A rọ Unevaze Fialoma Via—Evaọ Albania gbe Kosovo

Gwen nọ o no obọ England ze ọ ta kpahe usi uwoma na nọ ọ nyae ta evaọ Albania nọ a mae jọ gwọlọ etausiuwoma inọ: “Me roro ẹdẹvo ho inọ mẹ te sae rọ oke mẹ kpobi gọ Jihova enẹ.”a

Gwen yọ omọvo jọ evaọ usu Isẹri Jihova buobu nọ e kwa ziọ Albania ti fiobọhọ koko “eware eghaghae erẹwho” na họ. (Hagai 2:7) Eme ọ lẹliẹ etausiuwoma nana ru ere? Eme a siobọno hayo kpairoro vrẹ re a sae kwa? Kọ eghale vẹ a wo nọ i fiobọhọ kẹ ae thihakọ no ghelọ ebẹbẹ nọ a wo?

A Wo Iyero Sa-Sa Rekọ A Wo Isiuru Ọvo Na

Oware ovona o lẹliẹ etausiuwoma kpobi nọ e kwa ze ti fiobọhọ evaọ Albania na kwa ze, oye họ: A you Jihova, yọ a gwọlọ fiobọhọ kẹ ahwo re a ruẹse riẹe.

Re a tẹ te kwa, a nwene eware jọ evaọ uzuazọ rai re a sae gbẹ gọ Jihova ziezi, yọ onana u fiobọhọ kẹ ae thihakọ ebẹbẹ nọ a nyaku evaọ orẹwho ofa. Gwen ọ ta nọ: “Mẹ kaki kuomagbe utu nọ o rẹ rọ ẹvẹrẹ Albania ru ewuhrẹ evaọ ẹwho mẹ. Me te je kpohọ okokohọ evaọ obọ Albania. Kẹsena mẹ tẹ wariẹ zihe, mẹ tẹ rria obei omoke jọ re mẹ sai wuhrẹ ẹvẹrẹ na ziezi.”

Nọ Manuela ọ jọ ikpe 23, ọ kwa kpohọ ẹwho jọ evaọ orẹwho riẹ, Italy, re o fiobọhọ kẹ ukoko osese jọ. Ọ ta nọ: “Ikpe ene mẹ jọ obei. Me te yọ nọ a jọ obọ Albania gwọlọ etausiuwoma. Fikiere me te ru epanọ mẹ sae rọ jọ obei ru iruo ọkobaro evaọ umutho emerae jọ.

Ikpe ihrẹ ọvo Federica ọ jọ okenọ ọ jọ okokohọ nọ ọ nya yo iyẹrẹ nọ a se kpahe Albania. Ọ ta nọ: “Oniọvo nọ o je se iyẹrẹ na ọ ta nọ iwhowho-uvie evaọ Albania a bi mu ebe-uwuhrẹ Ebaibol buobu họ yọ ahwo buobu nọ a wo isiuru a be ziọ iwuhrẹ. Me te muọ ọsẹgboni mẹ họ ẹta kẹ inọ mẹ gwọlọ kpobọ Albania. U gbe rai unu inọ obọ Albania mẹ gwọlọ nya, rekọ ọsẹ mẹ ọ tẹ ta nọ, ‘Lẹ kpahe iẹe, yọ o tẹ ruọ Jihova, o ti yo olẹ ra na.’ Emerae jọ nọ i lele i rie, a te zizie uviuwou mẹ soso re ma nyae ta usi uwoma na evaọ Albania!” Ikpe buobu e vrẹ no, yọ enẹna Federic o wo ọzae no, odẹ ọzae riẹ Orges. Aimava a be rọ oke rai kpobi ta usi uwoma na evaọ Albania.

