Eria Ekiakiẹ Rọkẹ Obe Ewuhrẹ Uzuazọ Oleleikristi gbe Usi Uwoma Ota Mai
AKPEGBỌVO 4-10
EWARE AGHAE NỌ E RRỌ EBAIBOL NA | 1 JỌN 1-5
“Wha You Akpọ na Hayo Eware nọ E Rrọ Evaọ Akpọ na Ha”
Nya Lele Oriruo Nọ Jesu O Fihọ Otọ
13 Ahwo jọ a rẹ sai roro nọ orọnikọ eware kpobi nọ e rrọ akpọ na e thọ họ. O make rrọ ere na, akpọ na avọ isiuru riẹ e rẹ sae lẹliẹ omai rẹriẹ no ẹgọ Jihova lọlọhọ. Akpọ na o wo oware ovuovo nọ a ru avọ ẹjiroro nọ o rẹ rọ lẹliẹ omai si kẹle Ọghẹnẹ hẹ. Fikiere, otẹrọnọ ma bi wo uyoyou kẹ eware akpọ na, makọ eware nọ e thọ dede he, yọ ma bi fi oma mai họ ọza kẹ enwoma. (1 Timoti 6:9, 10) U te no ere no, eware buobu nọ e rrọ akpọ na i gine yoma gaga yọ e rẹ sae raha udu mai. Nọ ma te bi rri ighe isinima gbe ighe etẹlivisiọne nọ i bi dhesẹ ozighi, efe-ole, owezẹ ezae-avọ-eyae, ma rẹ sae jẹ eware itieye na rehọ—nọ o rẹ sae jọ odawọ kẹ omai. Ma te bi ku oma gbe ahwo nọ isiuru rai e tọvi epanọ a sai ro kparo ọvo evaọ akpọ-oyere hayo uvẹ eki-ọthuọ, eware yena e sai zihe ruọ eware nọ e rẹ rehọ ẹta ọsosuọ evaọ uzuazọ mai re.—Matiu 6:24; 1 Ahwo Kọrint 15:33.
Roro Kpahe Oghẹrẹ Ohwo Nọ U Fo Nọ Whọ Rẹ Jọ
18 Ma tẹ be hai roro kpahe ẹme nọ Jọn ukọ na o kere u re je fi obọ họ kẹ omai whaha urusio “eware nọ e rọ eva akpọ na” re, o kere nọ: “Akpọ na avọ urusio riẹ e rẹ te vrẹ, rekọ ohwo nọ o re ru oreva Ọghẹnẹ ọ rẹ jọ bẹdẹ.” (1 Jọn 2:17) Ma rẹ gwọlọ roro nọ akpọ nana o re wowoma, yọ ọ te jọ ribri. Rekọ avro ọ riẹ hẹ, akpọ nana o ti kuhọ ẹdẹjọ. Akpọ Setan o wo oware ovuovo nọ o rẹ tọ họ. Ma tẹ be hae kareghẹhọ onana, u re fi obọ họ kẹ omai nọ ma gbe ro kie kẹ urusio akpọ na ha.
Romatotọ Kiẹ Eware Aghae Via
Ma Rẹ Sai Fievahọ Ekareghẹhọ Jihova
14 Ekareghẹhọ buobu e rrọ Ikereakere Griki Ileleikristi na nọ i dhesẹ nọ u fo re ma you ohwohwo. Jesu ọ ta nọ uzi avivẹ nọ o mae rro họ, “you omọfa epanọ who you oma ra.” (Mat. 22:39) Yọ Jemis nọ ọ rrọ oniọvo Jesu o se uyoyou ‘uzi Ovie.’ (Jem. 2:8) Jọn ukọ na o kere nọ: ‘Iyoyou mẹ, orọnọ uzi okpokpọ mẹ rrọ owhai ekere se he, rekọ ujaje anwae nọ wha wo no emuhọ ze; ujaje anwae na yọ ẹme nọ wha yo no vẹre. Dede na me bi kere uzi okpokpọ se owhai.’ (1 Jọn 2:7, 8) Eme Jọn o se “ujaje anwae” na? Ọ jẹ ta kpahe uzi nọ o ta nọ ohwo o you ohwo. O se rie “ujaje anwae” keme Jesu ọ kẹ ujaje yena no vẹre ikpe buobu nọ i kpemu. O te je sei “uzi okpokpọ” keme uyoyou nana o te gwọlọ nọ ilele na a rẹ rọ ẹgwọlọ amọfa karo evaọ etoke ebẹbẹ nọ a te rẹriẹ ovao dhe evaọ obaro. Kọ mai Ileleikristi nẹnẹ, ma be gaviezọ kẹ unuovẹvẹ sa-sa nọ i re fi obọ họ kẹ omai whaha uzuazọ oriobọ nọ o da oria kpobi fia nẹnẹ? Uzuazọ utioye u re ru nọ ma gbe wo uyoyou kẹ erivẹ mai hi.
