“Rọ Ọghọ Kẹ Ọsẹ Ra avọ Oni Ra”

Nọ Jesu ọ jọ otọakpọ ọ ta nọ re a “rọ ọghọ kẹ ọsẹ ra avọ oni ra” yọ uzi nọ a rọ zaharo ho. (Ọny 20:12; Mt 15:4) Fikinọ Jesu o “je yoẹme” kẹ ọsẹ avọ oni riẹ nọ ọ jọ uzoge, o fi unu họ akotọ ta ẹme nana ha. (Luk 2:51, ẹme-obotọ) Jesu o ru ọruẹrẹfihotọ re ọ ruẹ nọ a rẹrote oni riẹ nọ o te whu no.​—Jọ 19:26, 27.

Nẹnẹ, nọ izoge Ileleikristi a te bi yoẹme kẹ ọsẹgboni rai jẹ be ta ẹme kẹ ae avọ adhẹẹ yọ a be kẹ ae ọghọ. Uzẹme riẹ họ, ma tẹ make kpako no dede ma rẹ gbẹ rọ ọghọ kẹ ọsẹ avọ oni mai. O tẹ make rọnọ ọsẹgboni mai a kpako no dede, nọ ma tẹ be gaviezọ kẹ ohrẹ rai yọ ma bi bru ọghọ họ ae oma. (Itẹ 23:22) Ma te bi vi ugho se esẹgbini mai nọ e kpako no je bi weze bru ai yọ ma be kẹ ae ọghọ. (1Ti 5:8) Te ma kpako no hayo ma rrọ emaha, oware jọ nọ o rẹ wha ọghọ se ai họ ma te bi lele ai ta ẹme.

WHA RRI IVIDIO EWARE NỌ A DRỌ FIHỌ EBỌDO ỌFUAFO ẸVẸ MẸ SAE RỌ TA EVA KẸ ỌSẸGBONI MẸ? KẸSENA WHA VẸ KIYO ENỌ NANA:

• Fikieme o sae rọ jọ bẹbẹ re whọ ta eva kẹ ọsẹgboni ra?

• Ẹvẹ whọ sae rọ kẹ ọsẹgboni ra ọghọ nọ who te bi lele ai ta ẹme?

  

• Fikieme u ro woma re who lele ọsẹgboni ra ta ẹme? (Itẹ 15:22)