Omakugbe Jọ nọ Ma rẹ Jọ Re Emu Abọ-Ẹzi Jẹ Wereva
1. Ẹvẹ Jihova ọ be rọ rẹrote ẹgwọlọ abọ-ẹzi idibo riẹ?
1 Jihova ọ be rẹrote ẹgwọlọ abọ-ẹzi idibo riẹ. Dede nọ ohọo abọ-ẹzi u bi kpe ahwo buobu nẹnẹ, ma be re emu abọ-ẹzi da oma. (Aiz. 65:13) Edhere jọ nọ Jihova ọ be rọ ko omai evaọ abọ-ẹzi họ ẹkwoma ikokohọ ubrotọ ẹgbukpe mai. Kọ whọ be ruẹrẹ oma kpahe re whọ jariẹ evaọ abọ kpobi ọrọ Okokohọ Ubrotọ “Jọ Ẹzi Ọghẹnẹ Ọ Kpọ Owhẹ” nọ ọ be tha na? A ruẹrẹ emu abọ-ẹzi ọwewere nọ ọ rẹ bọ omai ga họ be hẹrẹ omai.
2. Eme ma re ru rọ ruẹrẹ oma kpahe kẹ okokohọ na?
2 M’Omaa Kpahotọ: “Oma omamọ ohwo o rẹ rehọ ọruẹriọ tha.” (Itẹ 21:5) Fikiere, nọ whọ be jiroro epanọ whọ te rọ jariẹ evaọ edẹ esa okokohọ na, jọ enẹna vuẹ ọga iruo ra otẹrọnọ o gwọlọ nọ who re mi uvẹ evaọ oria iruo ra. Otẹrọnọ whọ te gwọlọ uwou nọ who re wohọ, kọ who ru ọruẹrẹfihotọ nana no? Whọ sae jẹ ma omaa emu uvo nọ whọ rẹ re kugbe inievo Ileleikristi ra evaọ ogege okokohọ na. Ru ọruẹrẹfihotọ epanọ who re ro te oria okokohọ na ẹruoke kẹdẹ kẹdẹ, re whọ gwọlọ oria ẹkeria ra, je kuomagbe ẹsuọ ole emuhọ na gbe olẹ.
3. Oghẹrẹ ẹgọ vẹ u fo nọ ma rẹ wha?
3 Ma rẹ ruẹ nọ ẹgọ nọ ma te wha ọ rrọ owowa jẹ rrọ kpatiẹ. (1 Tim. 2:9, 10) Ikokohọ ubrotọ i re rovie uvẹ fihọ nọ ma rẹ rọ ta usiuwoma kẹ ahwo ẹwho okokohọ na. Ma tẹ gẹgọ nọ ọ rrọ kpatiẹ, jẹ wha ebaje okokohọ mai evaọ ẹwho okokohọ na, u re ru omai wo ohẹriẹ no ahwo nọ a rrọ ukoko ho, jẹ lẹliẹ amọfa rọ emamọ ubiẹro rri omai.
4. Eme o ti fiobọhọ k’omai gbe iviuwou mai wo erere vọvọ no eme okokohọ na ze?
4 Gaviezọ Ziezi: Ma gwọlọ nọ abọ ọvuọvo ọrọ emu abọ-ẹzi nọ a te jọ okokohọ na kẹ na o vo omai vievie he. (Itẹ 22:17, 18) Nọ ma te bi rri je se oria Ebaibol lele ohwo nọ o bi ru ẹme, je kere igogo-eme fihotọ, u ti fiobọhọ k’omai gaviezọ jẹ whaha iroro mai nọ i re reghe. Kẹsena evaọ owọwọ, ma sae rehọ eme nọ ma kere fihotọ na t’ẹme kugbe amọfa kpahe igogo-eme okokohọ na. Evaọ anwọ ikpe jọ ze na, ma muẹrohọ no inọ izoge jọ a rẹ keria kugbe a ve bi gbiku hayo rehọ ifonu rai ro vi evuẹ se amọfa nọ okokohọ na ọ be nyaharo na. Otẹrọnọ ma wo emọ esese, makọ te e rọ ikpe-ikpegbọ, o rẹ mai woma re ma keria kugbe wọhọ uviuwou jẹ gaviezọ viukpenọ ma rẹ kẹ emọ mai uvẹ re a nyae keria kugbe izoge efa.