it-1 862 ¶5
Erọvrẹ
U fo nọ ma rẹ lẹ re Ọghẹnẹ ọ rehọ izieraha amọfa rọvrẹ rai, makọ uzi nọ ukoko soso o raha. Mosis o ru ere kẹ orẹwho Izrẹl, ọ feva uzi nọ orẹwho na soso o raha jẹ lẹ re Ọghẹnẹ ọ rọvrẹ rai, yọ Jihova ọ gaviezọ kẹ olẹ riẹ na. (Ik 14:19, 20) Okenọ a jẹ rehọ etẹmpol na mudhe, Solomọn ọ lẹ se Jihova re ọ rehọ izieraha ahwo Izrẹl rọvrẹ rai nọ a tẹ raha uzi jọ je kurẹriẹ no idhere iyoma rai. (1Iv 8:30, 33-40, 46-52) Ẹzra ọ feva izieraha ahwo Ju nọ a no igbo ze. Olẹ nọ Ẹzra ọ lẹ o wha riẹ ze nọ ahwo na a ro ru oware nọ Jihova ọ rọ rehọ izieraha rai rọvrẹ rai. (Ẹzr 9:13–10:4, 10-19, 44) Jemis ọ tuduhọ Oleleikristi nọ ọ be mọ, koyehọ ọnọ ọ thuzi awọ, re o se ekpako ukoko na re a lẹ kẹe, yọ “otẹrọnọ ọ raha izi, a te rọvrẹ riẹ.” (Jem 5:14-16) Rekọ “uzioraha jọ o riẹ nọ a rẹ jọ reabe uwhu,” uzioraha mukpahe ẹzi ọfuafo na, koyehọ uzi nọ ohwo o re keke aro fihọ raha, onọ u wo erọvrẹ hẹ. U fo nọ Oleleikristi ọ rẹ lẹ kẹ ahwo nọ a raha uzi utionana ha.—1Jọ 5:16; Mt 12:31; Hib 10:26, 27; rri UZIORAHA, I; ẸZI.
Ẹme nọ A re Ru Ovavo
Enọ Ahwo nọ A s’Ebe
Jọn ukọ na o kere nọ “uvi uyoyou u re si ozọ no.” Eme họ “uvi uyoyou” nọ ọ ta kpahe na, kọ “ozọ” vẹ u re si no?
Jọn ukọ na o kere nọ: “Uyoyou o rẹ dhozọ họ, uvi uyoyou u re si ozọ no, keme ozọ o rẹ za ohwo dhe. Ẹhẹ, ohwo nọ ọ rẹ dhozọ ọ rẹ sai dhesẹ uyoyou vọvọ họ.”—1 Jọn 4:18.
Eme nọ e wariẹ oria ikere yena họ i dhesẹ nọ Jọn ọ jẹ ta kpahe ẹme nọ a rẹ ta ududu—koyehọ epanọ uyoyou nọ ma wo kẹ Ọghẹnẹ o rẹ rọ wọ omai lẹ sei ududu. Ma rẹ ruẹ onana evaọ owọ avọ 17, onọ o ta nọ: “Enẹ uyoyou mai o rọ gbunu, re ma sae ta ẹme ududu evaọ ẹdẹ ẹdhoguo.” Oleleikristi ọ rẹ sae lẹ se Ọghẹnẹ ududu nọ o te you Ọghẹnẹ ziezi jẹ riẹ nọ Ọghẹnẹ o you riẹ re. Rekọ o gbe vuhu onana mu hu, ọ rẹ sae lẹ se Ọghẹnẹ ududu hu.
Ẹme na “uvi uyoyou” u wuzou gaga. Nọ a tẹ jọ Ebaibol na ta kpahe uvi oware hayo oware nọ o rrọ “gbagba,” orọnikọ ẹsikpobi a rẹ rehọ iẹe ta kpahe oware nọ o gba riẹriẹriẹ hẹ. Wọhọ oriruo, Jesu ọ jọ Ovuẹ obọ Ugbehru na ta nọ: “Fikiere wha rẹ jọ gbagba wọhọ epanọ Ọsẹ obọ odhiwu rai ọ rrọ gbagba na.” Jesu ọ jẹ ta kẹ ikọ riẹ nọ otẹrọnọ a you enọ i you rai ọvo, kiyọ uyoyou rai na o thọ, o gbunu hu. O gwọlọ nọ uyoyou rai o rẹ jọ gbagba hayo a re dhesẹ iẹe vọvọ kẹ ahwo kpobi, makọ ewegrẹ rai dede. Epọvo na re, nọ Jọn o kere kpahe “uvi uyoyou” na, ọ jẹ ta kpahe eva mai kpobi gbe uzuazọ mai kpobi nọ ma re ro you Ọghẹnẹ.—Matiu 5:46-48; 19:20, 21.
