Eriwo Ileleikristi Kpahe Etho nọ A rẹ Jọ Ẹdawọ Isukulu Tho
1 Uvi Ileleikristi kpobi a wo eriwo Pọl nọ o kere fihọ Ahwo Hibru 13:18 na inọ: ‘Ma gwọlọ ru eware kpobi ziezi avọ oruọzewọ.’ Ere o rrọ omai oma dede nọ ma be rria akpọ nọ uruemu uwoma u je bi kiekpo kẹdẹ kẹdẹ na. Ababọ oruọzewọ nọ o da oria kpobi fia u bi kpomahọ kabọ kabọ uzuazọ, kugbe edawọ nọ a rẹ jọ isukulu ru. Isiuru epanọ a re ro wo obokparọ evaọ ẹdawọ re a sai no eklase ruọ eklase hayo re a sai wo uvẹ ruọ isukulu efa o be lẹliẹ otujọ nọ a bi ro tho evaọ ẹdawọ.
2 Epanọ O Kẹre Te: Ahwo nọ a bi kere ẹdawọ a be rọ idhere sa-sa tho re a sai wo obokparọ. Idhere enana e kẹre te ewẹ-ebe nọ iyo enọ na e rrọ nọ a re kere no ze, ekere mi ohwo nọ ọ keria kẹle ae evaọ ọgwa ẹdawọ na, iyo enọ na nọ a rẹ daoma wo t’obọ taure ẹdẹ ẹdawọ na o te ti te, ifonu nọ a re ro vi iyo enọ na se ai evaọ etoke ẹdawọ na, hayo iyo na nọ a re kere fihọ abọjọ ugboma na nọ u siomano. Ahwo jọ a re fi odẹ h’otọ kẹ ẹdawọ, a vẹ hwa ugho kẹ omọfa re o kere ẹdawọ na kẹ ae.
3 U wo oghẹrẹ ofa jọ nọ a be rọ wha eyoma nana haro enẹna re. Evaọ eria jọ, iticha nọ i wuzou isukulu a rẹ ta kẹ emọ-isukulu nọ i bi kere ẹdawọ re a hwa “unuigho jọ sa.” A rẹ kẹ enọ e hwa ugho nana oghẹrẹ ekade jọ sa nọ a sae rọ rueva ọgwa ẹdawọ nọ a ruẹrẹhọ nọ a re jo dhesẹ kẹ enọ e hwa ugho na. Iyẹrẹ i te omai obọ no inọ esẹgbini jọ nọ e rrọ ukoko na a be tuduhọ emọ rai awọ re a jọ “isukulu nọ i wo ọruẹrẹfihotọ otiọye” kere ẹdawọ. Izoge efa a re koko ugho k’omobọ rai, a vẹ wha unuigho na ababọ esẹgbini rai nọ e rẹ riẹ kpahe iẹe.
4 Evaọ iyero efa jọ, a rẹ gba emọ isukulu họ hwa ugho na. Wọhọ oriruo, a guegue oniọvo ọmọtẹ mai jọ inọ ọ gbẹ hwa “unuigho” nọ a ta na ha, a te kẹe uvẹ kere ẹdawọ họ. Oniọvo riẹ nọ ọ rrọ ọkpako ukoko o te kere ileta kpohọ obọ oria nọ u wuzou isukulu ẹkwotọ yena (Ministry of Education). Oyena o wha riẹ ze nọ a ro mu iticha isukulu na jọ nọ e jẹ wha ujitho na haro. Uzẹme riẹ họ, enọ i wuzou iruẹru isukulu hayo egọmeti a rọwo fihọ etho nọ a re tho evaọ ẹdawọ họ. Rekọ itu iprisipale gbe iticha jọ a be wha onana haro keme u te no osa nọ a be hwae no, a be rọ edhere nana wo ugho ofa; o tẹ jẹ be lẹliẹ ahwo riẹ ai keme a bi ru emọ-isukulu buobu kparobọ evaọ ẹdawọ.
