“Me Dikihẹ Ga! Me Dikihẹ Ga! Me Dikihẹ Ga!”
1 Eme eyena nọ Oleleikristi ẹrọwọ jọ nọ ọ zọ vrẹ Etoke Okpemuotọ na ọ ta na i dhesẹ ọtamuo Isẹri idu buobu—enọ e be rria gbe enọ i whu no—enọ i dikihẹ ga evaọ ẹrọwọ rai ghelọ evega Nazi. (Ẹf. 6:11, 13) A gbe iku aruọwha igbunu gbe obokparọ rai fihọ ividio nọ e rẹ kpare udu na Jehovah’s Witnesses Stand Firm Against Nazi Assault. Ma tuduhọ ahwo kpobi evaọ ukoko na awọ re a rri rie jẹ ta iroro rai kpahe iẹe via kẹ ohwohwo.
2 Jọ enọ enana e kpare iroro ra: (1) Fikieme Isẹri Jihova a je dikihẹ ga avọ aruọwha wọso ahwo Nazi na? (2a) Didi eriwo ọwọsuọ e jariẹ kpahe uyere jọ, kọ fikieme? (2b) Ẹvẹ onana u ro kpomahọ iviuwou Isẹri? (3) Bro Isẹri a fihọ ega uye, ẹvẹ a je ro vuhu ae, kọ ẹvẹ otu Gestapo na a je ru ai? (4) Didi oware inievo mai a se nọ a re ru re a wo ufuoma? (5a) Ẹvẹ gbe okevẹ Isẹri Jihova a rọ t’ẹme via wọso ogbimaza esuo Hitler na? (5b) Kọ didi owọ Hitler ọ jẹ? (6) Ẹvẹ okugbe ahwo Jihova ọ rọ jọ uzuazọ-usiwo kẹ ae gbe amọfa, evaọ abọ ugboma gbe abọ-ẹzi? (7) Didi ole Uvie a kere evaọ ega uye jọ? (8) Didi iriruo ọrọ ezae, eyae, gbe izoge ẹrọwọ e k’owhẹ ọwhọ re who kru ẹgbakiete ra kẹ Jihova, makọ oware nọ o rẹ via kpobi? (Je rri 1999 Yearbook na, ẹwẹ-obe avọ 144-147.) (9) Wọhọ omọvo Isẹri Jihova, didi iroro ividio nana i ru owhẹ wo kpahe seba ẹjọ abọjọ akpọ na?
3 Emamọ oriruo Isẹri Jihova nọ a dhesẹ evaọ ividio Stand Firm na ọ sai fiobọhọ kẹ izoge, makọ enọ e rọ Isẹri hi, re a rẹriẹ ovao ku eme-avro nọ i wuzou wọhọ omagbẹre, otunyẹ ọhwa, gbe iroro-oziẹbro. Whọ tẹ rọ uzoge nọ o bi kpohọ ekọleji hayo isukulu ikpehru, kọ whọ sae kẹ iticha ra uvẹ na re a rehọ okwakwa nana ro ruiruo evaọ eklase? Ẹsejọhọ whọ rẹ sae kẹ ae ekasẹte ividio na jọ je dhesẹ iẹe wọhọ ikuigbe nọ a riẹ tere he hayo wọhọ okerefihotọ nọ o wo uwuhrẹ uruemu.
4 Ividio Stand Firm na yọ okwakwa obọdẹ nọ a re ro dhesẹ epanọ ewuhrẹ Ọghẹnẹ ọ rẹ rọ k’omai ogaga abọ-ẹzi re ma ru Ọghẹnẹ eva were ẹkwoma edikihẹ ga kẹ oware nọ u kiehọ. (1 Kọr. 16:13) Ghale iẹe kugbe ohwo kpobi nọ o wo isiuru kpahe uzẹme na.