Nọ Oleleikristi ọ tẹ be lẹ se Ọghẹnẹ, ọ riẹ vevẹ nọ ọyomariẹ yọ ọrahauzi gbe nọ ọ gba ha. Rekọ, otẹrọnọ uyoyou nọ o wo kẹ Ọghẹnẹ o rrọ gaga, ọ tẹ jẹ riẹ nọ Ọghẹnẹ o you rie ziezi, ozọ u re mu ei hi nọ ọ tẹ be lẹ, inọ Ọghẹnẹ o ti yo olẹ riẹ hẹ. Ukpoye, nọ ọ tẹ be lẹ ọ rẹ ta oware kpobi nọ o riẹ eva ududu, jẹ lẹ kẹ erọvrẹ fiki idhe ẹtanigbo Jesu Kristi nọ Ọghẹnẹ ọ rọ kẹ omai na. Nọ o te ru ere, u re mu ei ẹro inọ Ọghẹnẹ o re yo olẹ ayare riẹ na.
Ẹvẹ ohwo ọ sai ro “dhesẹ uyoyou vọvọ” jẹ ‘siọ ozọ’ ba ẹdhẹ inọ Ọghẹnẹ o ti yo olẹ riẹ hẹ? Jọn ukọ na ọ ta nọ: “Ohwo kpobi nọ o bi ru lele ẹme [Ọghẹnẹ], o bi dhesẹ nọ o gine you Ọghẹnẹ.” (1 Jọn 2:5) Roro kpahe onana: Otẹrọnọ Ọghẹnẹ o you omai nọ ma gbẹ jọ erahaizi, kọ o gbe you omai viere nọ ma te kurẹriẹ no eva ze jẹ be daoma “ru lele ẹme riẹ”? (Ahwo Rom 5:8; 1 Jọn 4:10) Evaọ uzẹme, nọ ma te kru ga evaọ egagọ Ọghẹnẹ, ma sai wo imuẹro nọ Pọl ukọ na o wo okenọ ọ ta kpahe Ọghẹnẹ nọ: “Nọ orọnọ ọ tubẹ rọ Ọmọ obọriẹ gboke he rekọ o siobọnoi fiki mai kpobi na, kọ tei te Ọmọ na a gbẹ te rọ evawere kẹ omai eware efa kpobi?”—Ahwo Rom 8:32.
AKPEGBỌVO 11-17
EWARE AGHAE NỌ E RRỌ EBAIBOL NA | 2 JỌN 1–JUD
“Ma rẹ Họre Gaga re Ma Daji Uzẹme Na”
“Wha Kru Oma Ga Eva Ọnowo Na”
8 Ma rrọ ogbori kpahe ereghẹ Setan he keme Ikereakere na i dhesẹ eghẹ riẹ via. (2 Ahwo Kọrint 2:11) Ẹdhọ ọ rọ so Job ẹkwoma ẹgaga eyero uzuazọ nọ ọ rọ tehe iẹe, uwhu enọ o you, ukpokpoma uviuwou, olahiẹ ugboma, gbe obrukpe ekueku ọrọ egbẹnyusu riẹ. Ọkora ọ tẹ te ruọ Job oma, o te je roro nọ Ọghẹnẹ ọ nya se iẹe ba no. (Job 10:1, 2) Dede nọ ẹsejọhọ Setan ọ te nwane rọ obọ riẹ rehọ ebẹbẹ itienana tehe omai nẹnẹ hẹ, ẹgaga otiọye na o bi te Ileleikristi buobu, yọ Ẹdhọ ọ rẹ sae nwane rehọ ebẹbẹ enana ru ẹgwọlọ riẹ te obọ.
9 Enwoma abọ-ẹzi i vihọ gaga no evaọ edẹ urere nana. Ma be rria akpọ nọ ilale abọ-iwo i bi jo gbe itee abọ-ẹzi hotọ. Ẹsikpobi ekwakwa awhusi i bi dhesẹ ọfariẹ-ogbe wọhọ ehri omawere orọnọ edada ha. Yọ ahwo buobu a “yowọ enu-awere siọ Ọghẹnẹ ba.” (2 Timoti 3:1-5) Ewo iroro itiena o rẹ sai fi edikihẹga abọ-ẹzi mai họ ọza ajokpanọ ma rẹ dadamu “họre kẹ orọwọ na.”—Jud 3.
