Ahwo buobu a siọ ichọche ba ẹnya no fikinọ a be jọ etẹe ruẹ iyo enọ nọ i wuzou evaọ uzuazọ hayo wo uduotahawọ họ. Nọ o rrọ ere na, fikieme o rọ gwọlọ nọ who kpohọ iwuhrẹ ukoko Isẹri Jihova? Eme whọ te jọ obei ruẹ?

Who ti wo oghọghọ fikinọ whọ rrọ udevie ahwo nọ a re dhesẹ uyoyou kẹ ohwohwo. Evaọ ikpe-udhusoi ọsosuọ, Ileleikristi a jẹ hai koko oma họ ru iwuhrẹ evaọ ikoko sa-sa, re a sae gọ Ọghẹnẹ, wuhrẹ Ebaibol na kugbe, jẹ tuduhọ ohwohwo awọ. (Ahwo Hibru 10:24, 25) Evaọ etoke itieye nọ a jẹ jọ iwuhrẹ ukoko na, o jẹ hae jarai oma inọ a rrọ udevie uvi egbẹnyusu, yọ onana o jẹ lẹliẹ udu te ae otọ. (2 Ahwo Tẹsalonika 1:3; 3 Jọn 14) Epọvo na ma bi koko oma họ gọ Ọghẹnẹ nẹnẹ, yọ onana o be wha oghọghọ se omai re.

Whọ te ruẹ nọ irere e riẹ nọ ohwo o te bi ru lele oware nọ Ebaibol ọ ta. Wọhọ epanọ o jọ evaọ oke Ebaibol, te ezae te eyae, gbe emaha a bi kuomagbe gọ Ọghẹnẹ nẹnẹ. Evaọ iwuhrẹ nana, ahwo nọ a wo eriariẹ ziezi a re fiobọhọ dhesẹ epanọ ma sai ro fi eme Ebaibol họ iruo evaọ uzuazọ mai. (Iziewariẹ 31:12; Nehemaya 8:8) Ahwo kpobi nọ a rrọ ewuhrẹ na a rẹ sae kpahe fihọ enọ, jẹ so ile, rọ ere dhesẹ ẹruore nọ ma wo via.​—Ahwo Hibru 10:23.

Iwuhrẹ na i ti ru ẹrọwọ nọ who fihọ Ọghẹnẹ ga. Pọl ukọ na o kere se ukoko jọ evaọ oke riẹ inọ: “U bi si omẹ urru re mẹ ruẹ owhai, . . . re ma sae tuduhọ ohwohwo awọ ẹkwoma ẹrọwọ mai, te ọrai te ọmẹ.” (Ahwo Rom 1:11, 12) Oma nọ ma bi kugbe inievo ukoko mai ẹsikpobi evaọ obọ iwuhrẹ u bi ru ẹrọwọ gbe ọtamuo mai ga, onọ ma rọ gwọlọ yeri uzuazọ Oleleikristi.

Ma bi zizie owhẹ nọ whọ nyaze ewuhrẹ ukoko mai nọ ọ be tha na re whọ rehọ ẹro ruẹ eware nana. A ti dede owhẹ rehọ sasasa. Iwuhrẹ na kpobi ọvọvẹ, yọ a rẹ jarai ghoro umudo hayo mi ugho ho.

• Oriruo vẹ ma bi lele ro ru iwuhrẹ ukoko mai?

• Irere vẹ ma re wo nọ ma tẹ be hai kpohọ iwuhrẹ ukoko mai?

O tẹ make gwọlọ nọ ma rẹ nya owhawho vrẹ hayo makọ uvo hayo oso ọgaga, ma be hai kpohọ iwuhrẹ ukoko mai ghele. Ghelọ ebẹbẹ uzuazọ gbe elọhoma nọ e be hai no iruo okpẹdoke na ze, fikieme Isẹri Jihova a be rọ dawo ẹgba rai kpobi re a kuomagbe evaọ iwuhrẹ ukoko rai?

U bi kru omai oma ga. Nọ Pọl o je kere kpahe ibe Ileleikristi mai nọ ma re kuomagbe evaọ ukoko na, ọ ta nọ: “Joma roro kpahe ohwohwo.” (Ahwo Hibru 10:24) Ẹme nana o dhesẹ nọ ma rẹ “romatotọ roro kpahe ohwohwo,” koyehọ, ma rẹ daoma riẹ ohwohwo. Fikiere, ẹme Pọl na o be tuduhọ omai awọ inọ ma riẹ ẹgwọlọ amọfa nọ e rrọ ukoko na. Ma tẹ be daoma riẹ ibe Ileleikristi mai ziezi, ma te ruẹ nọ ejọ rai a fi ebẹbẹ jọ nọ ma bi lele muabọ kparobọ no, yọ a rẹ sai dhesẹ oghẹrẹ nọ ma sai ro fi ebẹbẹ itieye na kparobọ kẹ omai.

