Ọghẹnẹ O Zizie Owhẹ Re Whọ Jọ Ogbẹnyusu Riẹ

Ọghẹnẹ ọ gwọlọ nọ whọ jọ ogbẹnyusu riẹ. Kọ who roro no ẹdẹjọ inọ whọ rẹ sae jọ ogbẹnyusu Ohwo nọ ọ mae rro evaọ ehrugbakpọ na? A se Abraham, ọnọ ọ rria evaọ oke thethei nọ u kpemu no, ogbẹnyusu Ọghẹnẹ. (Jemis 2:23) Amọfa nọ a t’ẹme kpahe evaọ Ebaibol na a reawere usu kugbe Ọghẹnẹ re, yọ a ghale rai gaga. Nẹnẹ na, ahwo nọ a no abọ otọakpọ na kpobi ze a zihe ruọ egbẹnyusu Ọghẹnẹ no. Whọ rẹ sae jọ ogbẹnyusu Ọghẹnẹ re.

Re a jọ ogbẹnyusu Ọghẹnẹ u woma vi ogbẹnyusu ohwo-akpọ nọ a rẹ jọ. Ọghẹnẹ ọ rẹ siọ egbẹnyusu riẹ ba erugba kẹ hẹ. (Olezi 18:25) Re a jọ ogbẹnyusu Ọghẹnẹ u woma vi efe nọ a re wo. Okenọ ọdafe o te whu, igho riẹ e rẹ nya bru amọfa. Rekọ, enọ e be reawere usu kugbe Ọghẹnẹ a wo efe nọ uvumọ ohwo ọ rẹ sae rehọ mi ai hi.​—Matiu 6:19.

Ahwo jọ a rẹ sae daoma whaha owhẹ ewuhrẹ kpahe Ọghẹnẹ. Makọ egbẹnyusu gbe ahwo uviuwou ra jọ dede a rẹ sai ru onana. (Matiu 10:36, 37) Otẹrọnọ amọfa a be hwẹ owhẹ hayo guegue owhẹ, nọ omobọ ra nọ, ‘Ono mẹ gwọlọ ru eva were—ahwo-akpọ manikọ Ọghẹnẹ?’ Roro kpahe onana: Otẹrọnọ ohwo jọ ọ ta k’owhẹ nọ whọ se emu ba ẹriọ, who re yoẹme riẹ? Vievie! Whọ gwọlọ emu re whọ jọ uzuazọ. Rekọ Ọghẹnẹ ọ rẹ sai ru owhẹ rria uzuazọ bẹdẹ bẹdẹ! Fikiere whọ kuvẹ re ohwo jọ ọ whaha owhẹ ewuhrẹ kpahe epanọ whọ sae rọ jọ ogbẹnyusu Ọghẹnẹ hẹ.​—Jọn 17:3.