Romatotọ Kiẹ Eware Aghae Via
it-2 279
Ehaa Uyoyou
Ebaibol na ọ ta kpahe epanọ a je ro ru ehaa nana ha gbe epanọ a jẹ hai ru ai kpekpe te. (Jud 12) Olori mai, Jesu Kristi hayo ikọ riẹ a ta nọ ma hai ru ehaa nana ha. Fikiere o rrọ vevẹ nọ ma re rri ehaa nana wọhọ oware ọgbahọ họ hayo wọhọ onọ a re ru bẹdẹ bẹdẹ hẹ. Ahwo jọ a ta nọ Ileleikristi nọ i fe a jẹ hai ru ehaa nana, yọ a jẹ hai zizie ibe Ileleikristi rai nọ e rrọ iyogbe ziọ ehaa na. Te emọ nọ i wo esẹ hẹ, eyae-uku, edafe, gbe iyogbe, aikpobi a jẹ hai kokohọ ru ehaa nana fiki okugbe nọ o jọ udevie rai.
it-2 816
Utho
A rehọ ẹme Griki ọfa jọ nọ a re se spi·lasʹ, ro dhesẹ utho hayo ukulu ẹkpẹ nọ u dhere obotọ ame. Jud ọ rehọ ẹme nana dhesẹ ezae jọ nọ e lẹlẹ ruọ ukoko Ileleikristi na avọ iroro iyoma nọ a wo. Wọhọ epanọ utho nọ u dhere obotọ ame o rẹ sai zue okọ na, ere ezae nana e jọ ọza kẹ amọfa evaọ ukoko na. Jud ọ ta nọ: “Ahwo nana họ itho nọ i dhere obotọ ame evaọ ehaa rai nọ wha bi ro dhesẹ uyoyou nọ a te bi lele owhai re emu.”—Jud 12.
“O Ru Ọghẹnẹ Eva Were Ziezi”
Didi eruẹaruẹ Enọk ọ ruẹ? Ebaibol na ọ ta nọ: “Rri! Jihova ọ nyaze avọ ikọ-odhiwu erẹri riẹ gbidi gbidi, re o bruoziẹ ahwo kpobi, re o brukpe ahwo omuomu kpobi fiki iruẹru imuomu rai kpobi nọ a ru evaọ edhere omuomu, gbe fiki eme aghọ kpobi nọ erahaizi nana nọ e be gọ Ọghẹnẹ hẹ na a ta kpahe iẹe.” (Jud 14, 15) Who te muẹrohọ eruẹaruẹ na, whọ rẹ ruẹ nọ Enọk ọ ta ẹme na wọhọ ẹsenọ oware na o via vrẹ no, wọhọ ẹsenọ Ọghẹnẹ o ru eruẹaruẹ na gba no. Nwanọ enẹ ọvona eruẹaruẹ Ebaibol buobu e rrọ. Ẹme na họ: Oware nọ ọruẹaro na ọ jọ eruẹaruẹ ruẹ na, u mu rie ẹro inọ o rẹ seba ẹvia ha, fikiere ọ tẹ tae wọhọ ẹsenọ u rugba no!—Aizaya 46:10.
“O Ru Ọghẹnẹ Eva Were Ziezi”
Ẹrọwọ Enọk ọ rẹ sae wọ omai nọ omamai sọ ma bi rri akpọ na wọhọ epanọ Jihova o bi rri rie. Nẹnẹ, ma bi whowho ọkpọ ovuẹ nọ Enọk o je whowho na re, keme akpọ nana ọ rrọ yoyoma wọhọ epanọ ọ jọ evaọ edẹ Enọk. Nwanọ wọhọ epanọ Enọk o je whowho na, Jihova ọ rehọ Owhe ologbo raha akpọ omuomu ọyena evaọ oke Noa. Wọhọ epanọ Ọghẹnẹ ọ raha akpọ omuomu ọyena, ere Ọghẹnẹ ọ te raha akpọ omuomu ọnana re. (Matiu 24:38, 39; 2 Pita 2:4-6) Nẹnẹ, Ọghẹnẹ avọ ikọ-odhiwu erẹri riẹ, a ruẹrẹ oma kpahe no re a raha akpọ omuomu ọnana. U fo nọ mai kpobi ma re roro kpahe ovuẹ nọ Enọk o je whowho na, ma vẹ jẹ daoma whowho iei kẹ amọfa re. Ahwo uviuwou mai gbe egbẹnyusu mai a sai mukpahe omai. Ẹsejọ ma sae jọ goli. Rekọ wọhọ epanọ Jihova ọ nyasiọ Enọk ba ha na, ere ọvona ọ te nyasiọ idibo riẹ nọ e talamu ei nẹnẹ ba ha!
