Ekpọvio Kẹ Esẹro Isukulu
EVAỌ ukoko kpobi, a rẹ rehọ ọkpako jọ mu re ọ jọ ọsẹro Isukulu Odibọgba Esuo-Ọghẹnẹ na. Otẹrọnọ a k’owhẹ owha-iruo onana, ọwhọ ra kẹ isukulu na gbe isiuru ra kẹ ẹnyaharo ọmọ-isukulu ọvuọvo o re fiobọhọ gaga evaọ oware nọ isukulu na i re ru evaọ ukoko rai.
Abọ ologbo ọrọ iruo ra họ re whọ rẹrote Isukulu Odibọgba Esuo-Ọghẹnẹ ẹkpoka na evaọ ukoko ra. Kareghẹhọ nọ fiba emọ-isukulu nọ i wo eme evaọ ẹdẹ na, amọfa a rrọ ogbotu na. Ru isukulu na evaọ edhere nọ ọ rẹ kẹ ukoko na soso emamọ ekareghẹhọ nọ i kie kpahe ẹjiroro isukulu na jọ nọ a fodẹ evaọ ẹwẹ-obe avọ 5 rite 8 ọrọ obe-uwuhrẹ onana.
Wo isiuru kpahe emọ-isukulu na kpobi makọ a kẹ rae ẹme isase, ẹme nọ ọ gwọlọ odhesẹvia, hayo ẹme nọ a rẹ ta ovavo. Fiobọhọ kẹ ae re a rri oware nọ a bi ru na, orọnikọ wọhọ ẹme gheghe he, rekọ wọhọ uvẹ nọ a re ro ru ẹnyaharo evaọ egagọ rai kẹ Jihova. Uzẹme, omodawọ nọ a re ru k’omobọ rai yọ abọ ologbo jọ evaọ ẹnyaharo rai. Rekọ u wuzou re who dhesẹ uvi isiuru kpahe ai re, fiobọhọ kẹ ae wo otoriẹ erere oria uthubro nọ a re jo rri ohwo na, je dhesẹ epanọ a re ro fi ohrẹ na h’iruo. Fiki ẹjiroro ọyena, gaviezọ kẹ ẹme ọvuọvo ziezi re whọ sae ta eware nọ who muẹrohọ nọ e rẹ kẹ erere vevẹ.
Ruẹ nọ who mu isukulu na họ je ku ei họ evaọ ẹruoke. Dhesẹ emamọ oriruo ẹkwoma eme ọkpahefihọ ra nọ whọ rẹ ta evaọ umuo oke nọ a fihọ na. Otẹrọnọ a riọ oke evaọ ẹme ọmọ-isukulu jọ, whẹ hayo ethabọ ra o re kporo ẹgogo. Ọmọ-isukulu na ọ rẹ t’ẹme nọ ọ rọ unu riẹ na no o ve nwrotọ no eplatfọmo na. Otẹrọnọ a riọ oke evaọ abọfa eme ọruẹrẹfihotọ na, u te no eme ọmọ-isukulu na no, dina bru eme ọkpahefihọ ra kpẹre, whọ vẹ rọ ẹme na lele oniọvo na t’ẹme evaọ okenọ ewuhrẹ na ọ tẹ fa no.
Whọ tẹ rọ ewuhrẹ na, whẹ ọ rẹ rẹrote isukulu na. Otẹrọnọ who kperẹ, ọkpako ọfa nọ ugboma ekpako na a ro mu no vẹre o re ru isukulu na. Whọ tẹ gwọlọ obufihọ evaọ ẹruẹrẹ omaa na, ekere gbe ẹghale ebe ẹme, hayo ohwo nọ a re ro nwene ohwo jọ evaọ omaa na, odibo oruiruo nọ ugboma ekpako na a ro mu ọ sai fiobọhọ evaọ abọ nana.
