Ma te Wariẹ Wuhrẹ Obe na Eme Ebaibol na O Gine Wuhrẹ?
1. (a) Obe vẹ ma bi ro ruiruo gaga evaọ eru ebe-iwuhrẹ Ebaibol (b) Fikieme ma te rọ wariẹ wuhrẹ obe ọ Ebaibol Wuhrẹ na?
1 Ma be hae rehọ obe na Eme Ebaibol na O Gine Wuhrẹ? ro ruiruo ẹsibuobu evaọ odibọgba na, maero nọ ma bi ru ebe-iwuhrẹ Ebaibol. Ma te wariẹ wuhrẹ obe nana evaọ Uwuhrẹ Ebaibol Ukoko na muhọ no oka ọ March 1, 2010 vrẹ, re u fi obọ họ kẹ ahwo ukoko na kpobi riẹ eware nọ e rrọ obe na ziezi.
2. (a) Ẹvẹ a rẹ rọ rehọ obe ọ Ebaibol Wuhrẹ na ro ru Uwuhrẹ Ebaibol Ukoko na? (b) Fikieme o te rọ were owhẹ re whọ kuyo okenọ a ti wuhrẹ obe nana?
2 Ọkpako nọ o ti ru Uwuhrẹ Ebaibol Ukoko na o ti si iroro ahwo kpohọ enọ nọ e rrọ emuhọ uzoẹme kpobi. A vẹ te rọ enọ nọ e rrọ obotọ ẹwẹ-obe na ro ru uwuhrẹ na. A ti se jẹ t’ẹme kpahe Ikereakere nọ i ru ugogo-eme na vẹ, yọ ẹkpẹti na “Oware nọ Ebaibol na O Wuhrẹ” nọ o rrọ urere uzou na u ti fi obọ họ evaọ ọkiẹkpemu oware nọ ma wuhrẹ, keme ẹkpẹti na o wo iyo Ikereakere kẹ enọ nọ a jọ emuhọ uzou na nọ. O te were owhẹ oma re whọ kuyo, nọ orọnọ eme obe na e rrọ vevẹ, lọlọhọ, je siuru ziezi na.
3. (a) Abọ vẹ jọ evaọ obe nana o te were omai gaga? (b) Ẹvẹ a te hai ro wuhrẹ abọ eme-ofiba na?
3 Eme-ofiba obe nana e kẹ oruvẹ odidi kpahe izoẹme sa-sa. Ẹsejọ a te hae rehọ eme-ofiba na jọ kugbe ro ru Uwuhrẹ Ebaibol Ukoko na. Ọnọ o bi se evaọ uwuhrẹ na o re se eme kpobi nọ e rrọ abọ eme-ofiba nọ a fihọ kẹ oka yena, yọ a rẹ sai se izoẹme nọ e rrọ thethei gaga ibribro. A ruẹrẹ enọ uwuhrẹ họ kẹ eme-ofiba na ha. Rekọ, ọkpako nọ o bi ru uwuhrẹ oka yena ọ sae nọ ogbotu na enọ sa-sa re a ta kpahe igogo-eme nọ e rrọ oria nọ a se na.
4. Eme mai omomọvo ma re ru re ma sai wo erere ziezi no uwuhrẹ obe ọ Ebaibol Wuhrẹ na ze?
4 Omaa oria nọ a te hai wuhrẹ evaọ obe ọ Ebaibol Wuhrẹ na o te hae romavia evaọ omaa uwuhrẹ koka koka nọ e be hae jọ Odibọgba Uvie Mai na. Re whọ sai wo erere ziezi, hae ruẹrẹ oma kpahe kẹ uwuhrẹ kpobi. Ofariẹ, whọ jọ uvumọ oka u vo owhẹ vievie he, je w’obọ vọvọ evaọ ewuhrẹ obe ọ Eme Ebaibol na O Gine Wuhrẹ?