ENỌ NỌ EBAIBOL Ọ KẸ IYO RAI
Kọ ahwo nọ a whu no a wo ẹruore jọ?
Uwhu o wọhọ owezẹ, ahwo nọ a whu no a riẹ oware ovo ho, yọ a sai ru oware ovo gbe he. Rekọ, Jihova ọ rẹ sae kpare ahwo nọ a whu no zihe ziọ uzuazọ. Re onana o sai mu omai ẹro, Ọghẹnẹ ọ kẹ Jesu ogaga nọ ọ rọ kpare ahwo nọ a whu no.—Se Ọtausiuwoma Na 9:5; Jọn 11:11, 43, 44.
Ẹvẹ uwhu o rọ wọhọ owezẹ?
Ọghẹnẹ ọ ya eyaa nọ ọ te kpare ahwo nọ a whu no, nọ a rọ ekareghẹhọ riẹ kpobi ziọ uzuazọ evaọ akpọ ọkpokpọ na. Ahwo nana a te gbẹ jọ evaọ uki bẹsenọ Ọghẹnẹ ọ te kpare ae ziọ uzuazọ. O rrọ isiuru Ọghẹnẹ re ọ rehọ ogaga riẹ kpare ahwo nọ a whu no ziọ uzuazọ.—Se Job 14:14, 15.
Ẹvẹ ẹkparomatha na ọ te jọ?
Ahwo nọ Ọghẹnẹ ọ te kpare ze, a te riẹ nọ a whu vẹre a tẹ wariẹ kpare ae ze, yọ a te sai vuhu egbẹnyusu gbe ahwo uviuwou rai. Dede nọ ohwo nọ o whu no na o gbo no vẹre, Ọghẹnẹ ọ te kpare iẹe ziọ uzuazọ avọ oma okpokpọ.—Se 1 Ahwo Kọrint 15:35, 38.
A te kpare umutho ahwo jọ kpohọ obọ odhiwu. (Eviavia 20:6) Rekọ ahwo buobu nọ a te kpare ze, a te rria aparadase otọakpọ. Ahwo nana a ve ti mu uzuazọ okpokpọ họ, jẹ rria bẹdẹ bẹdẹ.—Se Olezi 37:29; Iruẹru Ikọ Na 24:15.