Ekerefihotọ Odẹ Emọ-Isukulu. Tuduhọ iwhowho-uvie kpobi awọ re a kere odẹ fihotọ evaọ isukulu na. Amọfa nọ a be ziọ ewuhrẹ ziezi a rẹ sai kere odẹ fihotọ otẹrọnọ a rọwo kugbe iwuhrẹ Ebaibol na yọ uzuazọ rai o rọwo kugbe ehri-izi Ileleikristi. Ohwo o te dhesẹ isiuru nnọ ọ gwọlọ kere odẹ fihotọ, jiri iei ziezi. Otẹrọnọ ohwo na o ri te owhowho-uvie he, whẹ wọhọ ọsẹro isukulu na whọ sai lele iei t’ẹme kpahe itee nọ a re ro kere odẹ fihotọ evaọ isukulu na, o rẹ mai woma otẹrọnọ who ru ere evaọ iraro ọnọ o bi ru obe uwuhrẹ Ebaibol kugbei (hayo evaọ iraro ọsẹ hayo oni riẹ nọ ọ rrọ ukoko na). Itee evo nana e rọ kẹ ohwo nọ ọ gwọlọ jọ owhowho-uvie nọ ọ te họ-ame he. E rọ ẹwẹ-obe avọ 97 rite 99 ọrọ obe ọ Organized to Accomplish Our Ministry na. Jọ edẹ ahwo kpobi nọ a kere odẹ fihotọ kẹ isukulu na e jọ owhẹ obọ.
Eroruiruo Efọmo Uthubro Na. Efọmo uthubro kẹ ọmọ-isukulu ọvuọvo ọ rọ eva obe-uwuhrẹ riẹ, evaọ ẹwẹ-obe avọ 79 rite 81. Wọhọ epanọ ekọlọ nọ a kpe fihọ eria na i dhesẹ na, a sae rehọ oria uthubro jọ no ọrọ 1 rite ọrọ avọ 17 na ro ruiruo nọ ọmọ-isukulu o te wo ẹme isase. Rọkẹ eme nọ e whoma họ idhesẹvia, a sae rehọ oria uthubro kpobi ruiruo ajokpa ọrọ avọ 7, 52, gbe ọrọ avọ 53. Evaọ ẹmeọta edikihẹ edekọ na a rẹ rehọ eria uthubro na kpobi ro ruiruo ajokpa ọrọ avọ 7, 18, gbe ọrọ avọ 30.
A tẹ kẹ ohwo oria uthubro jọ nọ o ru, ọsẹro isukulu na ọ rẹ ruẹ nọ o kpoka họ aro oria uthubro na evaọ otọ “Ẹdẹ nọ Who Mu Rie Họ” evaọ efọmo uthubro nọ o rrọ obe ọmọ-isukulu na. Ọmọ-isukulu na o te ru ẹme riẹ no, jọ obọ emu nọe sọ o ru oria iruo nọ a dhesẹ evaọ ekuhọ oria uthubro na. Otẹrọnọ o ru rie, who ve kpe oka họ ẹkpẹti nọ ọ rrọ efọmo na. Otẹrọnọ whọ ta kẹe nọ ọ gbẹ daoma fihọ oria uthubro ovona, who re du kere eme efa fihọ efọmo uthubro na ha; oware nọ who re ru kpobi họ who kere uvumọ ẹme fihọ oria ọ “Ẹdẹ nọ Who Ku Rie Họ” na ha. Okenọ o bi ti kpohọ oria uthubro ofa ọvo a je kpoka họ etẹe na. Fibae, evaọ ẹwẹ-obe avọ 82 evaọ obe ọmọ-isukulu na, evaọ ẹkpẹlobọ oria oghẹrẹ ẹkeria-ẹmeọta nọ o ro ruiruo na, a re kere ẹdẹ kpobi nọ ọmọ-isukulu na ọ rọ rehọ iẹe ru ẹme fihọ iẹe. Uvẹ o rrọ efọmo uthubro na gbe evaọ oria oghẹrẹ ẹkeria-ẹmeọta na nọ a sae rọ rehọ oria ovuovo ruiruo isiava. Ebe emọ-isukulu na e rẹ jarae obọ evaọ okenọ a bi ru ewuhrẹ na.
Kẹ oria uthubro ovo evaọ okiovo. Wọhọ epanọ u re fo, o rẹ mai woma re a nya lele eria uthubro na othotha wọhọ epanọ e rrọ obe na. Rekọ, otẹrọnọ emọ-isukulu jọ i bi ru ẹnyaharo gaga, whọ sae tuduhọ ae awọ re ae ọvo a wuhrẹ je fi eria uwuhrẹ jọ h’iruo kẹ omobọ rai. Who ve fiobọhọ kẹ ae evaọ eria nọ whọ ruẹ nọ i ti fiba ẹnyaharo rai wọhọ uvi iruẹme gbe iwuhrẹ.
