Oghẹrẹ Ahwo Vẹ A Rrọ?

ISẸRI JIHOVA a gwọlọ nọ whọ riẹ ae ziezi. Ẹsejọhọ whọ nyaku ai no wọhọ erivẹ gbe ibe iruiruo hayo evaọ iruẹru ekẹdẹ kẹdẹ uzuazọ efa. Ẹsejọhọ whọ ruẹ e rai no evaọ iyẹrẹ, nọ a be rehọ emagazini rai kẹ ahwo. Hayo ẹsejọhọ who lele i rai t’ẹme kpẹkpẹe no evaọ unuẹthẹ ra.

Evaọ uzẹme, Isẹri Jihova a wo isiuru kpahe owhẹ gbe ewoma ra. A gwọlọ jọ egbẹnyusu ra re a jẹ ta kẹ owhẹ viere kpahe oma rai, eware nọ a rọwo, ukoko rai, gbe oghẹrẹ nọ a rri ahwo gbe akpọ nọ mai kpobi ma be rria na. Re a ruẹsi ru onana gba, a kere ibroshọ nana kẹ owhẹ.

Evaọ idhere buobu Isẹri Jihova a wọhọ amọfa kpobi. A wo ebẹbẹ nọ ahwo kpobi a wo na—ebẹbẹ okọ, ugboma, iroro. A re ruthọ ẹsejọ, keme a gba ha, yọ ẹzi o bi mu ai hi, hayo a kare ekie he. Rekọ a be gwọlọ wuhrẹ no iruthọ rai ze jẹ be roma totọ wuhrẹ Ebaibol re a ru inwene nọ i fo. A rehọ oma mudhe kẹ Ọghẹnẹ no re a ru oreva riẹ, yọ a be daoma rai kpobi re a ru omarọkẹ rai gba. Evaọ iruẹru rai kpobi a rẹ gwọlọ uketha no Ẹme Ọghẹnẹ gbe ẹzi ọfuafo riẹ ze.

U wuzou kẹ ae gaga re erọwọ rai i no Ebaibol ze orọnikọ omuroro ohwo-akpọ jọ hayo izi egagọ jọ họ. A rehọ e riẹ wọhọ epanọ o jọ kẹ Pọl ukọ na evaọ okenọ ọ ta eva riẹ evaọ otọ ogaga ẹzi na inọ: “Omake rọnọ ohwo kpobi ọ rọ ọterue, ru re Ọghẹnẹ ọ jọ ọ tauzẹme.” (Ahwo Rom 3:4a) A tẹ t’ẹme kpahe iwuhrẹ uzẹme Ebaibol na, Isẹri na a rọwo gaga kpahe owọ nọ ahwo Bẹria a jẹ evaọ okenọ a yo usiuwoma ota Pọl ukọ na: “Evaọ oghọghọ a rọ rehọ ẹme na, yọ a riwẹ ikerakere na kẹse kẹse, sọ epanọ a ta kẹ ae na ere eghinẹ rọ.” (Iruẹru 17:11) Isẹri Jihova a rọwo nọ o gwọlọ re a rehọ Ebaibol na kiẹ iwuhrẹ egagọ kpobi riwi enẹ sọ e rọwo kugbe Ikereakere efuafo na, makọ iwuhrẹ na i no obọ rai ze hayo i no obọ omọfa jọ ze. A zizie owhẹ—tuduhọ owhẹ awọ—re who ru onana evaọ ẹmeọta ra kugbe ai.

O rrọ vevẹ rono onana ze inọ Isẹri Jihova a rọwo Ebaibol na wọhọ Ẹme Ọghẹnẹ. A rri ebe 66 riẹ na wọhọ enọ a rehọ ogaga ẹzi kere e tẹ jẹ rrọ gbagba evaọ eme ikuigbe. A re se abọ nọ ibuobu i re se Ọvọ Ọkpokpọ na inọ Ikereakere Griki Ileleikristi na, a ve je se ọnọ ibuobu i bi se Ọvọ Anwae na inọ Ikereakere Hibru na. A fievahọ ivẹ enana, Ikereakere Griki gbe erọ Hibru na, a tẹ jẹ rehọ eme rai wọhọ epanọ a kere i rai na ajokpa evaọ eria nọ eme na hayo oghẹrẹ emuhọ rai i je dhesẹ vevẹ nnọ yọ eme ẹwoho hayo eme oka. A wo otoriẹ nnọ eruẹaruẹ buobu nọ e rrọ Ebaibol na i rugba no, efa i bi rugba enẹna, yọ enọ i kiọkọ i ti rugba evaọ obaro.

ODẸ RAI

Isẹri Jihova? E, ere a re se oma rai. Oyena yọ odẹ edhesẹ, nọ u bi dhesẹ nnọ a bi se isẹri kpahe Jihova, Ọkwa-Ọghẹnẹ riẹ, gbe ẹjiroro riẹ. “Ọghẹnẹ,” “Olori,” gbe “Ọnọma”—wọhọ “Prẹsidẹnte,” “Ovie,” gbe “Oletu-Ẹmo”—yọ edẹ-ova yọ a rẹ sae rehọ ae se oghẹrẹ ahwo jọ sa-sa. Rekọ “Jihova” yọ odẹ-oma yọ ọye a re ro se Ọghẹnẹ erumeru na gbe Ọnọma ehrugbakpọ na. A dhesẹ onana via evaọ Olezi 83:18, wọhọ epanọ efafa Ebaibol King James o fi rie họ: “Re ahwo a riẹ nọ whẹ, ọye ọvo nọ odẹ riẹ o rọ JIHOVA, whẹ ọ mae rro evaọ otọakpọ na soso.”

