Ẹvẹ A re ro Ku Ebẹbẹ nọ I Kpomahọ Eware Ugho Họ?

Pọl ukọ na ọ jọ 1 Ahwo Kọrint 6:1-8 t’ẹme kpahe Ileleikristi nọ i je siobe kẹ ibe Ileleikristi rai. U gbe rie unu inọ Ileleikristi jọ evaọ Kọrint a be nya “bru ogbẹguae egedhọ re a bruoziẹ” rai. (Owọ Ọsosuọ) Pọl ọ fodẹ emamọ ẹjiroro nọ Ileleikristi a gbe ro siobe kẹ ohwohwo kpohọ ekọto ho, ukpoye kọ evaọ ukoko na a re jo ku ẹwhọ rai họ. Joma rri eware jọ nọ e wha ohrẹ nana ze, ma ve ti je duobọte iyero jọ nọ ohrẹ nana o nwani kie kpahe he.

Ma te wo ẹbẹbẹ kugbe ibe Oleleikristi jọ evaọ oware nọ u kpomahọ ugho, oware nọ ma rẹ kaki ru họ epanọ ma re ro ku ẹbẹbẹ na họ evaọ edhere Jihova, orọnikọ edhere obọ mai hi. (Itẹ 14:12) Wọhọ epanọ Jesu ọ ta, o rẹ mai woma re ma ku ẹwhọ họ vẹrẹ vẹrẹ re o te ti zihe ruọ okpẹme. (Matiu 5:23-26) U yoma gaga inọ Ileleikristi jọ a re si ẹme na vrẹta, tube tu oniọvo nọ a gbe wo ẹme na kpohọ ekọto dede. Pọl ọ ta nọ: “Re whai ohwo o te siobe kẹ ohwo, yọ orọ ekie rọ kẹ owhai.” Fikieme? Keme ẹdhọ otiọye na o rẹ raha odẹ ukoko na jẹ raha odẹ Ọghẹnẹ nọ ma be gọ. Fikiere, ma rẹ kareghẹhọ onọ Pọl na: “Keme wha gbẹ rọwo ruẹ uye oware nọ ukiẹrẹe he?”—Owọ avọ 7.

Pọl ọ tẹ jẹ ta inọ Ọghẹnẹ ọ jọ ukoko na ru emamọ ọruẹrẹfihotọ nọ a re ro ku ẹwhọ sa-sa họ. Ekpako na yọ Ileleikristi nọ eriariẹ Ikereakere na i ru wo areghẹ ziezi no, yọ Pọl ọ ta nọ a ‘wo areghẹ te epanọ a rẹ sai ro bruoziẹ imoni na’ evaọ eme nọ i kie kpahe “eware uzuazọ nana.” (Owọ avọ 3-5) Jesu ọ ta nọ otẹrọnọ ẹwhọ ọ roma via fiki iruthọ ilogbo, wọhọ ọtaraha gbe ofruriọ, eware esa e riẹ nọ a re ru: orọ ọsosuọ, imava na a rẹ gwọlọ edhere nọ a re ro ku ẹbẹbẹ na họ; orọ avivẹ, a gbẹ sai ku ẹbẹbẹ na họ họ, a rẹ rehọ osẹri ọvo hayo ivẹ jọ gboma; yọ orọ avesa, ẹwhọ na o gbe kuhọ ghele he, a vẹ wha ẹme na kpobọ ukoko na, koyehọ bru ekpako na.—Matiu 18:15-17.

Uzẹme o rrọ inọ ekpako ukoko e nwane rrọ eriẹ-izi hayo ehreki hi, yọ a re ru wọhọ ẹsenọ a rrọ ere he. Orọnikọ a re fi izi jọ họ nọ inievo a re ro ku ẹbẹbẹ ugho họ họ. Ukpoye, a rẹ gwọlọ fi obọ họ kẹ enọ i wo ẹbẹbẹ na re a fi ithubro Ikereakere họ iruo re a je ku ẹbẹbẹ rai họ dhedhẹ. Ẹme na ọ tẹ rrọ gaga, a rẹ sae wọe bru ọsẹro okogho na hayo uwou ogha orọ Isẹri Jihova. Rekọ, eware jọ e riẹ nọ e rẹ sae roma via nọ Pọl o dhunu te he. Oghẹrẹ eware vẹ?

U wo eware jọ nọ uzi o ta nọ a rẹ jọ obọ ekọto kuhọ. Wọhọ oriruo, a rẹ sai siobe kẹ ohwo nọ a tẹ gwọlọ fa orọo, obọ ohwo nọ ọmọ ọ rẹ jọ, osa nọ a rẹ hwa kẹ aye nọ a se, emi igho kẹ ọraha idudhe, a te kele ohwo kugbe enọ ebanke nọ i kie e rẹ hwa igho kẹ, gbe obe nọ a re si re a riẹ sọ obe ọ uku-oghale o rrọ uzẹme. Oniọvo ọ rẹ sai je siobe kẹ ohwo nọ o siobe kẹe re ọ sae thọ oma riẹ evaọ abọ-uzi.a

O gbẹ rọnọ egrẹ nọ Oleleikristi jọ o wo họ eva kẹ ọdekọ o ro siobe kẹe he, kiyọ ọ re wọso ohrẹ Pọl na ha.b Rekọ, oware nọ Oleleikristi ọ rẹ mai roro kpahe họ erufuọ odẹ Jihova gbe udhedhẹ avọ okugbe ukoko na. Uyoyou nọ ilele Jesu a wo a rẹ kaki ro vuhu ai, yọ “uyoyou o rẹ guọlọ orọ obọ riẹ hẹ.”—1 Ahwo Kọrint 13:4, 5; Jọn 13:34, 35.

[Oruvẹ-obotọ]