Ọmọ-isukulu ọ tẹ make rrọ isukulu na ikpe buobu no, ọ sai wo erere gaga ẹkwoma ewuhrẹ gbe efihiruo oria uwuhrẹ ovuovo. Re who fiobọhọ kẹ emọ-isukulu nọ i wo ugogo ẹgwọlọ jọ, whọ sae salọ ekwakwa ẹmeọta jọ re a ro ruiruo ukpenọ whọ rẹ nwane nya lele ai othotha epanọ a kere i rai na.
Ẹkẹ Uthubro. Whọ tẹ be kẹ uthubro, rọ iriruo gbe ehri-izi Ebaibol ruiruo ziezi. U re woma re emọ-isukulu e ruẹ nọ ohrẹ nọ a be kẹ ae gbe oghẹrẹ nọ a rọ kẹe o rọwo kugbe ehri-izi ikpehru Ẹme Ọghẹnẹ.
Kareghẹhọ nọ whẹ yọ ‘ibe oruiruo’ inievo ra. (2 Kọr. 1:24) Wọhọ inievo ra, u fo re whọ gbẹ hae daoma ru ẹnyaharo wọhọ oruẹme gbe owuhrẹ re. Roma totọ wuhrẹ obe ọ Wo Erere no Ewuhrẹ ọ Isukulu Odibọgba Esuo-Ọghẹnẹ Ze na, fi uthubro nọ e riẹ h’iruo, je fi emamọ oriruo h’otọ kẹ amọfa re a ru epọvo na re.
Nọ who bi ru ere na, ru ei fihọ ute ra re who fiobọhọ kẹ emọ-isukulu na re a te wọhọ emamọ isisase, uvi iruẹme, gbe iwuhrẹ nọ i wo ona. Re a sai le ute oyena t’obọ, daoma kẹ obufihọ nọ o gwọlọ kpobi re emọ-isukulu na a wo otoriẹ oware nọ ekwakwa ẹmeọta na kpobi e rrọ, oware nọ enana i je wuzou, gbe epanọ a re ro wo ai t’obọ. A ruẹrẹ obe-uwuhrẹ onana họ evaọ edhere nọ o re fiobọhọ k’owhẹ ru ere. Ghele na, o gwọlọ vi eme obe na nọ who re se ọvo. Dhesẹ oware nọ eme ọ obe na e be ta vevẹ je dhesẹ epanọ a re ro fi ai họ iruo.
Ọmọ-isukulu ọ tẹ riẹ ru evaọ oria uthubro jọ, jiri iei. Ta kpẹkpẹe kpahe oware nọ o lẹliẹ ẹme na woma hayo oware nọ o soriẹ nọ oware nọ o ru na o jẹ r’oja. Otẹrọnọ o te kẹe erere re ọ rẹriẹ ovao ku ofẹ ẹme jọ viere, jọ u mu owhẹ ẹro nọ ọ riẹ oware nọ o soriẹ ze. Ta oghẹrẹ nọ o re ro ru ei. Dhunu te ẹme na gbiae, evaọ oke ovona, ta ẹme na avọ ẹwo.
Vuhumu nọ o rrọ bẹbẹ gaga kẹ ibuobu re a dikihẹ aro ogbotu t’ẹme. Ohwo ọ tẹ jọ oma riẹ riẹ nọ ọ riẹ ru hu, ọ sai roro sọ ọ rẹ gbẹ daoma oke ofa. Raro kele Jesu, ọnọ o wiri “ukpoko nọ u wiri rẹrẹ hẹ” hayo “furie oviohọ-ukpẹ nọ ubi kuye iwiri hi.” (Mat. 12:20) Roro kpahe oghẹrẹ nọ oma o rẹ jọ ọmọ-isukulu na evaọ iroro. Whọ tẹ be kẹ ohrẹ, roro sọ ọmọ-isukulu na ohwo ọkpokpọ hayo owhowho-uvie nọ o kri no. Uvi ajiri ọruọruọ o rẹ sae kẹ ahwo ẹgba re a daoma viere.
T’ẹme kẹ ọmọ-isukulu kpobi avọ adhẹẹ. Ahwo Rom 12:10 o ta k’omai nọ: “Whai ohwo ọ kẹ ohwo adhẹẹ.” Ẹvẹ ohrẹ nana u fo te kẹ ekohrẹ evaọ Isukulu Odibọgba Esuo-Ọghẹnẹ na! Otẹrọnọ ọmọ-isukulu na ọ kpako vi owhẹ, romatotọ fi ọkpọvio nọ a kẹ evaọ 1 Timoti 5:1, 2 na h’iruo. Rekọ, makọ unu ikpe nọ ohwo ọ rrọ kẹhẹ, nọ whọ tẹ rehọ edhere ẹwo rọ kẹe ohrẹ nọ u kpomahọ inwene evaọ edhere nọ o re ru eware, ohwo na ọ rẹ jẹ ohrẹ na rehọ vẹrẹ viere.—Itẹ 25:11.
