Ma Yere Ọghẹnẹ gbe Kristi Rọkẹ Ufuoma nọ Ma ti Wo Evaọ Obaro

Ebẹbẹ jọ vẹ whọ be rẹriẹ ovao dhe kẹdẹ kẹdẹ? Kọ whẹ yọ ọsẹ nọ ọ be rẹrote ewha-iruo buobu? Kọ whẹ yọ ọsẹ hayo oni nọ whẹ ọvo whọ be rẹrote uviuwou ra? Kọ whẹ yọ uzoge nọ ehwa ra e be gwọlọ ẹme evaọ obọ isukulu kẹse kẹse? Kọ ẹyao hayo owho o be lahiẹ owhẹ? Uzẹme riẹ họ, ohwo kpobi o wo ẹbẹbẹ jọ nọ o bi lele muabọ. Ileleikristi buobu a be rẹriẹ ovao dhe ebẹbẹ buobu evaọ oke ovona. Rekọ, ma riẹ nọ kẹle na Jihova o ti si ebẹbẹ nana kpobi no otọ no.​—2Kọ 4:16-18.

Bọo oke yena, udu u re te omai otọ keme ma riẹ nọ Jihova ọ riẹ ebẹbẹ nọ ma be rẹriẹ ovao dhe, o rri omai omomọvo ghaghae, yọ ọ te ghale omai evaọ obaro fiki uyoyou nọ ma wo kẹe gbe ithihakọ mai. (Jer 29:11, 12) Jesu omariẹ o rri omai ghaghae re. Fikiere, joma ruabọhọ iruo Uvie na keme Jesu ọ kẹ omai imuẹro inọ: “Mẹ rrọ kugbe owhai.” (Mt 28:20) Nọ ma tẹ be hae rehọ omoke jọ roro didi kpahe epanọ Uvie Ọghẹnẹ u ti ro si ebẹbẹ mai kpobi no evaọ obaro, u ti ru nọ ẹruore mai o te rọ jọ gaga yọ ma te sai thihakọ ebẹbẹ nọ i bi te omai enẹna.​—Rom 8:19-21.

WHA RRI IVIDIO NA NỌ ẸKPORO NA Ọ BE ZE NA, TẸROVI JESU!​—EGHALE UVIE NA NỌ MA BI RẸRO RAI, KẸSENA WHA VẸ KIYO ENỌ NANA:

• Oghẹrẹ vẹ ahwo-akpọ a rọ hẹriẹ oma no Ọghẹnẹ, kọ eme o no rie ze no?

• Eghale vẹ i ti te ahwo nọ a yoẹme kẹ Jihova evaọ obaro?

• Eme o ru rie lọhọ nọ ma ti ro wo eghale nana kpobi evaọ obaro?

• Eghale jọ vẹ who bi rẹro rai evaọ akpọ ọkpokpọ nọ a ya eyaa riẹ na?