Abọ 5—Okẹ Ugbunu Ọ Uno-Eva-Ze

1, 2. Didi okẹ ugbunu a kugbe rọ ma omai?

RE MA wo otoriẹ oware nọ o so riẹ ze nọ Ọghẹnẹ ọ jẹ kẹ uvẹ kẹ uye oruẹ gbe oware nọ o ti ru kpahe iẹe, u fo re ma wo ovuhumuo oghẹrẹ nọ ọ ma omai. O ru vi ẹma nọ ọ ma oma gbe ẹvori na. Ọ tẹ jẹ ma omai avọ ekwakwa iroro gbe ẹgba ẹjẹ iroro.

² Ehri abọ iroro gbe ẹgba iroro nọ a rọ ma omai họ okẹ uno-eva-ze. Ẹhẹ, Ọghẹnẹ ọ kọ ẹgba uvẹ erarọ họ omai. Uzẹme onana yọ okẹ ugbunu no obọ riẹ ze.

Oghẹrẹ Nọ A Ma Omai

3-5. Fikieme ma je wo ovuhumuo okẹ uno-eve-ze?

³ A joma rri epanọ okẹ uno-eva-ze u ro kpomahọ oware nọ o so riẹ ze nọ Ọghẹnẹ ọ jẹ kẹ uvẹ kẹ uye oruẹ. Orọ ọsosuọ, roro kpahe onana: Who re wo ovuhumuo uvẹ erarọ kpahe oware nọ who re ru jẹ ta, oware nọ whọ rẹ re jẹ wha, oghẹrẹ iruo nọ who re ru gbe oria nọ whọ rẹ rria gbe oghẹrẹ nọ whọ rẹ rria? Hayo kọ whọ rẹ gwọlọ ohwo jọ nọ ọ rẹ ta ẹme gbe uruemu kpobi họ owhẹ obọ kẹse kẹse evaọ uzuazọ ra?

⁴ Ohwo aruro ọvo nọ ọ rẹ gwọlọ nọ a rehọ uzuazọ riẹ no otọ ẹruọsa riẹ riẹriẹriẹ ọrọ họ. Eme ogbẹrọ ere ha? Fiki oghẹrẹ nọ Ọghẹnẹ ọ rọ ma omai. Ebaibol na e ta nnọ Ọghẹnẹ ọ ma ohwo evaọ ‘uwoho gbe ithatho’ riẹ, yọ ẹgba iroro jọ nọ Ọghẹnẹ o wo họ ufuoma ọrọ erarọ. (Emuhọ 1:26; Iziewariẹ 7:6) Nọ ọ ma ahwo, ọ tẹ kẹ ai ẹgba ugbunu ovo oyena—okẹ ọrọ uno-eva-ze. Oye o so riẹ ze nọ u je dhomai uzou na otẹrọnọ isu i bi kienyẹ omai.

⁵ Fikiere ẹgwọlọ ufuoma o rọ oware ikpregede he, keme Ọghẹnẹ yọ Ọghẹnẹ ufuoma. Ebaibol na e ta nọ: “Oria nọ ẹzi Jihova ọ rọ, ufuoma o rẹ jọ etẹe.” (2 Ahwo Kọrint 3:17) Fikioye, Ọghẹnẹ ọ jẹ k’omai okẹ uno-eva-ze wọhọ abọjọ nọ o ro kugbe ma omai. Nọ ọ riẹ oghẹrẹ nọ iroro gbe ẹgba iroro mai i ti ru iruo rri na, ọ riẹ nọ ma te mai wo evawere otẹrọnọ ma wo okẹ uno-eva-ze.

6. Ẹvẹ Ọghẹnẹ ọ ma ẹvori mai re o ru iruo nya lele okẹ uno-eva-ze?

⁶ Re a lele okẹ uno-eva-ze, Ọghẹnẹ ọ tẹ jẹ k’omai ẹgba eroro, ẹme ọwawọ, iroro e jẹ, gbe ẹ riẹ uwoma no uyoma. (Ahwo Hibru 5:14) Fikiere, uno-eva-ze o rọ oma rẹrẹ erarọ eriariẹ. A ma omai wọhọ robot ho nọ i wo iroro obọ rai ha. Hayo kọ a ma omai wọhọ erao nọ oware o rẹ via kẹ taure a te ru oware he. Ukpoye, ẹvori ogbunu mai na a ruẹre riẹ fihọ re ọ nya lele ufuoma erarọ mai.