O rẹ bọ usu mai kugbe ohwohwo ga. Evaọ iwuhrẹ ukoko mai, ahwo nọ ma bi kuomagbe orọnikọ yọ egbẹrioma jọ gheghe he, rekọ uvi egbẹnyusu. Yọ evaọ ẹsejọ, ma re kuomagbe kẹ arozaha omaweromẹ nọ o fo kẹ Ileleikristi. Irere jọ vẹ i re no oghẹrẹ omakugbe itieye na ze? U re fiobọhọ kẹ omai rri ohwohwo ghaghae, jẹ bọ uyoyou nọ o rrọ udevie mai ga. Yọ usu okpekpe nọ o rrọ udevie mai o rẹ wọ omai dhogbo bru ohwohwo evaọ okenọ ejọ evaọ usu mai a tẹ rẹriẹ ovao dhe ebẹbẹ. (Itẹ 17:17) Oma nọ ma re kugbe inievo ukoko na evaọ ẹsikpobi u re dhesẹ nọ ma “wo ọdawẹ kẹ ohwohwo.”​—⁠1 Ahwo Kọrint 12:25, 26.

Ma be tuduhọ owhẹ awọ inọ whọ salọ egbẹnyusu evaọ udevie ahwo nọ a bi ru oreva Ọghẹnẹ. Whọ te jọ udevie Isẹri Jihova ruẹ oghẹrẹ egbẹnyusu itieye na. Ivie whọ kuvẹ re oware jọ o whaha owhẹ oma nọ who re kugbe omai hi.

• Fikieme o rọ rrọ nọ ma re wo erere nọ ma te bi kuomagbe evaọ obọ iwuhrẹ ukoko mai?

• Oke vẹ who ti ro wo uvẹ nọ whọ sai ro kpohọ iwuhrẹ ukoko mai?

Eware nọ a jẹ hae mai ru evaọ iwuhrẹ Ileleikristi ikpe-udhusoi ọsosuọ họ ile esuọ, elẹ, gbe Ikereakere na nọ a jẹ hai se jẹ ta ẹme kpahe. Yọ iruẹru sa-sa nọ a be jọ egagọ buobu ru nẹnẹ na e jariẹ hẹ. (1 Ahwo Kọrint 14:26) Epọvo na ma be hai ru evaọ iwuhrẹ ukoko mai.

Ebaibol ma be rehọ iwuhrẹ na no ze, yọ i re fiobọhọ evaọ kabọ kabọ uzuazọ. Evaọ urere-oka kpobi, Isẹri Jihova a re kuomagbe evaọ ikoko rai re a gaviezọ kẹ ovuẹ ogbotu nọ a rẹ kẹ evaọ iminiti 30 rono Ebaibol ze, yọ a rẹ jọ ovuẹ na dhesẹ epanọ eria Ebaibol sa-sa i ro kiekpahe uzuazọ mai gbe oke nọ ma be rria na. Ọnọ ọ be kẹ ovuẹ na ọ rẹ tuduhọ omai kpobi awọ re ma hai rri ọvuọ Ebaibol riẹ lele iei. Nọ a tẹ kẹ ovuẹ na no, ma ve ru Uwuhrẹ “Uwou-Eroro” evaọ auwa ọvo, yọ a rẹ kẹ ohwo kpobi uvẹ re ọ kpahe fihọ enọ nọ a te nọ rono uzoẹme nọ a be jọ Uwou-Eroro Na wuhrẹ evaọ ẹdẹ yena ze. Uwuhrẹ nana u re fiobọhọ kẹ omai fi eware nọ Ebaibol ọ ta họ iruo evaọ uzuazọ mai. Uzoẹme ovona ma re wuhrẹ evaọ ikoko Isẹri Jihova nọ i bu vi idu udhusoi gbe ikpe (110,000) wariẹ akpọ na họ.

