Ẹkpẹti Onọ

◼ Nọ Isẹri Jihova a tẹ rekọdo eme nọ a ru hayo kere ai fihọ otọ, kọ u fo re a ghale ae kẹ amọfa?

Evuẹ nọ a kẹ no Ebaibol ze e rẹ bọ omai ga. (Iruẹru 15:32) Fikiere, oma o rẹ wọ omai re ma ru evuẹ uduotahawọ itieye na te amọfa nọ e jariẹ hẹ obọ. Ekwakwa sa-sa e riẹ nẹnẹ nọ a rẹ sae rọ rekọdo eme je vi ai se amọfa ababọ oke-oraha. Ahwo jọ a wo eme buobu nọ a rekọdo, te enọ a kẹ ikpe buobu nọ e vrẹ, yọ avọ emamọ ẹjiroro, a rẹ rehọ ae kẹ amọfa re a kporo, hayo wariẹ rekọdo rai kẹ egbẹnyusu. Amọfa a wo Evie-Evuẹ Itanẹte kẹ omobọ rai nọ a re fi eme nọ a rekọdo fihọ, re ohwo nọ u je ọ kọpi rehọ.

Orọnikọ o thọ họ re ma rekọdo eme kẹ oma mai hayo uviuwou mai. Ofariẹ, ekpako ukoko a rẹ sai ru ọruẹrẹfihotọ nọ a rẹ rọ rekọdo eme kẹ ahwo ukoko rai nọ oma o ga tere he nọ a rẹ sae ziọ ewuhrẹ hẹ. Rekọ igogo ẹjiroro jọ e riẹ nọ u ro fo ho re ma ghale eme nọ ma rekọdo hayo kere fihọ otọ kẹ amọfa.

Nọ orọnọ ẹsibuobu enọ i re ruẹme a rẹ t’ẹme kpahe ẹgwọlọ ahwo nọ a be t’ẹme na kẹ na, ma rẹ sai wo otoriẹ othọthọ no eme nọ a rekọdo ze fikinọ ma riẹ oware nọ a rọ t’ẹme jọ họ. Ofariẹ, o rẹ sae jọ bẹbẹ re ma riẹ ọnọ ọ kẹ ovuẹ na gbe oke nọ ọ rọ kẹe, onọ u re fi obọ họ k’omai fi eva họ nnọ eme nọ ọ ta na e rọwokugbe otoriẹ mai enẹna jẹ rrọ gbagba. (Luk 1:1-4) Fibae, eme nọ a kere fihọ otọ hayo rekọdo nọ a rẹ ghale kẹ amọfa o rẹ sae lẹliẹ ahwo rọ adhẹẹ nọ o fo ho kẹ oruẹme na, jẹ lẹliẹe fu uke.—1 Kọr. 3:5-7.

Ọrigbo nọ o wo ẹrọwọ avọ areghẹ na ọ be daoma gaga re ọ rehọ emu abọ-ẹzi buobu k’omai evaọ ẹruoke. (Luk 12:42) Onana u kugbe eme nọ a re ru evaọ iwuhrẹ ukoko, ikporakporo ebe gbe edrama nọ ohwo ọ rẹ sae rehọ no Evie-Evuẹ jw.org ze. U mu omai ẹro nnọ ọrigbo nọ o wo ẹrọwọ avọ areghẹ na avọ Ugboma Esuo riẹ a te gbẹ k’omai evuẹ nọ i ti fi obọ họ k’omai dikihẹ gaga evaọ orọwọ na.—Iruẹru 16:4, 5.