5. Ẹvẹ ma sai ro fiba omaweromẹ mai evaọ okokohọ na?
5 Reawere Omakugbe: Nọ who te se egbẹnyusu ra gb’oma re emu ọwewere kugbe, ẹsiẹe whọ rẹ mae reawere riẹ. (Itẹ 15:17) Epaọvo na re, omakugbe inievo-emezae gbe erọ emetẹ mai u re fiba omaweromẹ mai evaọ okokohọ na. Fikiere, taure a te ti muhọ, u re woma kẹhẹ nọ ma tẹ nya bru amọfa nọ a ziọ okokohọ na re ma yere ai jẹ reawere omakugbe! (Ol. 133:1) Nọ ohwo-agbara na ọ tẹ nwani zizie omai re ma keria ọvuọ oria riẹ inọ ikporakporo i bi ti muhọ, ma re ku ẹmeọta mai họ, ma vẹ keria ọvuọ oria riẹ re okokohọ na o muhọ.
6. Gbiku oware jọ nọ whọ rọ ẹro ruẹ nọ u dhesẹ epanọ ma sae rọ ta usiuwoma kẹ ahwo evaọ ẹwho okokohọ na.
6 Rọ Uvẹ Kpobi nọ U Rovie Fihọ Se Isẹri: Ikokohọ ubrotọ i re rovie obọdẹ uvẹ fihọ nọ ma re ro se isẹri. Nọ ahwo nọ a kpohọ okokohọ a tẹ nyae dẹ emu evaọ oria nọ a jẹ zẹ emu nọ abọjọ okokohọ na o te kuhọ no, enọ e be zẹ emu gbe amọfa a rẹ nọ ae kpahe uzoẹme nọ o rrọ ebaje okokohọ na. Onana u su kpohọ ẹmeọta gbe emamọ isẹri ise kpahe uzẹme na no. A rọ uvẹ yena zizie ahwo jọ kpohọ okokohọ na, yọ a nyaze.
7. Fikieme ma je kpohọ okokohọ ubrotọ nọ ọ be tha na?
7 A rọ idu euwa buobu ro ru ọruẹrẹfihotọ okokohọ na, ruẹrẹ eria okokohọ fihọ, ruẹrẹ eko-iruo nọ e rẹ rọ ẹro te okokohọ na họ, gbe eme nọ a te jọ okokohọ na ru. Omodawọ ogaga nọ a rọ ruẹrẹ emu abọ-ẹzi nọ a te kẹ omai evaọ okokohọ na họ u dhesẹ uvi uyoyou nọ Jihova o wo kẹ ahwo riẹ. Jọ mai kpobi ma jariẹ, jẹ re eva vọ! Wo ohẹriẹ no ahwo akpọ nọ ohọo abọ-ẹzi u bi kpe, ma tẹ re emu abọ-ẹzi veva, o te wọ omai “so ile ghọghọ” fiki eva nọ e be were omai.—Aiz. 65:14.
[Etehe nọ e rrọ ẹwẹ-obe avọ 4]
Ekareghẹhọ Okokohọ Ubrotọ
◼ Oke Ọruẹrẹfihotọ: Ọruẹrẹfihotọ okokohọ na ọ te hai muhọ eva 9:20 a.m. evaọ edẹ esa na. Nọ ikporakporo emuhọ na i te muhọ no, mai kpobi ma rẹ keria ọvuọ oria riẹ re ọruẹrẹfihotọ na ọ ruẹsi muhọ evaọ edhere ọkpakpatiẹ. Ọruẹrẹfihotọ Edisoi-Oka gbe Ẹdẹ-Ọmaha i ti kuhọ eva 4:55 p.m, ọrọ Ẹdoka o ve ti kuhọ eva 4:00 p.m.