AKPEGBỌVO 18-24
EWARE AGHAE NỌ E RRỌ EBAIBOL NA | EVIAVIA 1-3
“Mẹ Riẹ Eware nọ Who bi Ru”
Oghẹrẹ Ẹzi Vẹ Who Bi Dhesẹ?
8 Re ma sae whaha oghẹrẹ ẹzi otiọye na, joma kareghẹhọ nọ a dhesẹ Jesu evaọ Ebaibol na inọ “o kru isi ihrẹ họ obọ ọze riẹ.” “Isi” na i dikihẹ kẹ esẹro nọ a rọ ẹzi wholo na, yọ onana o kẹre te esẹro kpobi nọ e rrọ ukoko na. Jesu ọ rẹ sae kpọ “isi” nọ e rrọ obọ riẹ na oghẹrẹ kpobi nọ ọ ruẹ nọ u fo. (Evia. 1:16, 20) Jesu họ Ọnọ o wuzou ukoko Ileleikristi na, fikiere, ọye ọ be kpọ ugboma ekpako na. Otẹrọnọ ọkpako jọ ọ gwọlọ ọkpọvio, Ọnọ “ibiaro riẹ [e rrọ] kerọ ebrerae” na ọ te kpọ eware vi evaọ oghẹrẹ nọ ọ gwọlọ gbe ẹruoke riẹ. (Evia. 1:14) Bọo oke yena, ma rẹ rọ adhẹẹ kẹ ekpako nọ ẹzi ọfuafo o ro mu na keme Pọl okere nọ: “Wha yo ẹme e nọ i bi su owhai re wha rehọ oma kpotọ kẹ ae; keme ae a be sẹro izi rai, wọhọ ahwo nọ a rẹ te niyẹrẹ re a rọ evawere, ru onana o jọ orọ ofuhu, keme oyena u re wo erere kẹ owhai hi.”—Hib. 13:17.
Jihova Ọ Be Thọ Omai Re Ma Sai Wo Esiwo
11 Evaọ eruẹaruẹ nọ a kere fihọ obe Eviavia uzou avọ 2 gbe orọ avọ 3, Jesu Kristi ọ kiẹ ikoko ihrẹ nọ e jọ obọ Esia Minor riwi. Eruẹaruẹ na i dhesẹ nọ Kristi ọ be ruẹ eware nọ e be jọ ikoko na kpobi via gbe enọ e be via kẹ omomọvo. Ọ tubẹ fodẹ edẹ ahwo jọ, yọ evaọ usu rai, o jiri ejọ jẹ kẹ ejọ ohrẹ. Eme onana u dhesẹ? Evaọ orugba eruẹaruẹ nana, ikoko ihrẹ na i dikihẹ kẹ Ileleikristi nọ a rọ ẹzi wholo nọ ukpe 1914 o vrẹ no, yọ ohrẹ nọ ọ kẹ ikoko ihrẹ na u kie kpahe ikoko kpobi nọ idibo Ọghẹnẹ e rrọ evaọ akpọ na soso. Fikiere, ma rẹ sae ta nọ Jihova ọ be rọ ẹkwoma Ọmọ riẹ kpọ idibo riẹ. Ẹvẹ ma sai ro wo erere no ekpọvio riẹ ze?
J’Owọ Lele Ukoko Jihova
20 Ẹnya lele ukoko Jihova nọ o be nyaharo na o gwọlọ nọ ma re vuhu ọkwa nọ Ọghẹnẹ ọ kẹ Jesu Kristi wọhọ ‘uzou ukoko na’ mu. (Ahwo Ẹfisọs 5:22, 23) U fo nọ ma re muẹrohọ Aizaya 55:4 re, oria nọ a jọ ta k’omai nọ: “Ri, [mẹ Jihova] me ru rie osẹri rọ kẹ ahwo kpobi osu gbe oletu rọ kẹ ahwo kpobi.” Jesu ọ ghinẹ riẹ epanọ a re su. Ọ tẹ jẹ riẹ igodẹ riẹ gbe iruẹru rai. Evaọ uzẹme, okenọ ọ kiẹ ikoko ihrẹ nọ e jọ Esia Minor na riwi, isiasoi ọ t’ẹme na nọ: “Mẹ riẹ iruo ra.” (Eviavia 2:2, 19; 3:1, 8, 15) Jesu ọ riẹ ẹgwọlọ mai re, wọhọ epanọ Ọsẹ riẹ, Jihova, ọ riẹ. Taure ọ tẹ te kẹ Olẹ Oriruo na, Jesu ọ ta nọ: “Ọsẹ rai ọ riẹ eware nọ ikiọkọ kẹ owhai no re wha tẹ tẹ be yare ie.”—Matiu 6:8-13.
