OBUFIHỌ RỌKẸ UVIUWOU | ORỌO
Epanọ Whọ Sae rọ Rehọ Emamọ Ubiẹro Rri Iruemu nọ E rẹ Dha Owhẹ Eva
Whọ rẹ gwọlọ ru eware idudhe, rekọ aye hayo ọzae ra ọ rẹ gwọlọ ma omaa eware kpobi kpahotọ.
Whọ rrọ dhedhẹ, yọ whọ rẹ kake ta ẹme he; rekọ ọrivẹ ra ọ rẹ sasa oma wumuo ho evaọ oria kpobi.
Kọ aye hayo ọzae ra o wo iruemu jọ nọ e rẹ dha owhẹ eva? Otẹrọnọ eye ọvo who re roro kpahe e sae raha orọo ra. Ebaibol na ọ ta nọ, “ọnọ o re dhe oware ọvona ẹtẹta ọ rẹ hẹriẹ egbẹnyusu ekpekpe.”—Itẹ 17:9.
Ukpenọ whọ rẹ kuvẹ re uruemu ọrivẹ ra nọ o rẹ dha owhẹ eva o wha ẹwhọ se owhai, whọ sai wuhrẹ epanọ whọ rẹ rọ rehọ emamọ ubiẹro rri uruemu riẹ na.
Evaọ uzoẹme nana
Epanọ whọ sae rọ rehọ emamọ ubiẹro rri iruemu nọ e rẹ dha owhẹ eva
Uruemu jọ nọ o rẹ dha owhẹ eva nọ ọrivẹ ra o wo o sae jọ oware nọ o lẹliẹ e riẹ wo uruemu ofa jọ nọ o rẹ were owhẹ. Roro kpahe iriruo esa jọ:
“Ọzae mẹ o re ru eware kpẹlẹ gaga, yọ ọ rẹ kake wọ kpohọ oria ha. Rekọ uruemu ovo yena o rẹ lẹliẹe wo odiri gaga, makọ rọkẹ omẹ dede. Ẹsejọ eva riẹ e rẹ dha omẹ fikinọ ọ kpẹlẹ ga hrọ, rekọ uruemu yena yọ oware jọ nọ o rẹ lẹliẹ oma riẹ were omẹ re.”—Chelsea.
“Aye mẹ ọ rẹ ma omaa eware kpatiẹ, yọ ọ rẹ gwọlọ nọ a rri rie nọ ọ be riẹ eware kpobi ru, oyena o rẹ lẹliẹ eva dha omẹ. O make rrọ ere na, eware e rẹ kake ruẹe ọza ha keme o re muẹrohọ omoware kpobi.”—Christopher.
“O rẹ wọhọ nọ ọzae mẹ o re se eware gboja ha, onana o rẹ lẹliẹ eware vẹso omẹ. O make rrọ ere na, oghẹrẹ nọ ọ rẹ romatotọ ru eware họ oware jọ nọ o ru rie dhẹ ruọ omẹ oma evaọ oke ọsosuọ. Yọ oghẹrẹ nọ ọ rẹ rọ fọ tou ababọ enuhu nọ oware uyoma jọ o tẹ via o rẹ were omẹ oma.”—Danielle.
Wọhọ epanọ Chelsea, Christopher, gbe Danielle a ruẹ vuhumu na, oware nọ ọrivẹ ra ọ be riẹ ru gbe onọ ọ be sae riẹ ru hu yọ abọ sa-sa uruemu ovona. Whọ sai gbolaro kẹ ọjọ siọ ọdekọ ba ha, nwane wọhọ epanọ whọ sai gbolo abọjọ ubiugho kufiẹ siọ abọdekọ ba ha na.
Ma riẹ nọ iruemu jọ i wo emamọ abọ họ. Wọhọ oriruo, Ebaibol ọ ta nọ “eva i re kri [ahwo jọ] ẹdha ha.” (Itẹ 29:22) Nọ o tẹ rrọ ere, u fo re ohwo yena ọ daoma kpobi siobọno “oghẹrẹ ẹgo oyoma kpobi, evedha, ofu, edo, [gbe] eme ekela.”a—Ahwo Ẹfisọs 4:31.
Rekọ otẹrọnọ uruemu jọ o be hai mu dha owhẹ eva gheghe, lele ohrẹ Ebaibol nana nọ o ta nọ: “Wha gbẹ hai thihakọ kẹ ohwohwo . . . nọ ohwo jọ ọ tẹ maki wo oware jọ nọ u re ru ei go kpahe omọfa.”—Ahwo Kọlọsi 3:13.
U te no ere no, daoma roro kpahe abọ owoma ọrọ uruemu nọ ọrivẹ ra o wo na, onọ o sae jọ nọ u si owhẹ kẹle iẹe evaọ oke ọsosuọ. Ọzae uwou-orọo jọ nọ a re se Joseph ọ ta nọ, “Nọ ohwo ọ tẹ be tẹrovi uruemu jọ nọ o rẹ dha eva, o wọhọ epaọ ẹsenọ ọ be ruẹ akọ oria jọ nọ o rrọ dada evaọ edaemọno rekọ ọ be ruẹ elo nọ o bi no edaemọno na ze he.”
Omaa nọ wha sai lele rọ ta ẹme kugbe
Orọ ọsosuọ, whai omomọvo ọ sai roro kpahe enọ nana. Kẹsena wha vẹ ta ẹme kpahe iyo nọ wha kẹ kugbe ohwohwo.
Kọ ọrivẹ ra o wo uruemu jọ nọ who roro nọ o be wha ẹbẹbẹ fihọ orọo na? Uyo na o tẹ rrọ Ee, kọ didi uruemu?
Kọ uruemu na u yoma gaga, manikọ u re mu dha owhẹ eva gheghe?
Kọ uruemu na u wo abọ owoma jọ? Uyo na o tẹ rrọ Ee, kọ abọ owoma vẹ u wo? Kọ eme o lẹliẹ uruemu yena nọ ọrivẹ ra o wo na were owhẹ?
a Rri izoẹme nana, “Epanọ Whọ Sae rọ Kpọ Ofu Ra,” “How to Avoid Hurtful Speech,” gbe “How to Stop Arguing.”