◼ Eria nọ A rẹ Dhẹ Imoto, Emẹshini, gbe Idhighere Fihọ: Evaọ eria ikokohọ kpobi, eruẹrẹahwohọ e te jariẹ nọ e te kẹ ọkpọvio. Iviena ru lele ọkpọvio rai.—1 Kọr. 14:40.
◼ Ẹrawo Oria Ẹkeria: Ahwo nọ wha gbẹ ruọ omoto ọvona ze hayo enọ wha gbẹ rrọ uwou ovona ọvo whọ rẹ sae rawo ekpala kẹ.
◼ Emu Uvo: Iviena wha emu uvo lele oma viukpenọ who re no ogege okokohọ na kpohọ otafe nyae gwọlọ emu dẹ evaọ etoke eriosehọ uvo na. Whọ rẹ sae rehọ orawo-emu osese nọ who re fihọ otọ akpala rọ wha emu ra ze. Ma kuvẹ orawo-emu ulogbo, eglase, ilolo, imidhe nọ i re whu, gbe idi nọ i re mu evaọ ogege okokohọ na ha.
◼ Unevaze: Ma rẹ sai dhesẹ ovuhumuo mai ẹkwoma azọhọ unevaze nọ ma re ru kẹ iruo akpọ-soso na evaọ obọ Ọgwa Uvie mai hayo obọ okokohọ na. Echẹke kpobi (obe nọ a rẹ rọ rehọ igho evaọ ebanke) nọ a ro ru unevaze fihọ itehe unevaze nọ e rrọ okokohọ na, a re kere fihọ iẹe nọ, a wha ugho na kẹ “Watch Tower,” yọ a re kere iei eme ivẹ.
◼ Omonwa gbe Eware-Idudhe: Ẹyao hayo omonwa idudhe o tẹ romavia evaọ ogege okokohọ na, iviena vuẹ omọvo eruẹrẹahwohọ nọ ọ kẹle owhẹ re o fiobọhọ rọ ohwo nọ ọ be mọ na kpohọ Ẹko-Iruo Obufihọ Ọsosuọ na, re ahwo ẹko-iruo obufihọ ọsosuọ nọ e riẹ iruo na ziezi nọ e rrọ ogege na a sae rọ ẹro te ẹbẹbẹ na.
◼ Dhẹ Ẹrera: Iviena nọ whọ te dhẹ kpohọ okokohọ na je kpozi, dhẹ ẹrera, fiẹrohotọ, je lele izi edhere nọ a fihọ. Ileleikristi a rri uzuazọ ghaghae, fikiere a re koko izi kpobi nọ i re fiobọhọ whaha omonwa. (Ol. 36:9) Inievo nọ e rehọ imoto nọ e be wọ ae kpohọ okokohọ na, a rẹ vẹvẹ edraeva na unu re a dhẹ ẹrera avọ ẹro o fihotọ.
◼ Nọ Whọ tẹ be Rekọdo Ẹme: A re dhe uvumọ oware nọ a rẹ rọ rekọdo ẹme hayo ro vidio eware fihọ ekwakwa ẹlẹtriki hayo erọ ẹmeọta nọ e rrọ ogege na vievie he, yọ a rẹ rehọ ekwakwa yena ruiruo evaọ oghẹrẹ nọ i gbe kpokpo amọfa ha.
◼ Iwoho Erehọ: Whọ tẹ be rehọ iwoho eva okenọ abọ okokohọ na ọ be nyaharo, whọ rehọ eflashe ruiruo ho. U fo vievie he re ohwo jọ ọ kpama nyae rehọ iwoho nọ ẹme ọ be nyaharo. Ofariẹ, ma kuvẹ vievie he re ahwo nọ a be rọ iwoho-erehọ kokọ a rueva ogba okokohọ na re a jariẹ rehọ iwoho, a tẹ make rrọ Isẹri Jihova.
