Abọ 1—Kọ Ọghẹnẹ Ọ be Ghinẹ Daezọ Mai?
1, 2. Didi onọ ahwo a be nọ kpahe Ọghẹnẹ, kọ fikieme?
OKEJỌ evaọ uzuazọ ra, ẹsejọ ha whọ nọ inọ: ‘Otẹrọnọ Ọghẹnẹ jọ ọ riẹ nọ ọ be ghinẹ daezọ mai, fikieme ọ jẹ kẹ uvẹ kẹ uye oruẹ kri te enẹ?’ Uye oruẹ u te omai kpobi no hayo whọ riẹ kpahe ohwo jọ nọ ọruẹ uye no.
2 Uzẹme, ikuigbe i dhesẹ nọ ahwo a ruẹ uye edada gbe uweri nọ ẹmo ọ wha ze no, eva-ega, ethube, ẹdhoguo-okienyẹ, uvuhu, ẹyao, gbe uwhu enọ ma you. Evaọ ikpe udhusoi avọ 20 mai na ọvo, emo i kpe ahwo bu viọ ima 100 no. Ima udhusoi efa e nwoma hayo ku iwou gbe ekwakwa eyero rai kufiẹ no. Eware iyoma buobu e via no evaọ oke mai na, nọ e be wha uweri ulogbo ze, irui buobu, gbe ababọ-ẹruore ro se ahwo buobu nọ a rẹ sai kele he.
3, 4. Ẹvẹ ibuobu i bi roro kpahe uye oruẹ nọ Ọghẹnẹ ọ kẹ uvẹ riẹ na?
3 Ejọ e rọ iyiyẹ nọ a bi ro roro nnọ otẹrọnọ Ọghẹnẹ jọ ọ ghinẹ riẹ, koyehọ ọ be daezọ mai hi. Hayo a ve tube roro dede nnọ Ọghẹnẹ ọ rọ họ. Wọhọ oriruo, ọzae jọ nọ ọ ruẹ ẹlahiẹ uyẹ nọ o wha uwhu ọ egbẹnyusu gbe uviuwou ze evaọ Ẹmo Akpọ I ọ tẹ nọ: “Diẹse Ọghẹnẹ ọ jọ evaọ okenọ ma rọ gwọlọ iẹe?” Ọfa jọ nọ ọ zọ no ikpakpe ahwo ima buobu no obọ ahwo Nazi ze eva Ẹmo Akpọ II o weri fiki uye na nọ ọ rọ ta nọ: “Otẹrọnọ whọ rẹ sae lalọ udu mẹ, o rẹ sae nuowhẹ.”
4 Fikiere, ibuobu ahwo a be sai wo otoriẹ oware nọ o so riẹ ze nọ emamọ Ọghẹnẹ ọ jẹ kẹ uvẹ re eware iyoma e via ha. A be vro sọ ọ be ghinẹ daezọ mai hayo jọ ọ be tubẹ rria dede. Yọ ibuobu rai a roro nọ uye oruẹ o te jọ abọ ẹria ohwo ẹsikpobi.
[Uwoho nọ o rrọ ẹwẹ-obe avọ 2, 3]
Kọ akpọ ọkpokọ nọ ọ kare uye oruẹ ọ kẹle i no?