ENỌ IZOGE NA
Usu Orọo—Abọ 1: Kọ Me Te Ohwo nọ Ọ rẹ Nya Usu Orọo No?
Ma te ta kpahe eware nana
Eme họ usu orọo?
Ahwo jọ a re rri usu orọo wọhọ usu omawere gheghe. Rekọ evaọ uzoẹme nana, a rọ “usu orọo” dhesẹ etoke nọ ọmọzae avọ ọmọtẹ a rẹ rọ nya usu re a riẹ ohwohwo ziezi sọ aimava na a te sae rehọ ohwohwo. Fikiere imava nọ e be nya usu orọo a wo ẹjiroro jọ, orọnikọ a be fake nya usu omawere gheghe he.
Nọ oke o be nya na, imava nọ e be nya usu orọo a rẹ jiroro sọ a rẹ rehọ ohwohwo hayo a rẹ fa usu na. Fikiere nọ whọ tẹ be nya usu orọo, who re rẹro ovo jọ evaọ usu eware ivẹ nana.
Ẹme na họ: Who te roro nọ who te ohwo nọ ọ rẹ nya usu orọo no, u fo re who rri omara re nọ who te ohwo nọ ọ rẹ rọo no.
Nọ ohwo ọ tẹ be nya usu orọo yọ ọ gwọlọ rọo ho, a sae rehọ iẹe dhesẹ ohwo nọ o kpohọ oria nọ a be jọ kiẹ ahwo riwi rọkẹ iruo, rekọ ọ gwọlọ nọ a rehọ iẹe kẹ iruo na ha
Kọ who te ohwo nọ ọ rẹ nya usu orọo no?
Nọ orọnọ imava nọ e be nya usu orọo a sae rọo na, u fo nọ whọ rẹ daoma wo emamọ uruemu nọ u ti fiobọhọ kẹ owhẹ evaọ usu na. Wọhọ oriruo, roro kpahe eware nana:
Usu ra kugbe ahwo uviuwou ra. Nọ eva e tẹ be dha owhẹ, oghẹrẹ nọ who re lele ọsẹgboni avọ inievo ra ta ẹme u re dhesẹ epanọ whọ te hai ru ọzae hayo aye ra nọ whọ tẹ rọo no.
Ohrẹ Ebaibol: “Wha siobọno oghẹrẹ ẹgo oyoma kpobi, evedha, ofu, edo, eme ekela, jegbe oware uyoma kpobi.”—Ahwo Ẹfisọs 4:31.
Nọ omara nọ: ‘Kọ ọsẹgboni mẹ gbe inievo mẹ a sae ta nọ mẹ be hae kẹ ae adhẹẹ? Nọ mẹ avọ oniọvo mẹ jọ ma te wo ẹmẹme, kọ mẹ be hae rrọ unu kpotọ lele ei ta ẹme manikọ mẹ be hai do ku ei, lele ei vravro hayo si ikẹ?’
O tẹ rrọ bẹbẹ kẹ owhẹ re who ku ẹbẹbẹ nọ who wo kugbe ọsẹgboni ra họ, kọ who roro nọ whọ te sai ku ebẹbẹ nọ whẹ avọ ọzae hayo aye ra wha ti wo họ?
Wo ororokẹ. Nọ whọ tẹ rọo no, o te gwọlọ nọ who re wo ororokẹ kẹ ọzae hayo aye ra, jẹ rọ ẹgwọlọ riẹ karo.
Ohrẹ Ebaibol: “Jọ omomọvo ọ hae daoma ru oware nọ o rẹ kẹ omọfa erere orọnikọ omobọ riẹ hẹ.”—1 Ahwo Kọrint 10:24.
Nọ omara nọ: ‘Kọ ẹsikpobi mẹ rẹ gwọlọ nọ omẹ ọvo a rẹ rehọ? Kọ ahwo a riẹ omẹ wọhọ ohwo nọ o re roro kẹ amọfa? Kọ eware vẹ me ro fiobọhọ kẹ amọfa no ro dhesẹ nọ omamẹ ọvo me bi roro kpahe he?’
Omaurokpotọ. Emamọ ọzae hayo aye ọ rẹ rọwo nọ o te ru oware jọ thọ je wou unu.
Ohrẹ Ebaibol: “Mai kpobi ma re ru eware thọ unuẹse buobu.”—Jemis 3:2, ẹme-obotọ.
Nọ omara nọ: ‘Nọ oware o tẹ thọ omẹ obọ, kọ mẹ be hae rọwo nọ me ruthọ manikọ me re gu inoma? Kọ eva e rẹ kake dha omẹ nọ a tẹ be hrẹ omẹ?’
Ugho. Ugho o rẹ wha ẹbẹbẹ ze gaga evaọ orọo. Fikiere ohwo ọ tẹ riẹ epanọ a rẹ rọ areghẹ raha ugho, u re fiobọhọ kẹe whaha ebẹbẹ buobu evaọ orọo riẹ.
Ohrẹ Ebaibol: “Ono evaọ usu rai na nọ ọ gwọlọ bọ uwou ukpehru ọ rẹ kake keria tao ho re o roro araha na sọ ugho riẹ u ti tei bọe re?”—Luk 14:28.
Nọ omara nọ: ‘Kọ mẹ rẹ yọroma nọ mẹ tẹ be raha ugho manikọ ẹsikpobi mẹ rẹ re esa? Ẹvẹ me ro dhesẹ no nọ mẹ yọ ohwo nọ a rẹ sai fievahọ evaọ ẹme ugho?’
Usu kugbe Ọghẹnẹ. Otẹrọnọ whẹ yọ Osẹri Jihova, u fo nọ who re wo oke nọ who re ro se Ebaibol na je kpohọ iwuhrẹ Isẹri Jihova.
Ohrẹ Ebaibol: “Eva e were enọ e riẹ nọ u fo re a riẹ Ọghẹnẹ.”—Matiu 5:3.
Nọ omara nọ: ‘Kọ me bi ru eware nọ e rẹ lẹliẹ usu mẹ kugbe Jihova jọ gaga? Kọ egagọ Ọghẹnẹ mẹ be rọ karo evaọ uzuazọ, manikọ eware efa?’
Ẹme na họ: Ọzae hayo aye nọ whọ te rọo ọ te gwọlọ nọ whọ rẹ jọ ohwo nọ o wo emamọ uruemu. Fikiere whọ tẹ be daoma re whọ jọ emamọ ohwo, ẹsejọhọ oghẹrẹ ohwo otiọye ọvona ọ te gwọlọ nọ o re lele owhẹ nya usu.