5 Oware nọ Ma Jẹ Whaha Uruemu Nana: Ebaibol i mukpahe oghẹrẹ edhere kpobi nọ a re ro tho evaọ ẹdawọ isukulu. Itẹ 11:1 o ta nọ: “Owawọ-eviẹhọ u re tu ỌNOWO na oma.” Nọ ohwo o te tho rọ kparobọ evaọ ẹdawọ, unu nọ ọ jọ ẹdawọ na wo hayo oghẹrẹ nọ ọ kparobọ te evaọ ẹdawọ na o rẹ nwani dhesẹ oghẹrẹ nọ ọ riẹ obe te dẹẹ hẹ. Nọ Jihova o mukpahe ọrueta na, Ileleikristi uzẹme a rẹ whaha erueta nọ o rẹ lẹliẹ amọfa rri rai kpekpehru.
6 Oware ofa nọ Ileleikristi a jẹ whaha etho nọ a re tho evaọ ẹdawọ họ, oghẹrẹ kpobi nọ ohwo ọ rọ jariẹ w’obọ, yọ aghẹmeeyo kẹ Egọmeti. Egọmeti Nigeria o fi uzi họ kekeke inọ ohwo kpobi nọ a kru nọ o bi tho evaọ ẹdawọ a re mu ei fihọ uwou-odi. Orọnikọ fiki ozọ uwou-odi nọ a re mu omai fihọ ọvo ma rẹ rọ whaha uruemu nana ha, rekọ o gba omai họ inọ ma re ‘yoẹme enọ a kẹ udu na.’—Rom 13:1-7.
7 Ofariẹ, Ileleikristi a re tho hayo tuduhọ amọfa awọ re a tho evaọ ẹdawọ họ, keme ere oruo o rẹ rọ ẹmẹmera kpe obroziẹ-iroro ohwo no. Jihova ọ k’omai obroziẹ-iroro na re o vẹvẹ omai unu nọ ma tẹ be nyathọ. Otẹrọnọ ma gbẹ be kezọ kẹ obroziẹ-iroro na ha makọ evaọ eware esese, ma sai kieruọ uzioraha ulogbo ababọ obroziẹ-iroro na nọ o re brukpe omai, yọ oyena u re kpomahọ usu mai kugbe Jihova yoyoma.—1 Pita 3:16.
8 Owha-Iruo Esẹgbini: Ababọ avro, esẹgbini Ileleikristi a you emọ rai, jẹ gwọlọ ewoma rai. O make rrọ ere na, esẹgbini Ileleikristi nọ e kpako evaọ abọ-ẹzi a re ru ei vẹ kẹ emọ rai inọ a rri ẹnyaharo abọ-ẹzi emọ na ghare vi ẹnyaharo kpobi nọ a rẹ sai wo evaọ akpọ na. Esẹgbini nọ i wo ozodhẹ Ọghẹnẹ a riẹ inọ Jihova o mu iruo ewuhrẹ emọ rai họ ai obọ. (Ẹf. 6:4) Fikiere, a rẹ thọ emọ rai uke evaọ eyoma oruo ho. Esẹgbini iyoyou a re wuhrẹ emọ rai re a you oruọzewọ gbe uruemu ezi.
9 A riẹ omai Isẹri Jihova kẹ oruọzewọ mai. Mai omomọvo ma gwọlọ yọrọ emamọ odẹ yena. Fikiere, joma tuduhọ emọ mai nọ i bi kpohọ isukulu awọ inọ a se obe ziezi re a sae riẹ ru evaọ obọ isukulu. (Itẹ 10:4; 22:29) Dede nọ etho nọ a rẹ jọ ẹdawọ tho o da akpọ na fia nẹnẹ, jọ mai kpobi ma daoma re ma ru oma mai kare afuẹwẹ evaọ aro ahwo kpobi, jẹ rọ ere wha ujiro se Jihova.—Hib. 13:18.