Odẹ na Jihova (hayo Yawe, wọhọ epanọ Ebaibol Isoko gbe ewena-isukulu jọ a fi rie họ) o roma via enwenọ asia 7,000 evaọ Ikereakere Hibru ọsosuọ na. Ebaibol buobu i dhesẹ i rie ere he ukpoye a tẹ rehọ “Ọghẹnẹ” hayo “Ọnowo” ro nwene iei. Ghele na, makọ evaọ Ebaibol enana, ohwo ọ rẹ sae riẹ oria nọ ikere Hibru ọsosuọ na e jọ fodẹ Jihova keme evaọ eria eyena eme nọ a ro nwene iei na a rẹ rehọ ibieme ikpokpoko kere ai, wọhọ: ỌGHẸNẸ, ỌNOWO. Efafa ọgbọna buobu i wo odẹ na Jihova hayo odẹ na Yahweh. Fikiere, Ebaibol ọ New World Translation na o se eva Aizaya 42:8 enẹ, “Mẹ họ Jihova. Ọye họ odẹ mẹ.”

Oria Ikereakere nọ Isẹri Jihova a rẹ riobọhọ nnọ odẹ rai u no ze họ uzou avọ 43 orọ Aizaya. A jọ etẹe rọ akpọ na dhesẹ okọto: A zizie eghẹnẹ erẹwho na re a rehọ isẹri rai ze re a se isẹri kpahe ẹrẹreokie rai hayo re a yo mi isẹri nọ e rrọ abọ Jihova re a rọwo uzẹme na. Jihova ọ jọ etẹe whowho kẹ ahwo riẹ nọ: “Whai yọ isẹri mẹ, ere Jihova ọ ta, gbe odibo mẹ ọnọ mẹ salọ; re wha riẹ jẹ rọwo omẹ, jẹ riẹ nọ mẹ họ ọye: uvumọ Ọghẹnẹ ọ karo kẹ omẹ hẹ, yọ u te no omẹ no ọfa ọ rrọ họ. Mẹ, mẹ họ Jihova; u te no omẹ no uvumọ osiwi ọ rrọ họ.”—Aizaya 43:10, 11, American Standard Version.

Jihova Ọghẹnẹ ọ jọ otọakpọ wo isẹri evaọ ikpe udhusoi akuakpe buobu taure a te ti yẹ Jesu. Nọ Ahwo Hibru uzou avọ 11 o fodẹ ahwo ẹrọwọ eyena no, Ahwo Hibru 12:1 o tẹ ta nọ: “Fikiere epanọ isisẹri ewariẹ omai họ wọhọ ẹgho ologbo na, wha joma siọ owreze ba, gbe umuomu nọ ma ru rieria no, re ma rehọ oriori dhẹ ohrẹ nọ a fihọ kẹ omai na.” Jesu ọ jọ iraro Pọntiọs Pailet ta nọ: “Fiki onana a je yẹ omẹ, fiki onana mẹ jẹ ze evaọ akpọ na, re me se isẹi kẹ uzẹme.” A se rie “oruọzewọ gbe oseisẹri uzẹme na.” (Jọn 18:37; Eviavia 3:14) Jesu ọ ta kẹ ilele riẹ nọ: “Nọ [Ẹzi] Ẹri ọ ruọ [owhai] oma no wha re ti wo ogaga nọ wha ti ro se isẹri mẹ eva Jerusalem gbe Judia kpobi te Sameria je rite ọnyaba akpọ na.”—Iruẹru 1:8.

Fikiere, ahwo nọ a bu te 6,000,000 nẹnẹ nọ e be vuẹ usiuwoma Uvie Jihova onọ o rrọ obọ Kristi Jesu evaọ ekwotọ nọ i bu vi 230 na a roro nọ u kiehọ re a se oma rai Isẹri Jihova.

[Oruvẹ-obotọ]

[Ẹme nọ a fi ẹgba họ nọ ọ rrọ ẹwẹ-obe avọ 4]

A roma mudhe kẹ Ọghẹnẹ re a ru oreva riẹ

[Ẹme nọ a fi ẹgba họ nọ ọ rrọ ẹwẹ-obe avọ 4]

A rọwo nnọ Ebaibol na yọ Ẹme Ọghẹnẹ

[Ẹme nọ a fi ẹgba họ nọ ọ rrọ ẹwẹ-obe avọ 5]

Odẹ na wọhọ epanọ u ro w’obọ kugbe ẹdhoguo okọto

[Ẹme nọ a fi ẹgba họ nọ ọ rrọ ẹwẹ-obe avọ 5]

Isẹri na a bu te 6,000,000 evaọ ekwotọ 230

[Uwoho nọ o rrọ ẹwẹ-obe avọ 3]

A wo isiuru kpahe owhẹ

[Uwoho nọ o rrọ ẹwẹ-obe avọ 4]

Odẹ-oma Ọghẹnẹ evaọ Hibru anwae