◼ Efọmo ọ Follow-Up: A rẹ rehọ efọmo ọ Please Follow Up (S-43) na rọ kẹ evuẹ kpahe ohwo nọ ma lele t’ẹme nọ o dhesẹ isiuru kpahe ovuẹ Uvie na evaọ etoke okokohọ na. Jọ iwhowho-uvie a wha efọmo nana ọvo hayo ivẹ lele oma ziọ okokohọ na. Whọ sae rọ efọmo nana nọ who kere eme fihọ gbagba no kẹ okere-obe ukoko ra nọ wha te te uwou no.
◼ Oria nọ A jẹ Zẹ Emu/Ahwo nọ A rẹ Zẹ Eware Evaọ Otafe Ogba Okokohọ Na: Rọ uruemu uwoma nọ who re dhesẹ evaọ oria nọ a jẹ zẹ emu rọ wha ọghọ se odẹ Jihova. U fo ho re whọ nyae dẹ eware evaọ okenọ abọ okokohọ ọ be nyaharo. Whọ tẹ gwọlọ dẹ oware jọ, o rẹ mai woma re whọ dẹe taure ọruẹrẹfihotọ na o te ti muhọ hayo nọ o te kuhọ no.
◼ Edrama: O rẹ jọ oware uyoyou re inievo-emetẹ e siọ idhọfọ irereghe hayo nọ e rrọ gegerege ba ẹfare evaọ uvo Ẹdoka nọ a ti ru edrama na, keme idhọfọ ilogbo itieye na i re di ude ahwo nọ a rrọ obemu. Onana o mae rrọ ere fiki oghẹrẹ Egwa Okokohọ gbe Egwa Uvie nọ a sae jọ ru ikokohọ re nọ a be bọ enẹna.—1 Kọr. 10:24.
◼ Iwou nọ A re Wohọ: Dhesẹ ubi ẹzi na evaọ okenọ a be k’owhẹ uwou nọ who te te ogege okokohọ na no. Who re wohọ uvumọ uwou evaọ ogege okokohọ na ha otẹrọnọ Ẹko-Iruo Uwou na o gbẹ rehọ iẹe kẹ owhẹ hẹ. Wohọ oria nọ a k’owhẹ. U fo gbe he re inievo-emezae a jọ oria nọ a rọ kẹ inievo-emetẹ te udevie aso hayo tubẹ wezẹ etẹe dede, yọ inievo-emetẹ a re ru ere gbe he. There emu evaọ oria nọ a jọ kẹ uvẹ riẹ ọvo. Ofariẹ, emu othere evaọ okenọ ẹmeọta ọ be nyaharo u dhesẹ ovuhumuo kẹ eware abọ-ẹzi vievie he. (Luk 10:38-42) Otẹrọnọ ẹbẹbẹ jọ ọ roma via evaọ oria nọ who wohọ, ruẹ nọ whọ vuẹ ẹko iruo iwou na ababọ oke-oraha nọ whọ tẹ nwani te obọ okokohọ na.
◼ Eware nọ A re Gbolo Fihọ Oria nọ U Fo: O gwọlọ nọ esẹgbini a re wuhrẹ emọ rai re a siọ enaelọno nọ a rọ dẹ ame, ebe iswiti gbe eware efa nọ i re ru oria fihọ gbegbe ba e gbolo fihọ ogege okokohọ na, maero evaọ eria nọ a keria evaọ ọgwa na. Onana o kẹre te otafe ogba na wariẹ họ. A ti fi eware nọ a re gbolo erara fihọ họ eria sa-sa evaọ ogege na re ohwo kpobi, te emaha na a sai fi eware nọ a gwọlọ gbolo kufiẹ họ ae eva. U fo re who wuhrẹ emọ ra no emaha ze re a riẹ oghẹrẹ nọ a re ru oria fihọ fuafo.