Fi Ẹbẹbẹ Obọ rọ Whrawhra Ẹba Omobọ Ohwo Kparobọ

Uruemu ọ obọ orọ whrawhra ẹba omobọ ohwo o rẹ dha Ọghẹnẹ eva, o rẹ lẹliẹ ohwo roro kpahe omobọ riẹ ọvo, yọ u re gbe iroro na ku.a Ohwo nọ o wo uruemu nana ọ rẹ sai je mu amọfa họ erri wọhọ enọ a re lele wezẹ gheghe ro furie isiuru owezẹ. Ohwo otiọye na o re gbe rri owezẹ ezae-avọ-eyae wọhọ oware nọ o rẹ jọ udevie imava nọ i you ohwohwo ho rekọ ọ rẹ rehọ iẹe wọhọ oware nọ ọ rẹ rọ kpairoro nọ isiuru na e tẹ whẹ ze. Rekọ, ọ rẹ sai furie isiuru na okioke yena ọvo. Obọ nọ a rẹ rọ whrawhra oma o rẹ kpare isiuru owezẹ ezae-avọ-eyae, ukpenọ u re fi obọ họ kẹ ohwo whaha isiuru ọ “igberedia, egbegbe, [gbe] urusio nọ o rẹ vrẹ ẹta.”—Ahwo Kọlọsi 3:5.

Pọl ukọ na o kere nọ: “Imoni iyoyou, . . . wha jọ oma ru oma mai fo uno eware nọ i re zue oma gbe ẹzi, re ma ru oma mai, ọrẹri kiete eva ozodhẹ Ọghẹnẹ.” (2 Ahwo Kọrint 7:1) Otẹrọnọ o re bẹbẹ k’owhẹ re who lele ohrẹ nana, whọ nwane ta nọ ora u re no ho. Jihova o re fi obọ họ ẹsikpobi ọ tẹ jẹ vọ avọ “erọvrẹ.” (Olezi 86:5; Luk 11:9-13) Evaọ uzẹme, udu nọ u bi bru kpe owhẹ fiki uruemu nana gbe oma nọ whọ be dawo re who si obọ noi, dede nọ o rẹ v’owhẹ abọ ẹsejọ, u dhesẹ nọ who wo emamọ uruemu. Kareghẹhọ re inọ “Ọghẹnẹ ọ ro vi eva mai, ọ tẹ jẹ riẹ oware kpobi.” (1 Jọn 3:20) Orọnikọ izieraha mai Ọghẹnẹ ọ be tẹrovi hi rekọ oghẹrẹ ohwo nọ ma rrọ. Fikinọ ọ be tẹrovi izieraha mai hi, ọ rẹ kezọ okenọ ma tẹ be lẹ nọ ọ reohrọ mai. Fikiere olẹ nọ whọ rẹ lẹ no udu ze se Ọghẹnẹ avọ omaurokpotọ o b’owhẹ hẹ, wọhọ epanọ ọmọ o re bo se ọsẹ riẹ nọ ọ tẹ rrọ uye na. Jihova ọ te kẹ owhẹ obroziẹ-iroro ọfuafo. (Olezi 51:1-12, 17; Aizaya 1:18) Whọ be lẹ na, who re ru oware nọ whọ sae rọ siọ uruemu na ba. Wọhọ oriruo, whọ rẹ daoma whaha oghẹrẹ ifoto ẹbẹba kpobi gbe ekpehre usu.b

Otẹrọnọ whọ be sai si obọ no uruemu ọ obọ orọ whrawhra ẹba omobọ ra ha, ivie ta ẹme na kẹ ọsẹ hayo oni ra nọ ọ rrọ Oleleikristi hayo ogbẹnyusu ra jọ nọ ọ kpako ziezi evaọ abọ-ẹzi.c—Itẹ 1:8, 9; 1 Ahwo Tẹsalonika 5:14; Taitọs 2:3-5.

[Oruvẹ-obotọ]