Enọ Ahwo nọ A s’Ebe

Kọ Ọtausiuwoma Na 5:8 o be ta kpahe isu ahwo-akpọ ọvo, manikọ te Jihova?

Oria ikere nana o ta nọ: “Whọ tẹ ruẹ oyogbe nọ a bi kienyẹ jẹ ruẹ nọ a bi bru uvioziẹ hẹ je bi ru oware nọ u kiẹrẹe he evaọ ubrotọ ra, jọ oyena u gbe owhẹ unu hu. Keme ohwo jọ ọ riẹ nọ o kpehru vi ohwo ologbo esuo yena nọ o bi rri rie, yọ amọfa a riẹ nọ i kpehru vi ahwo yena re.”​—Ọtausi. 5:8.

O wọhọ nọ oria ikere nana o be ta kpahe isu ahwo-akpọ. Rekọ ma te rri rie oghẹrẹ ofa, ma rẹ sae ta nọ oria nana u bi dhesẹ nọ Jihova o bi muẹrohọ isu ahwo-akpọ, yọ onana o rẹ sae kẹ omai ẹruore gbe omosasọ.

Ọtausiuwoma Na 5:8 o be ta kpahe osu nọ o re kienyẹ iyogbe, nọ o re bru uvioziẹ kẹ ae he. U fo nọ osu otiọye na ọ rẹ kareghẹhọ nọ ẹsejọhọ omọfa jọ nọ o wuzou vi ei evaọ egọmeti na o bi muẹrohọ oware nọ o bi ru na. O sae tubẹ jọ nọ u wo ejọ nọ i kpehru vi ọnọ o bi rri rie na. Whaọ evaọ esuo ohwo-akpọ, isu na kpobi te esese te ilogbo a sai kienyẹ ahwo. Oware riẹ u gbo kẹhẹ.

Rekọ osu ọvuọvo ọ gbẹ make rrọ orẹwho mai nọ o re bru uvioziẹ kẹ omai hi, ma riẹ nọ Jihova o bi ‘rri ahwo ologbo’ nọ e rrọ egọmeti na. Ma rẹ sae lẹ se Ọghẹnẹ je gbolo owha mai kẹe. (Ol. 55:22; Fil. 4:6, 7) Ma riẹ nọ “ibiaro Jihova i bi rri kpenẹ avọ enẹ evaọ otọakpọ na soso re o dhesẹ ẹgba riẹ fiki ahwo nọ a rehọ udu rai kpobi kẹe.”​—2 Irv. 16:9.

Fikiere Ọtausiuwoma Na 5:8 o be kareghẹhọ omai oghẹrẹ nọ egọmeti ahwo-akpọ a ginẹ rrọ, inọ evaọ isuẹsu, ohwo ọ rro vi ohwo. Yọ oware nọ o mai wuzou nọ oria ikere nana o rẹ kareghẹhọ omai họ, Jihova họ osu nọ ọ mai kpehru. Ọye họ Erumeru na. Ma be ta ẹme na, isuẹsu riẹ i muhọ no, yọ Ọmọ riẹ Jesu Kristi họ ọnọ o ro mu Ovie. Erumeru na ọ be ruẹ oware kpobi nọ o be via. O re kienyẹ ohwo ọvo ho, yọ ere Ọmọ riẹ ọ rrọ re.