Epanọ A rẹ rọ Rehọ Obe ọ Ebaibol Wuhrẹ na Mu Obe-Uwuhrẹ Ebaibol Họ
O rẹ were omai ibuobu re ma ru obe-uwuhrẹ Ebaibol, rekọ ẹbẹbẹ na họ epanọ ma rẹ rọ to iẹe họ. Obe okpokpọ na Eme Ebaibol na O Gine Wuhrẹ? o rẹ sai fiobọhọ k’omai. A ruẹrẹ eme-emuhọ nọ e rrọ ẹwẹ-obe avọ 3-7 na họ epanọ whọ sae rọ rehọ obe okpokpọ na mu ẹmeọta Ebaibol họ kugbe ohwo. Makọ ahwo nọ a re nwani wo ona tere he evaọ odibọgba na, o te jọ lọlọhọ kẹ ae re a rehọ iẹe mu ebe-iwuhrẹ Ebaibol họ.
◼ Whọ sae dawo edhere nana ẹkwoma eroruiruo ẹwẹ-obe avọ 3:
Nọ whọ tẹ fodẹ oware jọ nọ o via hayo ẹbẹbẹ jọ nọ ọ rrọ iroro ahwo evaọ ẹkwotọ rai no, whọ vẹ kpọ iroro ohwo nọ whọ be t’ẹme kẹ na kpohọ enọ nọ a kere mu gbalọ evaọ ẹwẹ-obe avọ 3 na, whọ vẹ ta kẹe re ọ kpahe ẹme. Who ve rovie kpohọ ẹwẹ-obe avọ 4-5.
◼ Hayo whọ sai muhọ ẹkwoma eme jọ nọ whọ rẹ ta kpahe ẹwẹ-obe avọ 4-5:
Whọ sae ta nọ: “Kọ otẹrọnọ inwene nọ a jọ etenẹ dhesẹ na i gine rugba, o gbẹ jọ oware evawere?” Hayo whọ sae nọ inọ: “Evaọ usu eyaa nana, ovẹ whọ mae gwọlọ rehọ ẹro ruẹ nọ u rugba?” Gaviezọ ziezi kẹ ẹme nọ ọ te kpahe.
Otẹrọnọ ohwo na o dhesẹ uvi isiuru kpahe ikereakere jọ, dhesẹ oware nọ Ebaibol na e ta kẹe ẹkwoma edhe-ẹme nọ e ta kpahe ẹme na evaọ obe na nọ who re se. (Rri ẹkpẹti nọ ọ rrọ ẹwẹ-obe nana.) Ru ei wọhọ epanọ who re ru obe-uwuhrẹ Ebaibol na. A rẹ sae rehọ iminiti isoi rite ikpe jọ unuẹthẹ ru onana eva iweze ọsosuọ na.
◼ Edhere ọfa họ whọ rẹ ta kẹ ohwo na re ọ ta iroro riẹ ẹkwoma eroruiruo ẹwẹ-obe avọ 6:
Kpọ iroro ohwo nọ whọ be t’ẹme kẹ na rri enọ nọ e rrọ obotọ ẹwẹ-obe na, whọ vẹ nọe inọ: “Kọ whọ sae tubẹ jọ usu enọ nana roro kpahe ojọ no ẹdẹjọ?” Otẹrọnọ o dhesẹ isiuru kpahe onọ jọ, who ve rovie kpohọ edhe-ẹme nọ o kuyo onọ na evaọ obe na. (Rri ẹkpẹti nọ ọ rrọ ẹwẹ-obe nana.) Nọ wha bi se ẹme na kugbe na, obe-uwuhrẹ Ebaibol who bi ru na.
◼ Whọ sae rehọ ẹwẹ-obe avọ 7 to obe-uwuhrẹ Ebaibol họ:
Se ihie-ẹme esa ọsosuọ nọ e rrọ ẹwẹ-obe na, nọ i dhesẹ edhere enọ-gbe-iyo nọ ma re ro wuhrẹ Ebaibol na. Who ve rovie kpohọ uzou avọ 3, je dhesẹ oghẹrẹ nọ ma re ro ru obe-uwuhrẹ Ebaibol ẹkwoma edhe-ẹme 1-3 nọ who re ro ruiruo. Ru ọruẹrẹfihotọ nọ who ti ro zihe re wha ta kpahe iyo enọ nọ a nọ fihọ edhe-ẹme avọ 3 na.
◼Epanọ Who re ro Ru Ọruẹrẹfihotọ nọ Who re ro Zihe:
Nọ who te bi ku uwuhrẹ oke ọsosuọ na họ, ru ọruẹrẹfihotọ nọ wha te rọ ruabọhọ ẹmeọta na oke ofa. Whọ sae ta nọ: “Evaọ umutho iminiti jọ ọvo, ma wuhrẹ oware nọ Ebaibol na e ta kpahe ẹme jọ nọ o wuzou gaga. Evaọ oke ofa, ma sae ta kpahe [nọ onọ jọ fihotọ nọ wha te ta kpahe]. Kọ mẹ sai zihe ze oke utionana evaọ oka notha?”
Nọ oke nọ Jihova o fihọ u bi si kẹle na, ọ be gbẹ ruẹrẹ omai kpahe kẹ iruo nọ a k’omai na. (Mat. 28:19, 20; 2 Tim. 3:17) Joma rehọ okwakwa aghae okpokpọ nana ro mu ebe-iwuhrẹ Ebaibol họ.
[Box on page 3]
Ẹme Kpahe Ikereakere nọ E Rrọ Ẹwẹ-Obe avọ 4-5
◻ Eviavia 21:4 (ẹwẹ. 27-28, edhe. 1-3)
◻ Aizaya 33:24; 35:5, 6 (ẹwẹ. 36, edhe. 22)
◻ Jọn 5:28, 29 (ẹwẹ. 72, edhe. 17-19)
◻ Olezi 72:16 (ẹwẹ. 34, edhe. 19)
Uyo kẹ Enọ nọ E Rrọ Ẹwẹ-Obe avọ 6
◻ Fikieme ma jẹ be ruẹ uye? (ẹwẹ. 108, edhe. 6-8)
◻ Ẹvẹ ma sai ro yeri kugbe awa-ọruọ uzuazọ? (ẹwẹ. 184, edhe. 1-3)
◻ Ẹvẹ ma sai ro ru uzuazọ uviuwou mai wereva ziezi? (ẹwẹ. 142, edhe. 20)
◻ Eme ọ rẹ via k’omai okenọ ma te whu? (ẹwẹ. 58, edhe. 5-6)
◻ Kọ ma te wariẹ ruẹ iyoyou mai nọ i whu no? (ẹwẹ. 72, edhe. 17-19)
◻ Ẹvẹ o sai ro mu omai ẹro inọ Ọghẹnẹ o ti ru eyaa riẹ kẹ obaro na gba? (ẹwẹ. 25, edhe. 17)