Whọ tẹ be k’ohrẹ, dhesẹ ẹjiroro ewuhrẹ na vevẹ kẹ ọmọ-isukulu na. Orọnikọ ẹjiroro na họ re a riẹ ru re a ruẹsi jiri ohwo jẹ ta k’ohwo nọ o kpohọ oria uthubro ofa ọvo ho. Orọnikọ re ohwo ọ jọ oruẹme gbe owuhrẹ nọ amọfa a rẹ kpaobọ kẹ hẹ. (Itẹ 25:27) Isiuru mai họ re ma rehọ okẹ ẹmeọta mai jiri Jihova je fiobọhọ kẹ amọfa riẹe je you riei. Ẹjiroro ewuhrẹ mai họ re o thomai kpahe re ma ru iruo nọ a dhesẹ evaọ Matiu 24:14 gbe 28:19, 20 na ziezi. Oke o be nya na, a sai zizie inievo-emezae nọ e họ-ame no nọ i te re a rẹrote “uthuru Ọghẹnẹ” wọhọ iruẹme gbe iwuhrẹ ogbotu.—1 Pita 5:2, 3.
Jiroro kẹ emọ-isukulu na re a jọ obe-uwuhrẹ na se oria nọ o t’ẹme kpahe oria uthubro ofa nọ a ti ruiruo kpahe na nọ a tẹ nwane rehọ iẹe kẹ ae no. Tuduhọ ae awọ re a fi eware nọ a bi wuhrẹ na h’iruo evaọ ẹruẹrẹ eme rai evaọ isukulu na, evaọ ẹmeọta ekẹdẹ kẹdẹ, evaọ ẹme ọkpahefihọ eva iwuhrẹ, gbe evaọ usiuwoma ota.
Ẹghale Eme. O tẹ kawo whọ rẹ ghale eme na eka esa tuare oke rai u te te. O tẹ lọhọ, who re kere eme na fihọ obe kẹ ahwo na.
A rẹ rehọ eme nọ e gwọlọ uwuhrẹ orọkẹ ukoko na kẹ ekpako, o rẹ mai woma re a rehọ ae kẹ enọ e riẹ eme itieye eru ziezi, gbe idibo iruiruo nọ e rọ emamọ iwuhrẹ.
Re whọ riẹ eme nọ whọ rẹ rọ kẹ inievo-emezae gbe enọ whọ rẹ rọ kẹ inievo-emetẹ, lele uthubro nọ o rọ omaa isukulu na. Otẹrọnọ inievo-emezae nọ i re ru eme ọmọ-isukulu i bu te inievo-emetẹ hẹ, ruẹ nọ whọ kẹ inievo-emezae na uvẹ nọ a re ro ru eme efa u te no ọrọ isase no.
Roro kpahe iyero omomọvo evaọ okenọ whọ tẹ be ghale eme. Kọ u fo re a kẹ ọkpako hayo odibo oriruo jọ ẹme evaọ isukulu na evaọ ẹdẹ ọvona nọ o wo ẹme evaọ Ewuhrẹ Odibọgba na hayo otẹrọnọ ọ jọ ukoko na wo ovuẹ ogbotu evaọ oka ovona? Kọ u fo re a kẹ oniọvo-ọmọtẹ jọ ẹme kpakiyọ ọmọ riẹ jọ nọ ọ rẹ sai fiobọhọ kẹ o wo ẹme evaọ ẹdẹ ọvona? Kọ uzoẹme na u fo kẹ ọmaha na hayo ọmọ-uwuhrẹ Ebaibol nọ ọ te họ-ame he? Kiẹ re u mu owhẹ ẹro nọ ẹme na o kiehọ oria uthubro nọ ọmọ-isukulu na o bi jo ruiruo na.
