Kọ Whọ te To Obe-Uwuhrẹ Ebaibol Họ Evaọ October?
1. Eme ma ti fihọ ada evaọ amara October?
1 Uwou-Eroro gbe Awake! ma ti fihọ ada evaọ amara October. Re ma sai fi obọ họ kẹ enọ i dhesẹ isiuru, a be tuduhọ omai awọ re ma rehọ omobe-ovẹvẹ na Kọ Whọ Gwọlọ Riẹ Uzẹme Na? kẹ ahwo otiọye, jẹ daoma to obe-uwuhrẹ Ebaibol họ. Ẹvẹ ma sai ro ru onana nọ ma te zihe?
2. Ẹvẹ ma sae rọ rehọ Kọ Whọ Gwọlọ Riẹ Uzẹme Na? rọ to obe-uwuhrẹ Ebaibol họ nọ ma te zihe bru ohwo nọ ọ rehọ emagazini?
2 Epanọ Ma rẹ rọ Rehọ Omobe-Ovẹvẹ na Ru Iruo: Ma sae ta nọ: “Emagazini nọ whọ rehọ mi omẹ na ọ be tuduhọ oghẹrẹ ahwo kpobi awọ re a se Ebaibol na. [Rehọ omobe-ovẹvẹ na kẹ ohwo na, je dhesẹ enọ nọ e riẹe na kẹe.] Enọ nana yọ obọdẹ enọ jọ nọ Ebaibol na e kẹ iyo rai. Kọ whọ nọ onọ utiona no ẹdẹjọ?” Nọ ohwo na ọ tẹ kuyo no, wha ve se uyo na no omobe-ovẹvẹ na ze, je se ikere ọvo jọ evaọ oria nọ wha se na. Kẹsena whọ vẹ ta kẹe nọ onana yọ ovo jọ gheghe evaọ eware nọ Ebaibol na u wuhrẹ, whọ vẹ rehọ obe ọ Ebaibol Wuhrẹ na kẹe. Dhesẹ izoẹme obe na kẹe re ọ salọ ọjọ, wha ve wuhrẹ idhe-ẹme ọsosuọ uzou nọ ọ salọ na. Hayo ma rẹ sai kpohọ uzou nọ a jọ ta ẹme ziezi kpahe oware nọ ma jọ omobe na ta kpahe na. Eria obe ọ Ebaibol Wuhrẹ na nọ ma rẹ sae jọ ruẹ iyo enọ na:
● Kọ Ọghẹnẹ ọ be ginẹ daezọ mai? (ẹwẹ. 9-11, edhe. 6-10)
● Kọ ẹmo gbe uye-oruẹ i ti kuhọ ẹdẹjọ? (ẹwẹ. 12, edhe. 12-13)
● Eme ọ rẹ via k’omai nọ ma te whu? (ẹwẹ. 59-61, edhe. 7-8)
● Kọ ẹruore jọ ọ rrọ kẹ ahwo nọ a whu no? (ẹwẹ. 71, edhe. 13-15)
● Ẹvẹ mẹ sae rọ lẹ nọ Ọghẹnẹ o je yo olẹ mẹ? (ẹwẹ. 166-167, edhe. 5-8)
● Ẹvẹ mẹ sai ro wo evawere evaọ uzuazọ? (ẹwẹ. 9, edhe. 4-5)
3. Eme ma re ru nọ ohwo o gbe wo uvẹ hẹ hayo nọ isiuru riẹ e gbẹ ga tere he?
3 Otẹrọnọ ohwo na o gbe wo uvẹ nọ ma sae rọ rehọ obe ọ Ebaibol Wuhrẹ na to uwuhrẹ Ebaibol họ kugbei hi evaọ ozihebro ọsosuọ na, ma sai ru ọruẹrẹfihotọ re ma zihe evaọ oke ofa. Nọ isiuru ohwo na e gbẹ ga tere he, ma rẹ sae jọ iweze sa-sa ta kpahe enọ efa nọ e rrọ omobe-ovẹvẹ na taure ma te ti dhesẹ Ebaibol Wuhrẹ na kẹe. Joma rehọ emamọ omobe-ovẹvẹ nana to obe-uwuhrẹ Ebaibol họ evaọ October, re ma fi obọ họ kẹ ahwo evezi “riẹ uzẹme na.”—Jọn 8:31, 32.