Eria Ekiakiẹ Efa Rọkẹ Obe Ewuhrẹ Uzuazọ Oleleikristi gbe Usiuwoma Ota Mai
AKPEGBIVẸ 4-10
EWARE AGHAE NỌ E RRỌ EBAIBOL NA | ZEFANAYA 1–HAGAI 2
“Gwọlọ Jihova Taure Ẹdẹ Ofu Riẹ O te ti Te”
Gwọlọ Jihova Taure Ẹdẹ Ofu Riẹ O te ti Te
5 Whọ rẹ sae ta nọ: ‘Mẹ yọ odibo Ọghẹnẹ nọ ọ r’oma mudhe jẹ họ-ame no, omọvo Isẹri Jihova. Kọ mẹ gbẹ be nyate itee eyena anwẹdẹ?’ Evaọ uzẹme, o gwọlọ vi oma mai nọ ma re ro mudhe kẹ Jihova. Izrẹl yọ orẹwho nọ o roma mudhe, rekọ evaọ edẹ Zefanaya ahwo Juda a jẹ rria te omarọkẹ oyena ha. Fikiere, a tẹ se orẹwho na. ‘Re a gwọlọ ỌNOWO na’ nẹnẹ o kẹre te ewo gbe ẹyọrọ emamọ usu kugbei avọ ukoko otọakpọ riẹ. O gwọlọ ẹriẹ epanọ Ọghẹnẹ o re rri eware gbe ẹjiroro riẹ nọ a rẹ kezọ kẹ. Nọ ma tẹ be roma totọ wuhrẹ Ẹme riẹ, roro kpahe iẹe, je bi fi ohrẹ riẹ họ iruo evaọ uzuazọ yọ ma be gwọlọ Jihova. Nọ ma be jẹ gwọlọ ọkpọvio Jihova evaọ olẹ ẹsikpobi jẹ be nya lele ekpakpọ ẹzi ọfuafo riẹ na, usu mai kugbei u re diwi yọ oma o rẹ w’omai re ma gọe ‘avọ udu, ẹwẹ, gbe ẹgba mai kpobi.’—Iziewariẹ 6:5; Ahwo Galesha 5:22-25; Ahwo Filipai 4:6, 7; Eviavia 4:11.
6 Ute avivẹ nọ a fodẹ eva Zefanaya 2:3 họ re a “gwọlọ ẹrẹreokie.” Ibuobu mai i ru inwene ilogbo no re ma sai te kẹ ame-ọhọ Oleleikristi, rekọ ma rẹ ruabọhọ ekru itee uruemu ikiẹrẹe Ọghẹnẹ evaọ edẹ uzuazọ mai kpobi. Ejọ nọ e riẹ muhọ ziezi evaọ abọ nana a kẹ oma rai uvẹ re akpọ na o gbe ai ku. O rẹ bẹbẹ re a gwọlọ ẹrẹreokie, keme ahwo nọ a bi rri ọfariẹ-ogbe, ọrueta, gbe izieraha efa wọhọ oware nọ u kie ze a wariẹ omai họ. Ghele na, isiuru egaga re ma ru Jihova eva were o rẹ g’obọ vi isiuru ẹgwọlọ ọjẹrehọ akpọ na ẹkwoma omodawọ re ma kie lele iei. Juda o ku aruoriwo Ọghẹnẹ fiẹ keme ọ raro kele erẹwho ekẹloma egedhọ riẹ. Ukpenọ ma rẹ raro kele akpọ na, joma ‘raro kele Ọghẹnẹ,’ hae wha “ohwo ọkpokpọ na họ oma, ọnọ a ma tho Ọghẹnẹ eva uvi ẹrẹreokie gbe ẹfuọ.”—Ahwo Ẹfẹsọs 4:24; 5:1.