Nọ Gianpiero ọ nwrotọ no iruo no, tei te aye riẹ Gloria, a tẹ kwa kpobọ Albania. Ọ ta nọ “Obọ Italy ma jọ yọrọ emezae isoi mai. Emezae esa mai a kwa kpohọ orẹwho ọfa nọ a mae jọ gwọlọ etausiuwoma. Uzoẹme Uwou-Eroro jọ u duobọte omai udu gaga, onọ o ta nọ ‘Kọ Whọ Sai Kpohọ Obọ Masidonia?’ Ma keria ma te roro kpahe epanọ ma sae rọ kwa kpobọ Albania fiki usi uwoma ota, ma vẹ rehọ ugho ahwo nọ a nwrotọ no iruo no nọ a be hwa omẹ rọ rẹrote oma mai evaọ obei.”

A Romatotọ Ma Omaa Rai

Ahwo nọ a gwọlọ kwa kpohọ oria nọ a mae jọ gwọlọ etausiuwoma a rẹ romatotọ ma omaa kpahotọ ziezi je nwene eware jọ evaọ uzuazọ rai. (Luk 14:28) Orọ ọsosuọ, a rẹ ruẹ nọ a wo edhere nọ a re ro wo ugho rẹrote omarai. Okenọ Gwen nọ ma fodẹ ẹsiẹe na ọ gbẹ jọ obọ England, ọ rọ kake kwa nyae rria kugbe oniọvo riẹ re ọ sai koko ugho. Sophia avọ Christopher nọ i no England ze re, a ta nọ: “Ma zẹ omoto mai gbe eware uwou mai jọ. Ma je rẹro nọ ma te sae jọ Albania te ukpe ọvo.” Rekọ a jọ obei kri vrẹ ere.

Etausiuwoma jọ a rẹ jọ Albania emerae jọ, a ve zihe kpohọ orẹwho rai nyai ru iruo je koko ugho họ, kẹsena a ve te zihe kpobọ Albania. Ere Eliseo avọ Miriam a ru. Eliseo ọ ta nọ: “Ofẹ Italy nọ erara e rẹ nyaze ti rri ughe oye Miriam o no ze, fikiere o lọhọ gaga re a ruẹ iruo ubroke. Ma re kpohọ obei nyai ru iruo emerae esa evaọ ezi uvewhru, emerae izii nọ i kiọkọ kọ ugho yena ma rẹ rọ rẹrote omamai evaọ obọ Albania. Enẹ ma ru evaọ ikpe isoi.”

A Fi Ebẹbẹ Kparobọ

Nọ etausiuwoma e tẹ kwa kpohọ oria okpokpọ, o gwọlọ nọ a rẹ daoma re oria okpokpọ na o reriae oma, rekọ ohrẹ gbe oriruo inievo nọ e rrọ ẹwho nọ a kwa kpohọ na i re fiobọhọ kẹ ai fi ebẹbẹ nana kparobọ. Sophia nọ ma fodẹ ẹsiẹe na, ọ ta nọ: “Evaọ oke uriri evaọ Albania, edhedhe nọ ọ rẹ jọ iwou ọ rẹ ga vi orọ obonọ ma no ze. Inievo na me je rri rọ gọ ẹgọ nọ o fo kẹ ekpahe na.” Grzegorz avọ aye riẹ Sona a no Poland ze te ta usi uwoma evaọ Prizren, ẹwho nọ o wo erru gaga evaọ Kosovo.b Grzegorz ọ ta nọ: “Inievo nọ e rrọ ẹwho na a wo omaurokpotọ gaga, a rrọ wowou, je wo odiri. A bi fiobọhọ kẹ omai wuhrẹ ẹvẹrẹ na gbe eware efa buobu. Wọhọ oriruo, a dhesẹ eria nọ ma sae jọ dẹ eware kuẹku kẹ omai, yọ a dhesẹ epanọ ma rẹ rọ jọ eki na dẹ eware kẹ omai re.”

