nọ a jọ ole anwae nana tẹme te na ẹdẹjọ?” Se Olezi 37:10,11, re whọ kuvẹ kẹ uyo. Who ve rovie kpohọ uzou avọ 3.

◼ “Kọ who roro nọ ẹdẹjọ ọ te jariẹ nọ eme nana i ti rugba?” Se Aizaya 33:24, re whọ kuvẹ kẹ uyo. Who ve rovie kpohọ uzou avọ 3.

◼ “Kọ whọ riẹ sọ ahwo nọ a whu no a riẹ oware nọ ahwo nọ a rrọ uzuazọ a bi ru?” Kuvẹ kẹ uyo. Who ve se Ọtausiwoma Na 9:5, Who ve rovie kpohọ uzou avọ 6.

◼ “Kọ who roro nọ o lọhọ re ma wariẹ ruẹ iyoyou mai nọ i whu no ẹdẹjọ, wọhọ epanọ Jesu o dhesẹ eva ikere enana?” Se Jọn 5:28,29, re whọ kuvẹ kẹ uyo. Kẹsena who ve rovie kpohọ uzou avọ 7.

◼ “Eme who roro nọ o te gwọlọ re a ru oreva Ọghẹnẹ eva akpọ na wọhọ epanọ a rrọ obọ odhiwu ru na, wọhọ epanọ a ta evaọ olẹ nana nọ ma riẹ ziezi na?” Se Matiu 6:9, 10, re whọ kuvẹ kẹ uyo. Who ve rovie kpohọ uzou avọ 8.

◼ “Kọ who roro nọ ma be rria etoke nọ a jọ eruẹaruẹ nana dhesẹ na?” Se 2 Timoti 3:1-4, re whọ kuvẹ kẹ uyo. Who ve rovie kpohọ uzou avọ 9.

◼ “U bi gbe ahwo buobu unu oware nọ ebẹbẹ ahwo-akpọ e jẹ wọhọ nọ i bi dhe ẹgẹga. Kọ whọ sai roro no ẹdẹjọ sọ oware nọ a dhesẹ fihọ etenẹ na o wha riẹ ze?” Se Eviavia 12:9, re whọ kuvẹ kẹ uyo. Who ve rovie kpohọ uzou avọ 10.

◼ “Kọ whọ sae gwọlọ riẹ uyo oghẹrẹ onọ nana no ẹdẹjọ?” Se Job 21:7, re whọ kuvẹ kẹ uyo. Who ve rovie kpohọ uzou avọ 11.

◼ “Kọ who roro nọ efihiruo ohrẹ nana nọ o rrọ Ebaibol na o sai fiobọhọ kẹ ahwo reawere uzuazọ uviuwou?” Se Ahwo Ẹfẹsọs 5:33, re whọ kuvẹ kẹ uyo. Who ve rovie kpohọ uzou avọ 14.

U te no orọ ọsosuọ nọ who ro dhesẹ oghẹrẹ nọ a re ru obe-uwuhrẹ Ebaibol kẹ ohwo na no, otẹrọnọ who ru uwuhrẹ na te isiava efa, whọ rẹ sae nẹ iyẹrẹ uwuhrẹ na otẹrọnọ who wo imuẹro nnọ uwuhrẹ na o te nyaharo.