Irui-Oviẹ Evaọ Ololo

ỌMOHA na ọ jẹ dhẹ kẹ uzuazọ riẹ. Fiki idhọvẹ akpọ nọ e da riẹ oma fia, o te bo se Jihova Ọghẹnẹ riẹ kẹ ohrọ gbe aruoriwo avọ irui-oviẹ, inọ: “Fi irui mẹ họ eva ololo ra!” (Olezi 56:8) Ọmoha nọ ma be ta ẹme riẹ na họ Devidi, ọnọ o zihe ruọ ovie Izrẹl uwhremuna. Rekọ eme họ ololo nọ ọ fodẹ na, kọ ẹvẹ Ọghẹnẹ ọ sai ro fi irui-oviẹ mai họ iẹe?

Ololo yọ oware nọ a jọ oria kpobi riẹ evaọ oke Devidi. O jọ wọhọ akana nọ a jẹ hae rọ wha eware wọhọ ame, ewhri, udi, hayo ebọta. Ahwo uyẹ nọ a re se Tuareg nọ a re no oria ruọ oria maero evaọ idhude Sahara a gbẹ be rọ ọkpọ akana otiọye nọ a rehọ oviẹ-ẹwe hayo oviẹ-ogodẹ ọsoso ru rọ wha ame lele oma. Egọ ame buobu e rẹ ruọ akana otiọnana, wọhọ epanọ oviẹ-arao nọ a ro ru ei o rro te. Ame nọ a fihọ eva rai ọ rẹ gbẹ jọ dhedhẹ ghelọ ivo egaga erọ idhude na. Evaọ oke nọ u kpemu, enyenya hayo ekẹtẹkẹtẹ a jẹ hae rọ wha ekana itienana. Tubọ enẹna, whọ rẹ sae ruẹ ekana itieye na nọ a gba fihọ imoto ilogbo nọ e rẹ dhẹ kpohọ eki ugbo!

Ẹme nana nọ o re te ohwo udu nọ Devidi ọ ta na ọ rẹ sai wo otofa kẹ omai re. Evaọ oghẹrẹ vẹ? Ebaibol e ta nọ Setan o bi su akpọ na yọ o wo “ofu ọgaga” evaọ edẹ mai na. Onana u ru nọ uye obẹbẹ u bi ro te akpọ na. (Eviavia 12:12) Fikiere, ahwo buobu a be ruẹ uye idhọvẹ iroro hayo oghẹrẹ ebẹbẹ efa wọhọ Devidi—maero kọ enọ e be daoma ru eva were Ọghẹnẹ. Kọ whọ rrọ usu ahwo nana? Idibo itieye nọ i wo ẹrọwọ a be daoma rọ uduowha yeri uzuazọ ẹgbakiete, tubọ “avọ oviẹ.” (Olezi 126:6) O rẹ sai mu ai ẹro inọ orọnikọ odawọ nọ u bi te ai ọvo Ọsẹ obọ odhiwu rai ọ be ruẹ hẹ rekọ te edada iroro nọ edawọ na e be wha se ai. Ọ riẹ edada nọ i bi te idibo riẹ fiotọ, yọ ọ be kareghẹhọ uye-oruẹ gbe irui-oviẹ rai avọ ohrọoriọ, bi fi ai họ ololo riẹ, wọhọ odẹme.