A Wo Ẹjiroro Buobu nọ A rẹ rọ Ghọghọ

Ahwo nọ a kwa kpohọ orẹwho ofa a re mu usu okpekpe kugbe inievo ẹkwotọ na nọ a be riẹ ae ziezi na. Sona ọ ta nọ: “Mẹ ruẹ epanọ uyoyou Jihova u wo ẹgba te no. Inievo na a ru ẹrọwọ mẹ ga no keme mẹ ruẹ epanọ a nwene uzuazọ rai gbe eware nọ a rọwo vẹre nọ a wuhrẹ kpahe Jihova. Evaọ ukoko na, a dede omai rehọ ziezi, yọ ma ruẹ epanọ ma sai ro fiobọhọ. Mai kpobi ma be gọ Jihova kugbe wọhọ egbẹnyusu. (Mak 10:29, 30) Gloria ọ ta nọ: “Mẹ riẹ inievo-emetẹ buobu nọ i thihakọ ọwọsuọ evaọ obọ ahwo nọ a mukpahe Isẹri Jihova evaọ ẹwho na. U duobọte omẹ udu gaga nọ mẹ ruẹ epanọ a you Jihova te.”

Ahwo nọ a kwa kpohọ oria nọ a mae jọ gwọlọ etausiuwoma a re je wuhrẹ eware buobu nọ a hae te sae jọ obọ ẹwho rai wuhrẹ hẹ. Wọhọ oriruo, a ruẹ no inọ re ohwo ọ kwa kpohọ ẹwho ọfa re ọ sai wobọ ziezi evaọ iruo Jihova o rẹ wha oghọghọ ze. Stefano ọ ta nọ: “Evaọ orẹwho mẹ, ifonu ma rẹ mae rọ ta usi uwoma, yọ ma rẹ ta ẹme mai kpẹkpẹe. Rekọ ahwo Albania a rẹ gwọlọ ta ẹme oke lelehie, maero nọ egho ekọfi ọ tẹ rrọ obọ rai nọ a be da. Fikinọ mẹ rẹ vuoma gaga, o jọ bẹbẹ kẹ omẹ oke ọsosuọ, yọ mẹ riẹ ẹme nọ mẹ rẹ ta ha. Rekọ u kri hi, me te wuhrẹ epanọ a rẹ daezọ amọfa ziezi, yọ o be were omẹ oma gaga enẹna re me lele ai ta ẹme. Usi uwoma ota u bi ru eva were omẹ gaga enẹna.”

Leah avọ William ọzae riẹ a no obọ United States kpobọ Albania. Leah ọ ta nọ: “Usi uwoma ota evaọ obonẹ u rovie udu gbe iroro mai no, oghẹrẹ nọ ma bi rri eware enẹna gbe oghẹrẹ nọ ma bi yeri uzuazọ u wo ohẹriẹ no. Ma wuhrẹ eware buobu kpahe epanọ ma sai ro ru ọghọ, rọ adhẹẹ kẹ amọfa, jẹ jọ emamọ egbẹnyusu. Ma wuhrẹ idhere ekpokpọ no nọ ma rẹ rọ ta usi uwoma, rọ Ebaibol na fiobọhọ kẹ ahwo roro, jẹ ta ẹme ududu.” William ọ ta nọ: “Inueri nọ i woma gaga na e rẹ were ahwo buobu nọ a rẹ ziọ Albania wo umuo ho. O rẹ were omẹ re mẹ dhẹ ebasikoro evaọ igbehru Albania nọ e rrọ thokri thokri. Rekọ ahwo nọ a rrọ oria na a rẹ mae were omẹ oma! Oke usi uwoma obọdẹ ọvo ma rọ nyate iwhre buobu nọ e rrọ ẹkwotọ mai. Nọ ma te kpohọ iwhre yena, ẹsejọ ma rẹ rehọ okpẹdoke soso ta usi uwoma kẹ umutho iviuwou jọ ọvo.”