Emamọ Emuhọ Na

7, 8. Didi emuhọ owoma Ọghẹnẹ ọ rọ kẹ ọsẹ gbe oni ọsosuọ mai?

⁷ Ro dhesẹ epanọ Ọghẹnẹ ọ jọ ọsẹro te, je kugbọ okẹ uno-eva-ze, ọsẹ gbe oni ọsosuọ mai, Adamu avọ Ivi, a kẹ rai eware kpobi nọ ohwo ọ rẹ sai ghinẹ gwọlọ. A fi rai họ aparadase ologbo, nọ ọ wọhọ ogege. A wo ekwakwa eyero buobu. A wo iroro gbe oma ogbagba, fikiere a rẹ te who jẹ mọ hayo whu hu—a jẹ hae te rria bẹdẹ bẹdẹ. A jẹ hae ti wo emọ egbagba nọ e hae ti wo obaro evawere gbe orọ ebẹdẹ bẹdẹ. Yọ unu ahwo nọ i ti dhe ebuebu na a jẹ hae ti wo iruo edẹro evawere ọrọ eruo akpọ na soso fihọ aparadase.—Emuhọ 1:26-30; 2:15.

⁸ Rọ kpahe eware nọ ọ rọ kẹ, Ebaibol na e tẹ ta nọ: “Ọghẹnẹ ọ tẹ ruẹ eware kpobi nọ ọ ma, rri! i woma re.” (Emuhọ 1:31) Ebaibol na e tẹ jẹ ta kpahe Ọghẹnẹ nọ: “Iruo riẹ e rẹ gbagba.” (Iziewariẹ 32:4) Ẹhẹ, Ọmemama na ọ rehọ emuhọ ọgbagba rọ kẹ uviuwou ohwo. O hae te sai woma viere he. Ẹvẹ ọ rrọ Ọghẹnẹ nọ ọ be daezọ te!

Uvẹ Nọ U Wo Umuo

9, 10. Fikieme okẹ uno-eva-ze a jẹ kpọe ziezi?

⁹ Dede, kọ Ọghẹnẹ ọ gwọlọ nọ okẹ uno-eva-ze na u re wo umuo ha? Dai roro kpahọ ẹwho ozizighi nọ o wo izi imoto e dhẹ ha, nọ ohwo kpobi ọ rẹ dhẹ rri obonọ u je rie yọ ọ be dhẹ siawọ gaga. Kọ whọ rẹ gwọlọ dhẹ omoto evaọ otọ otiọye na? Ijo, oyena yọ ozighi ọwhafihọ edhere imoto, ababọ avro o rẹ wha enwoma buobu rọ ze re.

¹⁰ Ere okẹ uno-eva-ze Ọghẹnẹ o rọ re. Ufuoma nọ u wo umuo ha o rẹ wha ozighi fihọ ukoko ahwo. Izi e rẹ jariẹ nọ i re su iruẹru ohwo. Ẹme Ọghẹnẹ ọ ta nọ: ‘Wha yeri kerọ emuyẹ, rekọ wha rehọ uvẹ emuyẹ nọ wha rọ na ru umuemu hu.’ (1 Pita 2:16, JB) Ọghẹnẹ ọ gwọlọ nọ okẹ uno-eva-ze na a rẹ kpọe họ rọ kẹ ewoma ohwo kpobi. Ọ gwọlọ nọ ma wo ufuoma riẹriẹriẹ hẹ, rekọ ufuoma nọ u wo umuo, nọ o rẹ jọ otọ uzi.

Izi ọ Ono?

11. Izi ọ ono a ma omai nọ ma re koko?

¹¹ Izi ọ ono a ma omai nọ ma re koko? Abọ ọfa ikereakere na evaọ 1 Pita 2:16 (NW) o ta nọ: “Whai erigbo ohwo ọvo ho ajokpa nọ e rọ Ọghẹnẹ.” Onana orọnikọ igbo okienyẹ hẹ rekọ, ukpoye, u dhesẹ nọ evawere e rẹ mae jariẹ nọ ma tẹ rọ otọ izi Ọghẹnẹ. (Matiu 22:35-40) Izi riẹ, i woma vi izi nọ ahwo a rẹriẹ ze, e rẹ rehọ emamọ uketha rọ ze. “Mẹ họ Ọnowo na [“Jihova,” NW ], Ọghẹnẹ ra, Ọnọ o bi wuhrẹ owhẹ wo erere, Ọnọ o su owhẹ nya edhere nọ o fo ẹnya.”—Aizaya 48:17.

