A Ko Omohọ Ekọlọ Ogorurẹ Fihọ Iwu Rai
Maud ọ be rria orẹwho France yọ o bi ru iruo evaọ isukulu jọ nọ ọ rẹ jọ rẹrote emọ nọ e ko evaọ okenọ a te bi wuhrẹ ai. Kẹle na, iticha jọ o je wuhrẹ emọ eklase jọ kpahe oware nọ o via evaọ etoke Ẹmo Akpọ Avivẹ nọ a jọ kpe ahwo Ju buobu gbidi gbidi, gbe oware nọ o via evaọ ega-uye ahwo Nazi. Evaọ oke yena, a je ko omohọ osese nọ u wo ekọlọ jọ fihọ ewu ahwo kpobi nọ a jọ ega-uye na. Ekọlọ omohọ nọ a ko fihọ ewu gbe oghẹrẹ nọ a biẹ riẹ u re dhesẹ oware nọ ohwo na ọ rọ rrọ uwou-odi.
Okenọ ọ jẹ ta kpahe omohọ ekọlọ ogorurẹ nọ u wo ibienẹ esa (nọ a se evaọ Oyibo purple-triangle) nọ a ko fihọ ewu utu ahwo jọ nọ a jọ ega na, ọ ta nọ: “Me roro nọ a ko omohọ nana fihọ ewu rai keme a jọ ezae nọ i re lele ezae wezẹ hayo eyae nọ i re lele eyae wezẹ.” Nọ iticha na o wuhrẹ re no, Maud ọ tẹ nyabru ei, o tẹ ta kẹe nọ ahwo Nazi na a jẹ hae rọ omohọ ekọlọ ogorurẹ na vuhu Isẹri Jihova.a Ọ tẹ jẹ vuẹ iticha nọ ọ te rọ ebe gbe ividio jọ sei nọ i ti fiobọhọ kẹe riẹ kpahe ẹme na ziezi. Iticha na ọ rọwo, ọ tẹ jẹ vuẹ Maud nọ ọ sae rehọ ae lele emọ eklase na ta ẹme.
Evaọ oke ofa nọ iticha ọfa o je wuhrẹ emọ eklase na kpahe uzoẹme ọvo nana, ọ tẹ rọ echate jọ dhesẹ iwoho eware nọ a ko fihọ iwu ahwo nọ a jọ ega-uye na kẹ ae. A jọ echate na dhesẹ vevẹ nọ omohọ ekọlọ ogorurẹ na a jẹ hai ro vuhu Isẹri Jihova. Nọ iticha na o wuhrẹ re no, Maud ọ tẹ vuẹ iẹe nọ ọ sai dhesẹ eware efa jọ kẹe kpahe uzoẹme nọ o je wuhrẹ emọ eklase na. Iticha na ọ tẹ rọwo, o te je ru ọruẹrẹfihotọ re Maud o dhesẹ eware nana kẹ emọ eklase na.
Maud nọ o kru ebe gbe ividio nọ o ro wuhrẹ na
Maud ọ tẹ ruẹrẹ oma kpahe re ọ rọ iminiti 15 dhesẹ eware na kẹ emọ eklase ọsosuọ na, rekọ nọ oke na u te, iticha na ọ tẹ ta kẹe nọ: “Whọ sae rọ auwa soso ru ei.” Oware ọsosuọ nọ Maud o ro muhọ họ, ọ kaki dhesẹ ividio nọ a jọ gbiku epanọ ahwo Nazi a je ro kpokpo Isẹri Jihova kẹ emọ eklase na. Nọ a jọ ividio na ta nọ ahwo Nazi a rehọ emọ Isẹri Jihova nọ i bu te egba eree (800) soso siọ esẹgbini rai ba, Maud ọ tẹ da ividio na ji re o se iku emọ esa jọ evaọ usu rai kẹ ai. Nọ ividio na o kporo re no, Maud o te se ileta jọ kẹ ae ro ku ẹme riẹ họ. Gerhard Steinacher nọ ọ jọ ikpe 19 nọ ọ rrọ Osẹri Jihova o kere ileta na evaọ ukpe 1940. O kere ileta na se ọsẹgboni riẹ ro yere ai kodẹ taure ahwo Nazi a te ti kpei.b
Eware ọvo nana Maud o dhesẹ kẹ eklase nọ o kiọkọ na re. Udu nọ Maud o wo na o wha emamọ iyẹrẹ ze. Enẹna, iticha ivẹ na a rẹ fodẹ Isẹri Jihova nọ a te bi wuhrẹ emọ isukulu rai kpahe ahwo nọ a jọ ega-uye ahwo Nazi na.
a Evaọ etoke Ẹmo Akpọ Avivẹ, a je fi Isẹri Jihova nọ e rrọ Germany họ uwou-odi keme a rọwo nọ a re wobọ evaọ esuo Nazi hi. Odẹ ọfa nọ a jẹ hai se ai evaọ oke yena họ Bibelforscher (Emọ-Uwuhrẹ Ebaibol).
b A bruoziẹ uwhu kpe Gerhard Steinacher fikinọ ọ se nọ o re kuomagbe isoja Germany. Evaọ ileta nọ o kere taure a te ti kpei, ọ ta nọ: “Ọmaha gheghe mẹ gbẹ rrọ. Mẹ be lẹ Olori na re ọ kẹ omẹ ẹgba re mẹ sai kru ẹrọwọ mẹ.” Okiokiọ riẹ evaọ ohiohiẹ, a te kpe Gerhard. Ẹme nọ a kere fihọ uki riẹ họ: “O whu fikinọ ọ gwọlọ kẹ Ọghẹnẹ orro.”