7 Ute avesa nọ Zefanaya 2:3 o fodẹ họ otẹrọnọ ma gwọlọ nọ a ko omai dhere evaọ ẹdẹ ofu Jihova, ma rẹ “gwọlọ oma-urokpotọ.” N’ẹdẹ ruẹ ẹdẹ, ma be roma wholo ezae, eyae, gbe izoge nọ e kare omarokpotọ. Rọkẹ ae, re ohwo ọ jọ wowolẹ yọ aghọ. A rri ẹmeoyo wọhọ oyẹlẹ ulogbo. A re si ikẹ eware, avọ oriobọ, jẹ ta họ amọfa obọ, si ikẹ inọ oware nọ a rri fihọ “ẹkẹ” rai na u re te ai obọ hrọ, o tẹ make rọnọ o rẹ rehọ uzuazọ ohwo dede. Ẹvẹ u re yoma te otẹrọnọ iruemu enana jọ i kpomahọ omai! Onana họ oke nọ ma rẹ rọ “gwọlọ oma-urokpotọ.” Evaọ edhere vẹ? Ẹkwoma ẹmeoyo kẹ Ọghẹnẹ, rọ omarokpotọ jẹ ọwhọkuo riẹ rehọ jẹ nya lele oreva riẹ.
Romatotọ Kiẹ Eware Aghae Via
Oruvẹ no Obe Nahum, Obe Habakuk, gbe Obe Zefanaya Ze
1:8. O rọ vevẹ inọ otujọ evaọ edẹ Zefanaya a jẹ gwọlọ ọjẹrehọ erẹwho nọ e wariẹ e rai họ ẹkwoma ẹhwa “ẹgọ orẹwho ofa.” U re yoma gaga re ohwo nọ ọ be gọ Jihova nẹnẹ ọ gwọlọ raro kele idhere akpọ na.
Oruvẹ no Obe Hagai gbe Obe Zekaraya Ze
2:9—Idhere vẹ ‘eru uwou uwhremu na o ti ro woma vi ọrọ ọsosuọ’? O tẹ kawo o ti woma vi ọrọ ọsosuọ na evaọ idhere esa: epanọ etẹmpol na ọ tọ te, ohwo nọ ọ jọ eva riẹ wuhrẹ amọfa, gbe ahwo nọ a zurie kpohọ etẹe re a gọ Jihova. Dede nọ etẹmpol owoma ọrọ Solomọn ọ tọ te ikpe 420, no 1027 B.C.E. rite 607 B.C.E., “uwou uwhremu na” o tọ te ikpe 580, no oke ẹbọ riẹ evaọ 515 B.C.E. rite oke nọ a rọ raha iẹe evaọ 70 C.E. Ofariẹ, Mesaya na—Jesu Kristi—ọ jọ evaọ “uwou uwhremu na” wuhrẹ ahwo, yọ ahwo buobu a ziọ eva riẹ te gọ Ọghẹnẹ vi “ọrọ ọsosuọ” na.—Iruẹru 2:1-11.
AKPEGBIVẸ 11-17
EWARE AGHAE NỌ E RRỌ EBAIBOL NA | ZEKARAYA 1-8
“Jẹ Obọ họ Iwu Ahwo Iju”
A bi “Lele Omogodẹ na Nya”
14 Jesu Kristi ọ rehọ obọ nọ ma bi fihọ kẹ inievo riẹ na wọhọ ẹsenọ ọye ma bi fi obọ na họ kẹ. (Se Matiu 25:40.) Rekọ oghẹrẹ vẹ enọ i wo ẹruore otọakpọ na a rẹ sai ro fi obọ họ kẹ inievo Kristi nọ a rọ ẹzi wholo? Edhere nọ a be mai ro fi obọ họ kẹ ae họ ẹta usiuwoma Uvie na. (Mat. 24:14; Jọn 14:12) Nọ unu enọ a wholo na a bi dhe ẹkẹkao na yọ unu igodẹ efa na a bi dhe ebuebu. Nọ enọ i wo ẹruore otọakpọ a tẹ be ta usiuwoma, bi tube ru iruo ọkobaro, yọ a be tha enọ a rọ ẹzi wholo na uke evaọ erugba usiuwoma ota na. (Mat. 28:19, 20) Okẹ-unevaze yọ edhere ọfa nọ ma bi ro fi obọ họ.
