Ovuẹ nọ O Rrọ Ebaibol Na

Nọ 4026 B.C.E. o vrẹ no

“Araomuomu na” ọ ta ẹme wọso udu nọ Jihova o re ro su gbe oghẹrẹ nọ o bi ro su. Jihova ọ ya eyaa nọ “ọmọ” hayo “ubi” jọ ọ te romavia nọ o ti kpe araomuomu na no, koyehọ Setan. (Emuhọ 3:1-5, 15, ẹme-obotọ) Rekọ Jihova ọ kuvẹ re ahwo-akpọ a su omarai evaọ otọ araomuomu na.

1943 B.C.E.

Jihova ọ ta kẹ Abraham nọ uyẹ riẹ “ọmọ” nọ ọ ya eyaa riẹ na o ti no ze.—Emuhọ 22:18.

Nọ 1070 B.C.E. o vrẹ no

Jihova ọ kẹ Devidi ovie na imuẹro gbe Solomọn ọmọ riẹ evaọ uwhremu na inọ uyẹ rai “ọmọ” nọ ọ ya eyaa riẹ na o ti no ze.—2 Samuẹle 7:12, 16; 1 Ivie 9:3-5; Aizaya 9:6, 7.

29 C.E.

Jihova o dhesẹ via nọ Jesu họ “ọmọ” nọ ọ ya eyaa riẹ na, ọnọ ọ rrọ Ọreuku agbara-uvie Devidi.—Ahwo Galesha 3:16; Luk 1:31-33; 3:21, 22.

33 C.E.

Setan, araomuomu na ọ nwa “ọmọ” nọ a ya eyaa riẹ na oma fihọ otọ evaọ ubroke ẹkwoma ekpe nọ a kpe Jesu. Jihova ọ kpare Jesu kpobọ odhiwu, ọ tẹ jẹ idhe nọ Jesu ọ rehọ uzuazọ ogbagba riẹ dhe rehọ re ọ rọ fiki riẹ rọ izieraha rọvrẹ emọ Adamu jẹ kẹ ae uzuazọ ebẹdẹ bẹdẹ.—Emuhọ 3:15; Iruẹru Ikọ 2:32-36; 1 Ahwo Kọrint 15:21, 22.

Oware wọhọ 1914 C.E.

Jesu o gbolo araomuomu na, Setan, fihọ otọakpọ na je bru rie dhe otọakpọ na evaọ omoke kakao.—Eviavia 12:7-9, 12.

Evaọ obaro

Jesu o ti fi Setan họ uwou-odi evaọ ikpe odu (1,000) kẹsena ọ vẹ te raha iẹe no, onọ u dhesẹ nọ ọ whọlọ e riẹ uzou no. Oke nana yọ ẹjiroro nọ Jihova ọ rọ ma otọakpọ na gbe ohwo-akpọ o rugba no, yọ a si ekela kpobi no odẹ riẹ no, je dhesẹ via no inọ isuẹsu riẹ e mai woma.—Eviavia 20:1-3, 10; 21:3, 4.