12. Ufuoma erarọ ọvẹ ma wo evaọ izi Ọghẹnẹ?

¹² Evaọ oke ovo na, izi Ọghẹnẹ e kẹ uvẹ ulogbo kẹ ufuoma erarọ nọ u wo umuo. Onana o rẹ wha iroro oghoghẹrẹ tha u ve je ru uviuwou ohwo vọ avọ isiuru. Roro kpahe oghoghẹrẹ emu, emu-ẹgọ, ikporakporo, iruo-ona, gbe iwou nọ e wariẹ akpọ na soso họ. Ma rẹ gwọlọ erarọ omobọ mai eva eme itieye na viukpe ohwo jọ nọ ọ rẹ jẹ iroro na k’omai.

13. Didi izi ugboma mai ma re koko rọ kẹ ewoma omobọ mai?

¹³ Fikiere a ma omai re ma wo evawere ziezi nọ ma tẹ rehọ oma kpotọ kẹ izi Ọghẹnẹ kpahe uruemu ohwo. Epavo na o rọ kẹ omurokpotọ kẹ izi Ọghẹnẹ kẹ ugboma mai na re. Wọhọ oriruo, ma te gbabọ kẹ uzi ẹgbẹgbẹdẹ ma jẹ la no oria ukpehru ze, ma rẹ sae nwoma hayọ whu. Ma te gbabọ kẹ izi obọ eva mai ma jẹ se emuọriọ ba, ame-ọda, hayọ siọ ẹwẹ ba ẹ wẹ, ma re whu.

14. Ẹvẹ ma sae rọ riẹ nọ a ma ohwo re ọ hẹriẹ oma no otọ Ọghẹnẹ ha?

¹⁴ Epanọ a ma omai avọ ẹgwọlọ re ma rehọ oma kpotọ kẹ izi Ọghẹnẹ erọ ugboma mai na, ere a ma omai re ma rehọ oma kpotọ kẹ izi Ọghẹnẹ erọ uruemu gbe erọ eyerakpọ. (Matiu 4:4) A ma ahwo re a hẹriẹ oma rai no otọ ọnọ Ọma rai re a wo obokparọ họ. Jerimaya ọruẹaro na ọ ta nọ: “O rọ kẹ ohwo nọ ọ be nya re o su ithihi riẹ hẹ. Kpomẹ họ, O Jihova.” (Jerimaya 10:23, 24, NW ) Fikiere evaọ edhere kpobi a ma ahwo re a rria evaọ otọ esuo Ọghẹnẹ, orọnikọ orọ obọ rai hi.

15. Kọ izi Ọghẹnẹ e hae te jọ owha ogbẹgbẹdẹ rọ kẹ Adamu avọ Ivi?

¹⁵ Ẹmeoyo rọ kẹ izi Ọghẹnẹ o hae te jọ owha ogbẹgbẹdẹ kẹ ọsẹ gbe oni ọsosuọ mai hi. Ukpoye, kọ o hae te wha omokpokpọ ro sai gbe uviuwou ahwo akpọ soso. Otẹrọnọ imava ọsosuọ na a daji otọ izi Ọghẹnẹ, eware kpobi e hae te jọ ziezi. Eva uzẹme, enẹna yọ ma be rria aparadase ogbunu omawere wọhọ uviuwou uyoyou ọrọ okugbe ahwo akpọ soso! Eyoma, uye oruẹ, gbe uwhu e hae te jariẹe he.

[Uwoho nọ o rrọ ẹwẹ-obe avọ 11]

Ọmemama na ọ rehọ emuhọ ọgbagba kẹ ahwo

[Uwoho nọ o rrọ ẹwẹ-obe avọ 12]

Kọ whọ rẹ gwọlọ dhẹ omoto evaọ edhere nọ imoto e be jọ zurie otẹrọnọ izi ọ edhere e riẹ vievie ha?