AKPEGBIVẸ 18-24
EWARE AGHAE NỌ E RRỌ EBAIBOL NA | ZEKARAYA 9-14
“Daji ‘Ukiekpotọ Igbehru Na’”
w07-bro 25 ¶10
Okwakwa-Ẹmo Kpobi nọ A Gali Vi Owhai U ti Wiruo Ho
10 Zekaraya 12:3 u dhesẹ nọ erẹwho na a ‘nwa oma gaga.’ Ẹvẹ a rọ nwa oma? Ọghẹnẹ o juzi inọ a re whowho emamọ usi Uvie na hrọ. Isẹri Jihova a se owha-iruo nọ a rẹ rọ ta usiuwoma na gboja gaga. Dede na, usi Uvie na nọ a bi whowho inọ oye họ ẹruore ọvo nọ ọ rrọ kẹ ahwo-akpọ u zihe ruọ “utho ogbẹgbẹdẹ” kẹ erẹwho na no. A be daoma epanọ a re ro gele ie họ akotọ ẹkwoma ukpokpoma nọ a bi ro te enọ i bi whowho usi Uvie na. Evaọ ere oruo, erẹwho nana e ‘nwa oma gaga no.’ A tubẹ wha omovuọ se omobọ rai no keme a be sae kparobọ evaọ oma idibo Ọghẹnẹ hẹ. A rẹ sae fare unu eg’Ọghẹnẹ uzẹme he, enọ o be were re a whowho “usiuwoma ebẹdẹ bẹdẹ” orọ Uvie Ọghẹnẹ taure uyero akpọ nana u te ti kuhọ. (Eviavia 14:6) Nọ ọ ruẹ uye ogaga nọ a je ro te idibo Jihova, ohwo jọ nọ ọ rẹ rẹrote iwou-odi evaọ orẹwho Africa jọ ọ ta nọ: ‘Ukpokpoma nọ wha bi ro te ahwo nana, omolahiẹ gheghe wha rrọ. A ti si obọ no ẹrọwọ rai vievie he. Ukpoye a ti vihọ ọvo.’
w07-bro 27 ¶13
Okwakwa-Ẹmo Kpobi nọ A Gali Vi Owhai U ti Wiruo Ho
13 Se Zekaraya 12:7, 8. Evaọ oke anwae, a jẹ hae jọ Izrẹl bọ iwou-udhu gaga, yọ ẹsejọ ithuru-igodẹ gbe ewhẹrẹ e jẹ hae jọ iwou-udhu ru iruo. Nọ ewegrẹ e tẹ wọ ohọre ziọ Jerusalẹm, ahwo otiọye na obọ o rẹ kaki te nọ o rẹ gwọlọ nọ a kake dhogbo bru. Ẹme na “iwou-udhu Juda” u dhesẹ nọ evaọ edhere ẹwoho, okiọkotọ ọrọ enọ a rọ ẹzi wholo na a rrọ otafe gheghe, orọnikọ evaọ ikpewho egaga nọ a diogba wariẹ hẹ. A be jọ ere na wha iruo Uvie Mesaya na haro ababọ ozọ. Jihova ọgbaẹmo ọ te kaki siwi “iwou-udhu Juda” keme ae Setan ọ mae rẹriẹ ovao dhe.
AKPEGBIVẸ 25-31
EWARE AGHAE NỌ E RRỌ EBAIBOL NA | MALAKAE 1-4
“Kọ Wha be Jọ Orọo Ra Ru Eva Were Jihova?”
jd 125-126 ¶4-5
Ru Ẹkẹ Abọ Ra Evaọ Uviuwou na re Eva E Were Ọghẹnẹ
4 Evaọ ikpe-udhusoi avọ isoi, evaọ oke Malakae ahwo Ju buobu a je mu fa orọo. Malakae ọ ta kẹ ai nọ: “ỌNOWO na ọ jọ isẹri ọvọ nọ whẹ avọ aye ra a re, evaọ oke oge ra, ọnọ who fievahọ họ.” Fikinọ ezae na a jẹ rọ ẹghẹ yeri kugbe eyae rai, aruẹri Jihova ọ tẹ vọ “avọ eviẹ gbe imẹ-idio” eyae rai nọ a dhẹ seba. Izerẹ nọ evọ avọ o gbeku a je ku aro kufiẹ kẹ eva egaga nọ ezae na a je dhesẹ kẹ eyae rai na!—Malakae 2:13, 14.