Romatotọ Kiẹ Eware Aghae Via
Uvie Ọghẹnẹ O te Raha Ewegrẹ Riẹ No
10 Oke oziẹobro. Ewegrẹ Uvie Ọghẹnẹ a vẹ te ruẹ oware nọ u ti ru ai rova vi epaọ ọsosuọ. Jesu ọ ta nọ: “A vẹ te ruẹ Ọmọ ohwo nọ ọ be nyaze evaọ ẹgho avọ ogaga gbe oruaro ulogbo.” (Mak 13:26) Edhere igbunu yena nọ Jesu o ti ro dhesẹ ogaga riẹ na u ti dhesẹ via nọ ọ nyaze ti bruoziẹ no. Evaọ abọ ọfa ọrọ ẹme nọ ọ ta kpahe edẹ urere na, Jesu ọ ta ẹme ziezi kpahe oziẹ nọ o ti bru oke yena. Ma rẹ ruẹ onana evaọ ọtadhesẹ igodẹ gbe ewe na. (Se Matiu 25:31-33, 46.) Otu nọ ọ romakpotọ kẹ Uvie Ọghẹnẹ họ “igodẹ” na, yọ a te “kpare uzou rai rri ehru” keme a riẹ nọ “esiwo rai ọ be kẹle no.” (Luk 21:28) Rekọ otu nọ ọ wọso Uvie Ọghẹnẹ kpobi họ “ewe,” yọ a te “vọ avọ uweri” keme a riẹ nọ “ọraha ebẹdẹ bẹdẹ” ọ be hẹrẹ ae.—Mat. 24:30; Evia. 1:7.
Oruvẹ no Obe Eviavia Ze—I
2:7—Eme họ “[Aparadase] Ọghẹnẹ na”? Nọ o rọnọ Ileleikristi nọ a rọ ẹzi wholo na họ enọ a kere eme nana se na, aparadase nana họ oria nọ Ọghẹnẹ omariẹ ọ be rria evaọ obọ odhiwu onọ u woma thesiwa. A te kẹ Ileleikristi nọ a rọ ẹzi wholo na uvẹ nọ a rẹ rọ re “ubi-ure uzuazọ.” A ti gbe whu ofa ha.—1 Kọr. 15:53.
AKPEGBỌVO 25–AKPEGBIVẸ 1
EWARE AGHAE NỌ E RRỌ EBAIBOL NA | EVIAVIA 4-6
“Edhẹ-Enyenya Ene Na”
Edhẹ-Enyenya Ene Na—Yọ Amono?
Ono ọ be dhẹ anyenya ọfuafo nana? Ebaibol na o fiobọhọ kẹ omai riẹ ọnọ ọ be dhẹ anyenya ọfuafo na evaọ obe Eviavia. A se rie uwhremu na “Ẹme Ọghẹnẹ” evaọ oria ofa obe Eviavia. (Eviavia 19:11-13) Jesu họ ọnọ a se Ẹme na, keme ọye họ ọtota Ọghẹnẹ. (Jọn 1:1, 14) U te no ere no, a se Jesu “Ovie ivie gbe Olori ilori,” a te je dhesẹ iẹe wọhọ “Osẹri uzẹme nọ a re fievahọ.” (Eviavia 19:16) O rrọ vevẹ inọ Jesu Ovie na, o wo udu nọ o re ro fi kparobọ, rekọ ọ rẹ rọ ogaga riẹ kienyẹ ahwo hayo ruiruo thọthọ họ. Ghele na, enọ jọ e riẹ nọ u fo nọ ma rẹ kiyo rai.
wp17.3 4 ¶5
Edhẹ-Enyenya Ene Na—Yọ Amono?
