Jọ Owhowho-Uvie nọ Ọ rẹ Nẹ Iyẹrẹ Ẹsikpobi
1 Evaọ eruẹaruẹ riẹ kpahe edẹ urere na, Jesu o fiẹgba họ ta nọ: “Usiuwoma na a rẹ te kake vuẹ erẹwho kpobi tao.” (Mak 13:10) Jesu ọ rọ ere ru ei vẹ inọ rọkẹ ilele riẹ nọ e te rria evaọ etoke ọzino riẹ, iruo usiuwoma ota gbe ilele-iruo na e rẹ jọ oware nọ o mai wuzou evaọ uzuazọ rai, nọ a rẹ rọ karo vi eware efa kpobi, je ru ei avọ iroro ovẹrẹ. Fikiere, evaọ aro orokele Ileleikristi ikpe udhusoi ọsosuọ, ma rẹ rọ ẹgba mai kpobi w’obọ vọvọ evaọ iruo nana rite urere. (1 Kọr. 9:16; Mat. 24:14) Ẹvẹ ma sai ro dhesẹ nnọ ma se iruo nana nọ Ọghẹnẹ ọ k’omai na gboja, jẹ be rehọ eva mai kpobi ru ei?
2 Hai W’obọ Ẹsikpobi: Jihova yọ Ọghẹnẹ nọ a re fievahọ jẹ rọ ẹro so ẹsikpobi, “Ọghẹnẹ ọtẹruo.” (Izie. 32:4) Idibo Ọghẹnẹ oke anwae, wọhọ Daniẹl, a rọ aro kele Jihova fikiere a ‘gọ riẹ kẹse kẹse.’ (Dan. 6:20) Mai oma mai ma rẹ gọ Jihova ẹsikpobi, jẹ jọ ahwo nọ a re fievahọ, maero evaọ iruo usiuwoma ota na. Onana o gwọlọ nọ ma re kpohọ usiuwoma kẹse kẹse jẹ n’iyẹrẹ mai gbagba. Jihova yọ Ọghẹnẹ nọ ọ rrọ Osiwi, maero rọkẹ idibo ẹrọwọ riẹ. (1 Tim. 4:10) Eva mai kpobi nọ ma re ro ru iruo Jihova o r’oja kẹ esiwo. (Wawo Eviavia 7:15.) Nọ o r’oja tere na, ma rẹ gbaemu re ma wobọ ẹsikpobi evaọ odibọgba na.
3 Owhowho-uvie ajọwha ọ rẹ ta usiuwoma kamara kamara. Oware jọ nọ u re dhesẹ nọ ma be rọ eva mai kpobi ruiruo na họ ma rẹ n’iyẹrẹ usiuwoma ota mai ẹruoke, isiava amara. Ohwo nọ ọ rẹ ta usiuwoma rekiyọ ọ rẹ n’iyẹrẹ riẹ hẹ evaọ urere amara, a rẹ sai dhesẹ iẹe inọ o ru odibọgba riẹ gba ha. Nọ ma tẹ be n’iyẹrẹ mai gbagba evaọ ẹruoke kamara kamara u re dhesẹ nọ ma bi yoẹme kẹ Ọghẹnẹ, ma se iruo riẹ gboja, jẹ be rọ oma totọ ru iruo na. U re dhesẹ nọ udu mai o rrọ iruo usiuwoma ota na, ma riẹ epanọ i wuzou te, inọ ma bi ru ei avọ iroro ovẹrẹ, jegbe inọ ma gwọlọ ru iruo na gba wọhọ epanọ o rrọ ẹjiroro Jihova. (Izik. 9:2, 11; 2 Tim. 4:2, 5) Kọ who bi ru ere ẹsikpobi?
4 Eware nọ I re Fiobọhọ k’Omai Ẹsikpobi: Ekpako ukoko a be hae kareghẹhọ omai eware nọ i re fiobọhọ k’omai ta usiuwoma ẹsikpobi. Iviena yoẹme kẹ ekpako ukoko ra gbe okere-obe ukoko na ẹkwoma iyẹrẹ ra nọ whọ rẹ nẹ gbagba evaọ ẹruoke, isiava amara. A be hai ru owhowhovia kẹ iwhowho-uvie re a n’iyẹrẹ usiuwoma ota rai. Wọhọ enọ i bi yoẹme, ma riẹ nọ owha-iruo mai o rrọ re ma n’iyẹrẹ. Wariẹ akpọ na họ, a kẹ iwhowho-uvie nọ oma rai o ga tere he fiki owho gbe enọ ẹyao hayo omonwa u kru fihotọ uvẹ nọ a rẹ rọ n’iyẹrẹ iminiti 15, otẹrọnọ a gbẹ sae n’iyẹrẹ auwa ọsoso evaọ amara ha. Otẹrọnọ ẹyao o kru omai fihotọ, kọ ma gbẹ rọ ọruẹrẹfihotọ obọdẹ nana ro ruiruo ziezi? Ma te bi ru ere, u re dhesẹ inọ ma bi yoẹme kẹ Ọghẹnẹ.—Jem. 1:22.
5 Iyẹrẹ-Enẹ Ẹsikpobi U re Ru nọ Ma Gbẹ Jọ Enọ E Siọ Iruo Uvie Ba No Ho: Owhowho-uvie ọ gbẹ n’iyẹrẹ evaọ amara ọvo ho yọ ẹdhigodo. Rekọ, owhowho-uvie nọ ọ n’iyẹrẹ vievie he evaọ emerae ezeza ususu yọ ọnọ ọ se iruo-uvie ba no. U re vevẹ inọ, ẹdhigodo o rẹ lẹliẹ ohwo zihe ruọ ọnọ ọ se iruo uvie ba no. Mai ọvuọvo ọ gwọlọ kieruọ uyero enwoma abọ-ẹzi nana ha. Makọ use-abọ nọ ma rẹriẹ ovao dhe kẹhẹ, ma gwọlọ w’obọ ẹsikpobi, jọ jajaja, wo ẹnyaharo, je ru iruo na te urere.—Ol. 96:2.
6 Usiuwoma nọ ma rẹ ta ẹsikpobi u re fiobọhọ k’omai wo ẹrọwọ, kru ẹrọwọ na ga, yọ oyena o rẹ thọ omai evaọ abọ-ẹzi. Iyẹrẹ mai nọ ma rẹ nẹ vẹrẹ u re dhesẹ ẹmeoyo mai kẹ Jihova gbe ajọwha mai evaọ iruo riẹ. Mai omomọvo ma wo owha-iruo evaọ obọ Jihova nọ ma re ro ru ere. Fikiere, jọ owhowho-uvie nọ o re kpohọ usiuwoma ẹsikpobi, je ru ei fihọ uruemu ra re whọ n’iyẹrẹ ra ẹruoke.—Ol. 61:8; Luk 10:17.