Rọkẹ eme nọ a ghale kẹ inievo-emetẹ, ọmọ-isukulu na ọ rẹ salọ oghẹrẹ ẹkeria-ẹmeọta riẹ rọwo kugbe ekpọvio nọ e rọ ẹwẹ-obe avọ 78 gbe ọrọ avọ 82 na. A rẹ rehọ ethabọ jọ kẹ ọnọ o wo ẹme na, rekọ ọ rẹ sae salọ ọrọ avivẹ. Otẹrọnọ ọmọ-isukulu ọ yare ethabọ jọ nọ ọ te mai fo oghẹrẹ ẹkeria-ẹmeọta jọ, whọ rẹ sae rọwo kẹe.
Eklase Avivẹ. Otẹrọnọ emọ-isukulu nọ i kere odẹ fihotọ a bu vi 50, whọ sai roro kpahe oria ofa nọ a re jo ru eme emọ-isukulu na. Wọhọ epanọ ẹgwọlọ rai ọ rrọ, a rẹ sae jọ obei ru eme ọmọ-isukulu na kpobi hayo ivẹ urere na ọvo.
Eklase avivẹ kpobi o re wo ọkohrẹ nọ o te ziezi, o tẹ lọhọ ọ rẹ jọ ọkpako. Oria nọ o jọ gwọlọ ere, odibo oruiruo nọ o te ziezi ọ sai ru ei. Ugboma ekpako na u re kuenu kẹ ekohrẹ nana. Lele ekohrẹ na ruiruo ziezi re whọ riẹ oria nọ emọ-isukulu na i ti jo ru ẹnyaharo makọ eklase nọ a ti jo ru ẹme rai n’otha.
Obọdẹ Eklase Isase. Otẹrọnọ ugboma ekpako na a jiroro nọ ahwo jọ evaọ ukoko na a gwọlọ obufihọ evaọ isase ọrọ ẹvẹrẹ nọ a be jọ ukoko na ta, whọ sai ru ọruẹrẹfihotọ kẹ onana lele Isukulu Odibọgba Esuo-Ọghẹnẹ na. Obufihọ nana o sae gwọlọ ona ọriẹse-gbe-ekere, hayo ẹjiroro riẹ o sae jọ ẹnyaharo evaọ isase.
U du fo ho re a ru eklase itieye na evaọ okenọ a te bi ru eme ọmọ-isukulu evaọ Isukulu Odibọgba Esuo-Ọghẹnẹ na. Re whọ sai fiobọhọ ziezi, o sae gwọlọ bu vi oke isukulu na ọvo. Ekpako ukoko na a sae ta oware nọ wha gwọlọ gbe okenọ a rẹ rọ kẹ obufihọ utioye na. Wọhọ epanọ ẹgwọlọ na ọ rrọ, a rẹ sai ru ọruẹrẹfihọ re a koko ahwo na kpobi họ wuhrẹ hayo re a wuhrẹ omomọvo.
O gwọlọ owuhrẹ nọ o te ziezi. O rẹ mai woma otẹrọnọ a rehọ iruo na kẹ oniọvo nọ o re se ziezi gbe ọnọ ọ riẹ ẹvẹrẹ na. Otẹrọnọ oniọvo-ọmọzae ọ riẹ hẹ, ekpako na e sae ta kẹ oniọvo-ọmọtẹ oriruo nọ o te ziezi re o fiobọhọ. Ọ rẹ fare uzou nọ o te bi wuhrẹ eklase na.—1 Kọr. 11:3-10; 1 Tim. 2:11, 12.
A fa omobe na Apply Yourself to Reading and Writing fihọ evẹrẹ buobu no. Evaọ Nigeria, a kporo ibroshọ Learn to Read and Write na evaọ Oyibo. A ruẹrẹ ebe enana họ re i wuhrẹ ahwo ọriẹse. A sae rehọ ebe efa ru ewuhrẹ na, wọhọ epanọ ẹgba isase enọ i kere odẹ fihotọ na o rrọ. Emọ-isukulu na e tẹ nyaharo ziezi no, a rẹ tuduhọ ae awọ re a w’obọ evaọ ọruẹrẹfihotọ Isukulu Odibọgba Esuo-Ọghẹnẹ na ẹsikpobi.
Wọhọ ọsẹro Isukulu Odibọgba Esuo-Ọghẹnẹ na, whọ sai ru eware buobu ro fiobọhọ kẹ ukoko na. Ruẹrẹ oma kpahe ziezi, yọ rọwokugbe ohrẹ nọ o rọ Ahwo Rom 12:6-8 na, rẹrote iruo ra wọhọ oware nọ Ọghẹnẹ o mu h‘owhẹ obọ.