Oke vẹ edhẹ-enyenya na a ro muhọ ẹdhẹ? Muẹrohọ nọ Jesu nọ ọ be dhẹ anyenya ọsosuọ na, o muhọ ẹdhẹ nọ a nwane rehọ etu-uvie kẹe no, koyehọ nọ a nwane rehọ iẹe mu Ovie no. (Eviavia 6:2) Oke vẹ a rọ rehọ Jesu mu Ovie evaọ obọ odhiwu? Orọnikọ okenọ Jesu ọ nwani te obọ odhiwu a rọ rehọ iẹe mu Ovie he. Ebaibol na o dhesẹ nọ Jesu ọ hẹrẹ omojọ tao. (Ahwo Hibru 10:12, 13) Jesu ọ kẹ ilele riẹ eka sa-sa nọ a te rọ riẹ okenọ ohẹrẹ na u ti ro kuhọ gbe oke nọ o ti ro muhọ esuo evaọ obọ odhiwu. Jesu ọ ta nọ o te muhọ esuo no evaọ obọ odhiwu, eware iyoma buobu e te via evaọ otọakpọ na. Ahwo a ti fi ẹmo, ohọo u ti mu, yọ ikpeyao e te jọ. (Matiu 24:3, 7; Luk 21:10, 11) Nọ Ẹmo Akpọ Ọsosuọ ọ nwani muhọ no evaọ ukpe 1914, o tẹ jọ vevẹ inọ Jesu o muhọ esuo no, fikiere oke yena ma rọ ruọ etoke obẹbẹ nọ Ebaibol na o se “edẹ urere na.”—2 Timoti 3:1-5.
Edhẹ-Enyenya Ene Na—Yọ Amono?
Ọnọ ọ be dhẹ anyenya nana o dikihẹ kẹ ẹmo-ofio. Muẹrohọ nọ orọnikọ erẹwho jọ ọvo o si udhedhẹ no ho, rekọ akpọ na soso. Evaọ ukpe 1914, Ẹmo Akpọ Ọsosuọ o te du lahwe. Kẹsena Ẹmọ Akpọ Avivẹ o te lele iei, yọ ọye ọ tubẹ mae wha ọraha ze kparobọ. Ekiakiẹ jọ i dhesẹ nọ anwọ ukpe 1914 ze, ahwo nọ a jọ ẹmo gbe ozighi kpe no a bu vrẹ ima udhusoi (100,000,000) no! Yọ enọ e nwoma i bu wumuo ho.
wp17.3 5 ¶4-5
Edhẹ-Enyenya Ene Na—Yọ Amono?
“Mẹ tẹ ruẹ anyenya obiebi, yọ ọnọ ọ keria ehru riẹ o kru oware nọ a rẹ rọ wawọ eware họ obọ. Me te yo edo urru jọ evaọ udevie ikọ-odhiwu ene na nọ o ta nọ: ‘Unuigho ugbogbo eka họ dinariọs, yọ unuigho igbogbo esa ebali họ dinariọs; rekọ who du ru re ewhri olivi gbe udi na u re he.’”—Eviavia 6:5, 6.
Ọnọ ọ be dhẹ anyenya nana o dikihẹ kẹ ohọo. Who te muẹrohọ whọ rẹ ruẹ nọ emu ọ ghare te epanọ a jẹ rọ zẹ ugbogbo eka dinariọs (0.7 kilos), koyehọ unuigho nọ a rẹ hwa oruiruo evaọ okpẹdoke soso evaọ ikpe udhusoi ọsosuọ! (Matiu 20:2) Yọ unuigho ovona a jẹ zẹ igbogbo esa ebali (2.1 kilos), enọ i wo aghare te eka dede he. Kọ eme emu yena o re te ru evaọ uviuwou nọ ahwo buobu a rrọ? Eruẹaruẹ nana e be vẹvẹ ahwo unu re a kẹnyẹ emu nọ a wo, keme eware nọ a fodẹ na wọhọ olivi gbe udi yọ eware nọ ahwo a jẹ hai ro there emu evaọ oke yena.
wp17.3 5 ¶8-10
Edhẹ-Enyenya Ene Na—Yọ Amono?
Ọnọ ọ be dhẹ anyenya avene na o dikihẹ kẹ uwhu, yọ ọ be rehọ ẹyao gbe eware efa tehe ahwo. Nọ ukpe 1914 o nwane vrẹ no, ẹyao ọtehekọ o kpe ima idu ahwo buobu. O tẹ kawo, ahwo nọ a bu te ima egba isoi (500,000,000) ae ẹyao na ọ tehe, koyehọ omọvo evaọ usu imasa evaọ ahwo nọ a jọ akpọ oke yena!
Rekọ ẹyao ọtehekọ na yọ emuhọ gheghe. Ahwo nọ a re ru ekiakiẹ a dhesẹ nọ ẹyao nọ a re se smallpox, ọye ọ tubẹ mai kpe ahwo bu evaọ etoke ikpe udhusoi avọ udhe na. Rite inẹnẹ, ẹyao AIDS, owọre ogaga, gbe uliaro, i bi kpe ahwo buobu ghelọ ẹnyaharo nọ ahwo a wo no evaọ ofẹ imu.
