Enọ Ahwo nọ A s’Ebe

Didi iyero e lẹliẹ Juda lele aye nọ o roro fihọ ogberẹ wezẹ, wọhọ epanọ o rrọ Emuhọ 38:15, 16?

Dede nọ Juda o lele aye nọ o roro fihọ ogberẹ wezẹ, orọnikọ ogberẹ aye na ọ ghinẹ jọ họ. Wọhọ epanọ Emuhọ uzou avọ 38 o ta, oware nọ o via ona.

Ọghẹnẹ ọ tehe ọmọzae ọtuyẹ Juda kpe taure Tama, aye riẹ, o te ti yẹ ọmọzae kẹe keme ọ “jọ ohwo omuomu evaọ aro ỌNOWO na.” (Emuhọ 38:7) Eva oke oyena, a wo uruemu ọ orọo oniọvo-ọzae. Onana o gwọlọ nọ okenọ ọzae o te whu ababọ ọreuku, oniọvo ọzae na o re lele aye na wezẹ re ọ ruẹsi yẹ ọreuku kẹ ọzae riẹ nọ o whu na. Rekọ Onan, ọmọzae avivẹ Juda, ọ rọwo lele aye oniọvo riẹ wezẹ hẹ. Fikiere, o te whu fiki ẹdhoguo Ọghẹnẹ. Kẹsena, Juda o te vi Tama, aye ọmọ riẹ na zihe kpohọ obọ uwou ọsẹ riẹ bẹsenọ Shila, ọmọzae avesa Juda, ọ rẹ kpako te ohwo no. Dede na, nọ oke o be dhẹ haro na, Juda ọ rehọ Tama kẹ Shela rọo ho. Fikiere okenọ aye Juda o whu, Tama ọ tẹ gbẹ edhere nọ ọ rẹ rọ rehọ ẹkwoma Juda, ohwo Izrẹl nọ ọ rrọ ọsẹ-orọo riẹ na, wo ọreuku. O ru onana ẹkwoma ẹgọ nọ ọ gọ wọhọ ogberẹ etẹmpol ọ tẹ keria akotọ edhere nọ ọ riẹ nnọ Juda ọ te nya vrẹ.

Fikinọ o vuhu Tama ha, Juda o te lele iei wezẹ. Wọhọ osa nọ o ro lele iei wezẹ, Tama ọ tẹ rehọ areghẹ mi Juda ekwakwa jọ, ọ tẹ rehọ eware nana dhesẹ kẹe evaọ obaro inọ ọye ọ kẹ riẹ eva. Okenọ uzẹme na o lahwe, Juda ọ fo riẹ hẹ rekọ ọ ta avọ omarokpotọ nọ: “Aye na o kiẹrẹe vi omẹ, fiki epanọ mẹ re riẹ kẹ Shela ọmọzae mẹ re ọ jọ aye riẹ hẹ.” Yọ nwani fo, “o gbe je lele iei wezẹ ofa ha.”—Emuhọ 38:26.

Juda o ru thọ nọ ọ rọ rehọ Tama kẹ Shela ọmọzae riẹ wọhọ epanọ ọ yaa ha. O te je lele aye nọ o roro fihọ ogberẹ etẹmpol wezẹ. Onana o wọso ẹjiroro Ọghẹnẹ, onọ o ta nọ aye nọ ọ rehọ ọvo ọzae o re lele wezẹ. (Emuhọ 2:24) Rekọ uzẹme riẹ họ, orọnikọ ogberẹ Juda o ghine lele wezẹ hẹ. Ukpoye, ọ rọ ogbori rehọ ẹta Shela ọmọzae riẹ evaọ ẹruọ orọo oniọvo-ọzae ọ tẹ rehọ enẹ yẹ ọre-uku kẹ ọmọ riẹ nọ o whu no.

Rọkẹ Tama, a rẹ rehọ iẹe wọhọ ẹnwae-obro ho fikinọ o lele Juda wezẹ. A rehọ emezae ejime riẹ wọhọ emọ igberedha ha. Okenọ Boaz ohwo Bẹtlẹhẹm na ọ rehọ Ruth ohwo Moab na evaọ orọo oniọvo-ọzae, ekpako Bẹtlẹhẹm a ta ẹme ezi kpahe Pẹrẹz, ọmọzae Tama, ta kẹ Boaz inọ: “A jọ uwou ra o jọ rọ uwou Pẹrẹz, nọ Tama o yẹ rọ kẹ Juda, fiki emọ nọ ỌNOWO na ọ te rọ kẹ owhẹ no obọ uvovo aye ọnana ze.” (Rut 4:12) A kele Pẹrẹz kugbe esẹ-anwae Jesu Kristi re.—Matiu 1:1-3; Luk 3:23-33.