5 Ẹvẹ Jihova o rri uruemu eva egaga nọ ahwo oke Malakae a je dhesẹ evaọ orọo rai na? Malakae o kere nọ: “Orọwo nọ o rẹ hẹriẹ o rẹ dha omẹ eva, ere ỌNOWO Ọghẹnẹ Izrẹl ọ tae.” Malakae ọ tẹ jẹ ta vevẹ nọ Jihova ọ “rẹ rẹriẹ hẹ.” (Malakae 2:16; 3:6) Eme họ otọ ẹme riẹ na? Ọ be ta nọ u kri no nọ Ọghẹnẹ o ro mu kpahe orọo-ofa. (Emuhọ 2:18, 24) O mu kpahe orọo-ofa evaọ oke Malakae. Yọ ere re evaọ oke mai na. Ahwo jọ a rẹ dhẹ siọ ọzae hayo aye rai ba fikinọ oware nọ a bi rẹro riẹ u bi te ai obọ họ. Dede nọ udu rai ẹghẹ na ọ rrọ, u dhere Jihova ha keme ọ be kiẹe via. (Jerimaya 17:9, 10) Jihova ọ riẹ ẹghẹ hayo omaa nọ ohwo ọ be ma re ọ sai fa orọo riẹ, dede nọ o bi gu inoma. Evaọ uzẹme, “eware kpobi e ba fihọ je rovie fihọ gbaladha evaọ aro ọnọ ma ti gu epanọ ma ru te kẹ hrọ.”—Ahwo Hibru 4:13.
Jihova O Mukpahe Edhere Ẹghẹ
19 Evaọ abọ owoma, Malakae o dhesẹ nọ ezae uwou-orọo jọ a rọ ẹghẹ yeri kugbe eyae rai hi. A ‘wo abọjọ ẹzi ọfuafo Ọghẹnẹ.’ (Owọ avọ 15) Avọ evawere, ukoko Ọghẹnẹ nẹnẹ o vọ avọ ezae itieye na nọ i bi ‘tete eyae rai.’ (1 Pita 3:7) A be rọ ugbobọ hayo ẹmeunu lahiẹ eyae rai hi, a rẹ gwọlọ iruemu owezẹ etọtọ họ, yọ a re si adhẹẹ no eyae rai oma ha ẹkwoma eyae efa nọ a rẹ r’abọ whaliẹ hayo ẹkwoma eriwi ifoto ẹbẹba. Ukoko Jihova u te je wo oghale eyae uwou-orọo Ileleikristi omarọkẹ enọ e be roma kpotọ kẹ Ọghẹnẹ gbe izi riẹ. Ezae gbe eyae itieye na a riẹ oware nọ Ọghẹnẹ o mukpahe, yọ a be rehọ iroro gbe owojẹ rai dhesẹ onana via. Gbẹ hae raro kele ahwo otiọye na, ‘yo ẹme Ọghẹnẹ wọhọ osu’ je wo oghale ẹzi ọfuafo riẹ.—Iruẹru 5:29.
Romatotọ Kiẹ Eware Aghae Via
w07-bro 29 ¶1
Oruvẹ no Obe Malakae Ze
1:10. Jihova o wo evawere kpahe idhe izerẹ nọ i wo uvo uthethei na ha, enọ i je mi ahwo igho rọkẹ iruo esese kpobi wọhọ ethẹ nọ a re rovie hayo erae aruẹri nọ a re koko họ. U wuzou gaga re oware kpobi nọ ma bi ru evaọ egagọ Ọghẹnẹ, te iruo mai evaọ odibọgba na, o jọ orọ uyoyou nọ ma wo kẹ Ọghẹnẹ gbe erivẹ ababọ oriobọ, orọnikọ fiki erere ugho ho!—Matiu 22:37-39; 2 Ahwo Kọrint 11:7.