O tẹ make rrọ ẹmo, ohọo, hayo ẹyao, oware ovona u bi noi ze, koyehọ uwhu. Uki o be re ohrọ ohwo ọvo ho, o be rehọ ahwo ọvo.
Romatotọ Kiẹ Eware Aghae Via
re 76-77 ¶8
Oruaro Agbara-Uvie Jihova Evaọ Obọ Odhiwu
8 Jọn ọ riẹ nọ a jẹ hae rehọ izerẹ mu re a gbodibo evaọ uwou-udhu na evaọ oke anwae. Fikiere oware nọ ọ ta nọ ọ ruẹ na u gbe rie unu gaga, ọ ta nọ: “Egbara-uvie udhegbene e wariẹ agbara-uvie na họ, mẹ tẹ ruẹ ekpako udhegbene nọ i ku iwu efuafo họ nọ e keria egbara-uvie nana, yọ a ku itu-uvie igoru họ uzou.” (Eviavia 4:4) Viukpọ izerẹ, Jọn ọ ruẹ ekpako udhegbene nọ e keria egbara-uvie je ku itu-uvie họ wọhọ ivie. Amono họ ekpako nana? Ekpako nana họ Ileleikristi nọ a rọ ẹzi wholo na, enọ a kpare kpobọ odhiwu no je wo ọkwa nọ Jihova ọ ya eyaa riẹ kẹ ai te obọ no. Ẹvẹ ma rọ riẹ onana?
re 80 ¶19
Oruaro Agbara-Uvie Jihova Evaọ Obọ Odhiwu
19 Amono emama nana i dikihẹ kẹ? Eruẹaruẹ Izikiẹl i re fiobọhọ kẹ omai ruẹ uyo onọ nana. Izikiẹl ọ jọ eruẹaruẹ ruẹ Jihova nọ ọ keria agbara-uvie evaọ obehru akẹkẹ obọ odhiwu riẹ, onọ emama nọ e rrọ uzuazọ nọ e wọhọ enọ Jọn o dhesẹ na e jọ kugbe. (Izikiẹl 1:5-11, 22-28) Uwhremu na, Izikiẹl ọ wariẹ ruẹ akẹkẹ yena avọ emama nọ e rrọ uzuazọ na. Rekọ evaọ onana, Izikiẹl o dhesẹ emama nọ e rrọ uzuazọ na inọ yọ chẹrub. (Izikiẹl 10:9-15) Emama ene nọ e rrọ uzuazọ nọ Jọn ọ ruẹ na i dikihẹ kẹ chẹrub Ọghẹnẹ nọ e rrọ buobu, enọ i wo ọkwa okpehru evaọ usu emama ẹzi Jihova. U ti gbe Jọn unu hu fikinọ ọ ruẹ chẹrub nọ i dikihẹ kẹle Jihova, keme evaọ uwou-udhu anwae na, chẹrub ivẹ nọ a rọ igoru ru e jọ ehru ururu etehe ọvo na, onọ u dikihẹ kẹ agbara-uvie Jihova. Yọ udevie chẹrub ivẹ nana Jihova ọ jẹ hae jọ jie uzi kẹ orẹwho Izrẹl.—Ọnyano 25:22; Olezi 80:1.
“Riri Okpohrokpo Orua Juda”
5 A riẹ okpohrokpo kẹ aruọwha. Kọ who dikihẹ kẹle okpohrokpo ọzae ovao-dhe-ovao no ẹdẹjọ? Otẹrọ ere, ẹsejọhọ ọ jọ oria nọ a jọ rehọ iwhaya diogba wariẹe họ. Ghele na, o rẹ wha idudu họ ohwo oma. Nọ who te rri ovao arao owhẹwhẹvu nana, nọ o je rri owhẹ zihe, whọ sai roro ku oware nọ u re ru ozọ mu ei hi. Ebaibol e ta nọ “okpohrokpo, nọ ọ mae ga evaọ udevie erao kpobi, . . . o re zihe kpo emu kẹ ọvuọvo ho.” (Itẹ 30:30) Oghẹrẹ udu utioye na Jesu o wo.
6 Joma ta kpahe idhere esa nọ Jesu o ro dhesẹ nnọ ọ g’udu wọhọ okpohrokpo: ọ tha uzẹme na uke, ọ wha uvi-ẹdhoguo haro, ọ tẹ jẹ rọ udu dhe ọwọsuọ. Ma te jẹ ruẹ nọ mai kpobi, makọ enọ i wo udu vẹre he, ma sae rọ aro kele Jesu dhesẹ aruọwha.