Oware nọ o be mae wha evawere se inievo nana họ ahwo nọ a be kezọ kẹ usi uwoma na. (1 Ahwo Tẹsalonika 2:19, 20) Laura nọ ọ kwa kpobọ Albania okenọ ọ jọ ọmọtẹ nọ o ri wo ọzae he, ọ kẹ oriruo jọ: “Mẹ ta usi uwoma evaọ omoke jọ evaọ ẹwho Fier. Evaọ ikpe ivẹ gbe ubro ọvo, ahwo nọ a muọ usi uwoma họ ẹta a bu te udhozeza (120)! Evaọ usu ahwo yena, me wuhrẹ Ebaibol kugbe ahwo 16!” Oniọvo-ọmọtẹ ọfa nọ a re se Sandra ọ ta nọ: “Mẹ ta usi uwoma kẹ aye jọ nọ o bi ru iruo evaọ eki. Aye na o kurẹriẹ ọ tẹ kwa zihe kpobọ ẹwho riẹ. Okenọ ma ta ẹme whremu, yọ o bi wuhrẹ Ebaibol kugbe ahwo 15!”

Jihova Ọ Ghale E Rai Fikinọ A Thihakọ

Inievo jọ nọ e kwa kpohọ Albania ikpe buobu nọ i kpemu a gbẹ rrọ obei be reawere usi uwoma ota na. U re gbe ai unu ẹsejọ inọ ahwo jọ nọ a ta usi uwoma kẹ ikpe buobu nọ e vrẹ, a kurẹriẹ zihe ruọ Isẹri Jihova no. (Ọtausiuwoma Na 11:6) Christopher nọ ma ta kpahe ẹsiẹe na ọ ta nọ: “Mẹ nyaku ọzae jọ nọ me muọ uwuhrẹ Ebaibol họ kugbe nọ mẹ kake ziọ Albania. U gbe omẹ unu nọ o gbiku eme nọ ma ta evaọ oke yena kpahe Ebaibol. Enẹna, tei te aye riẹ a họ-ame no.” Federica nọ ma fodẹ ẹsiẹe na ọ ta nọ: “Evaọ ukoko jọ, oniọvo-ọmọtẹ jọ ọ nyabru omẹ ze be nọ sọ mẹ kareghẹhọ iẹe. Ọ tẹ vuẹ omẹ nọ mẹ ta usi uwoma kẹe ikpe izii nọ e vrẹ. Nọ mẹ kwa kpohọ ẹwho ọfa no, a te muọ Ebaibol họ ewuhrẹ kugbei, kẹsena ọ tẹ họ-ame. Mẹ jẹ hai roro nọ ikpe ọsosuọ nọ ma rọ ziọ Albania ivrẹvru. Rekọ me roro thọ!”

Oma o be were inievo nọ e kwa kpohọ Albania hayo Kosovo nọ a be ruẹ epanọ Jihova ọ rọ ghale omodawọ rai no, je bi fiobọhọ kẹ ae yeri uzuazọ evawere. Nọ Eliseo ọ rria Albania ikpe buobu no, ọ ta nọ: “O rrọ lọlọhọ re a viẹ omai ahwo-akpọ họ roro nọ ma re wo evawere nọ ma te le eware nọ akpọ na o rri nọ e rẹ kẹ evawere. Rekọ yọ eware ifofe gheghe. Izi Jihova e rẹ kẹ omai evawere je fiobọhọ kẹ omai yeri emamọ uzuazọ. Usi uwoma nọ mẹ rrọ obonẹ ta na o be hae kareghẹhọ omẹ oyena. Iruo nọ me bi ru na i bi ru eva were omẹ je ru eva were Jihova. Me wo uvi egbẹnyusu nọ ma gbe bi le itee evona.” Sandra ọ ta re nọ: “Nọ mẹ kwa kpohọ oria nọ a mae jọ gwọlọ etausiuwoma, mẹ ruẹ nọ Jihova ọ kẹ omẹ uvẹ no re me ru oware nọ o rrọ omẹ udu anwẹdẹ gba, koyehọ re mẹ jọ imishọnare. Mẹ re vioja ẹdẹvo ho inọ mẹ kwa ziọ Albania. Enẹna eva e be mae were omẹ!”