Yọroma Okenọ Whọ tẹ Rrọ Usiuwoma
1. Fikieme ma rẹ rọ yọroma nọ ma tẹ rrọ usiuwoma?
1 ‘Wọhọ igodẹ evaọ udevie erao-imuomu,’ idibo Ọghẹnẹ a be ta usiuwoma “eva evie oge ọbẹbẹ nọ ọ rẹ barosa ru iyoma.” (Mat. 10:16; Fil. 2:15) Ẹsikpobi ma bi yo kpahe ahwo nọ e be họre egọmeti, otu ugbarugba, gbe enọ i re mu ahwo rehọ fiki igho, nọ u dhesẹ inọ ahwo muomu a bi gine “no eyoma ruọ onọ o mai yoma.” (2 Tim. 3:13) Unuovẹvẹ Ebaibol vẹ o rẹ sai fi obọ họ kẹ omai yọroma?—Mat. 10:16.
2. Eware vẹ e rẹ sae whae ze nọ u je fo re who no oria jọ kpohọ obọfa nyae ta usiuwoma?
2 Wareghẹ t’oma: Itẹ 22:3 u dhesẹ oware nọ u je fo re ma “siomano” nọ ma te ruẹ ese. Fikiere, muẹrohotọ gaga! Oware uyoma o rẹ sae via idudhe makọ evaọ oria nọ ozọ o rrọ anwẹdẹ hẹ. Whọ sae ruẹ iporisi nọ e dhẹ ze, hayo ahwo nọ a be dhẹ kokohọ evaọ iyẹrẹ na. Ẹsejọ ohwo nọ whọ be ta usiuwoma kẹ ọ sae vuẹ owhẹ oghẹrẹ nọ okegbe yena ọ rrọ. Ukpenọ whọ rẹ jọ etẹe nya rẹghẹ rẹghẹ re whọ riẹ oware nọ o be via na, orọ oware areghẹ re who no etẹe vẹrẹ kpohọ obọfa.—Itẹ 17:14; Jọn 8:59; 1 Tẹs. 4:11.
3. Ẹvẹ Ọtausiuwoma Na 4:9 u ro w’obọ kpahe usiuwoma ota mai?
3 Whẹ Ọvo Whọ Jọ Usu Hu: “Imava i woma vi omọvo” ere Ọtausiuwoma Na 4:9 ọ ta. Dede nọ whẹ ọvo ọ be hai kpohọ usiuwoma anwẹdẹ ababọ ozọ, kọ o gbẹ rrọ ere enẹna? Evaọ eria jọ o gbẹ f’oma. Rekọ evaọ eria efa u gbe fo ho re oniọvo-ọmọtẹ hayo owhowho-uvie ọmaha ọvo ọ ta usiuwoma n’uwou ruọ uwou, maero nọ oke u te bi siaro họ no. Eware nọ e via no i dhesẹ inọ oniọvo ọfa nọ wha gbẹ rrọ usu ọ sae kake kparo ruẹ okpẹtu. (Ọtausi. 4:10, 12) Hai muẹrohọ eware nọ e be via, jẹ vuẹ inievo nọ wha gbẹ rrọ usu nọ whọ tẹ ruẹ oware uyoma. Ẹsikpobi nọ who te bi no ẹkwotọ nọ wha bi ru na, vuẹ inievo efa.
4. Ẹvẹ ma sae rọ yọroma jẹ sẹro ohwohwo nọ ma te kpohọ usiuwoma?
4 Nọ orọnọ ekpako na a ‘be sẹro mai’ na, a rẹ sae kẹ omai ithubro kpahe epanọ ma rẹ rọ yọroma nọ ma tẹ be ta usiuwoma evaọ ẹkwotọ mai. (Hib. 13:17) Jihova ọ te ghale omai otẹrọnọ ma yoẹme kẹ ae. (Mae. 6:8; 1 Kọr. 10:12) Jọ mai kpobi ma roma kẹ iruo usiuwoma ota na ziezi, rekọ avọ oma nọ ma rẹ yọrọ ẹsikpobi.