Rehọ Ibroshọ Emamọ Usi na Wuhrẹ Ahwo
1. Oghẹrẹ vẹ a ru ibroshọ Emamọ Usi na?
1 Wọhọ epanọ ma jọ Odibọgba Uvie Mai ọrọ amara Ahrẹ ta, okwakwa ọvo jọ nọ o mai wuzou evaọ etehe iruo mai họ ibroshọ Emamọ Usi nọ U No Obọ Ọghẹnẹ Ze! na. Re u fiobọhọ kẹ ohwo wuhrẹ no Ebaibol na ze ovavo, a kere eme eria Ebaibol nọ a fodẹ evaọ ibroshọ na lahwe he. Dede nọ a ru ebe mai buobu nọ ma re ro wuhrẹ ahwo evaọ oghẹrẹ nọ ohwo ọ sai ro wo otoriẹ rai ababọ obufihọ, a ru ibroshọ nana evaọ oghẹrẹ nọ a rẹ rọ rehọ iẹe wuhrẹ amọfa. Fikiere, nọ ma tẹ be rehọ iẹe kẹ ohwo, ma rẹ daoma re ma dhesẹ oghẹrẹ nọ ma re ru uwuhrẹ Ebaibol kẹe, re ọ ruẹ epanọ ọ sai ro wuhrẹ kpahe emamọ usi nọ o rrọ Ebaibol na.—Mat. 13:44.
2. Ẹvẹ ma sae rọ rehọ ibroshọ Emamọ Usi na wuhrẹ ahwo evaọ ẹdẹ ọsosuọ nọ ma be rọ ta usiuwoma kẹ ae?
2 Ẹdẹ Ọsosuọ nọ Whọ be rọ Ta Usiuwoma Kẹ Ohwo: Whọ sae ta nọ: “Ma muẹrohọ nọ ahwo buobu a be ruawa oghẹrẹ nọ eware e te jọ evaọ obaro. Kọ who roro nọ eware i ti woma ẹdẹjọ? [Kuvẹ kẹ uyo.] Emamọ usi jọ o rrọ Ebaibol na nọ o rẹ kẹ omai ẹruore. Rri enọ jọ nọ Ebaibol na ọ kẹ iyo rai.” Whọ vẹ rehọ ibroshọ na kẹ ohwo na, jẹ ta kẹe re ọ jọ usu enọ nọ e rrọ emu obe na salọ ọvo jọ. Kẹsena whọ vẹ rehọ edhe-ẹme ọsosuọ onọ nọ ọ salọ na dhesẹ epanọ a rẹ ru uwuhrẹ Ebaibol kẹe. Edhere ọfa họ, whọ rẹ nọ ohwo na onọ jọ nọ whẹ ọvo whọ salọ evaọ ibroshọ na, who ve dhesẹ oghẹrẹ nọ ibroshọ na o sai ro fiobọhọ kẹe ruẹ uyo nọ Ebaibol ọ kẹ. Otẹrọnọ onọ na u wo ividio evaọ jw.org, iwhowho-uvie jọ a re kporo iei kẹ ohwo na.
3. Dhesẹ oghẹrẹ nọ a rẹ rehọ ibroshọ Emamọ Usi na wuhrẹ ohwo.
3 Epanọ A re Ru Uwuhrẹ Na: (1) Se onọ nọ a kere mu gbalọ na kẹ ohwo na re ọ sae kareghẹhọ iẹe. (2) Se edhe-ẹme na. (3) Se oria Ikereakere nọ a kere jẹlẹ na, jẹ rọ onaa nọ enọ nọ i re fiobọhọ kẹ ohwo na ruẹ epanọ ikere na e rrọ kẹ uyo onọ nọ a kere mu gbalọ na. (4) Otẹrọnọ onọ na u wo idhe-eme ivẹ, wariẹ ru orọ avọ 2 gbe 3 na. Otẹrọnọ ma wo ividio nọ o kẹ uyo onọ na, yọ who ri kporo iei kẹ ohwo na ha, kporo iei kẹe. (5) Kẹsena, whọ vẹ nọ ohwo na onọ nọ a kere mu gbalọ na re whọ riẹ sọ o wo otoriẹ uwuhrẹ na.
4. Eme o ti fiobọhọ kẹ omai rọ okwakwa obọdẹ nana wuhrẹ ahwo avọ onaa?
4 Riẹ epanọ a rẹ rehọ okwakwa obọdẹ nana ruiruo ziezi. Rọ uvẹ kpobi rehọ iẹe wuhrẹ ahwo. Taure who te ti wuhrẹ ohwo, roro kpahe ọmọ-uwuhrẹ na, gbe oghẹrẹ nọ whọ te rọ rehọ ikere nọ e rrọ oria nọ wha ti wuhrẹ na fiobọhọ kẹe. (Itẹ 15:28; Iruẹru 17:2, 3) Whọ tẹ be rehọ ibroshọ nana wuhrẹ ahwo kẹse kẹse, who ti wo onaa ziezi, ibroshọ nana ọ vẹ te jọ usu ebe nọ e mae were owhẹ nọ who re ro wuhrẹ ahwo uzẹme na!