Iwuhrẹ na i bi fiobọhọ kẹ omai nyaharo evaọ onaa nọ ma re ro wuhrẹ ahwo. Evaọ owọwọ ẹdẹ jọ evaọ udevie oka na, ma re je kokohọ kẹ ewuhrẹ nọ o wo abọ esa nọ a re se Uzuazọ Oleleikristi gbe Usi Uwoma Ota Mai, yọ eware nọ a ruẹrẹhọ Obe Ewuhrẹ Uzuazọ gbe Usi Uwoma Ota nọ u re kpozi kamara kamara ma re ro ru ewuhrẹ nana. Abọ ọsosuọ ewuhrẹ nana nọ a re se Eware Aghae nọ E Rrọ Ebaibol Na u re fiobọhọ kẹ omai wo otoriẹ eria Ebaibol nọ ma se kpahotọ no. Kẹsena u ve te abọ ọfa nọ a re se Wo Onaa Ziezi Evaọ Usi Uwoma Ota Na, onọ ma re jo ru idhesẹvia epanọ ma rẹ rọ rehọ Ebaibol na ta usi uwoma kẹ ahwo. Oniọvo jọ nọ ọ rrọ ọkohrẹ o re muẹrohọ oghẹrẹ nọ ma bi ro ru eme na re ọ sai fiobọhọ kẹ omai wo ẹnyaharo evaọ isase gbe ẹmeọta mai. (1 Timoti 4:13) A rẹ jọ abọ urere na nọ a re se Uzuazọ Oleleikristi ta kpahe epanọ ma sai ro fi ehri-izi Ebaibol họ iruo evaọ uzuazọ kẹdẹ kẹdẹ. A rẹ jẹ jariẹ ru abọ ẹme enọ gbe iyo nọ u re fiobọhọ kẹ omai wo otoriẹ Ebaibol na didi.

Nọ who te kpohọ iwuhrẹ mai, oma o te were owhẹ fiki obọdẹ eware nọ who ti wuhrẹ no Ebaibol na ze.​—Aizaya 54:13.

• Eware jọ vẹ who ti yo nọ who te kpohọ iwuhrẹ Isẹri Jihova?

• Ewuhrẹ ukoko mai jọ vẹ ọ were owhẹ nọ whọ rẹ nya kẹle na?

Kọ whọ jọ iwoho nọ e rrọ ibroshọ nana muẹrohọ no inọ Isẹri Jihova a rẹ gọ ẹgọ kpatiẹ nọ a te bi kpohọ iwuhrẹ rai? Fikieme oghẹrẹ nọ ma rẹ gọ ẹgọ jẹ sẹ osẹ o rọ rrọ omai oja tere?

Re ma rehọ adhẹẹ kẹ Ọghẹnẹ mai. Uzẹme o rrọ inọ, orọnikọ erru okafe mai Ọghẹnẹ ọ be mai rri hi. (1 Samuẹle 16:7) Ghele na, nọ ma te bi kuomagbe kẹ egagọ, o rrọ isiuru mai re ma rọ adhẹẹ kẹ Ọghẹnẹ gbe inievo Ileleikristi mai. Otẹrọnọ ma be nyai gu ẹdhọ kẹ obruoziẹ evaọ ekọto, ma te gwọlọ gọ ẹgọ ziezi fiki adhẹẹ nọ ma wo kẹ ọkwa riẹ. Epọvo na re, oghẹrẹ nọ ma gọ ẹgọ evaọ iwuhrẹ mai u re dhesẹ nọ ma wo adhẹẹ kẹ Jihova Ọghẹnẹ, ọnọ ọ rrọ “Obruoziẹ otọakpọ na soso,” gbe oria nọ ma be jọ gọe.​—Emuhọ 18:25.

Re ma ro dhesẹ oghẹrẹ izi nọ e be kpọ omai. Ebaibol na ọ tuduhọ Ileleikristi awọ inọ a “gọ ẹgọ . . . nọ ọ rrọ owowa je dhesẹ nọ a wo iroro nọ e gba.” (1 Timoti 2:9, 10) Re ma gọ ẹgọ “nọ ọ rrọ owowa” u dhesẹ nọ ma rẹ whaha iwu nọ i re ru amọfa tovao vi omai, enọ i re kpe oma ohwo fihọ hayo nọ e rẹ kpare ekpehre isiuru. Ofariẹ, ma te wo “iroro nọ e gba” u re fiobọhọ kẹ omai dẹ hayo salọ ewu owowoma nọ ọ rẹ tamu oma ha hayo kpẹre ga hrọ họ. Ehri-izi nana i dhesẹ nọ ohwo kpobi o wo udu nọ ọ sae rọ dẹ hayo salọ oghẹrẹ ewu nọ ọ were riẹ rekọ nọ ọ rrọ kpatiẹ. Ma gbẹ make ta ẹme no unu ze dede he, emamọ ẹgọ gbe osẹ mai o rẹ sae “whẹ erru họ uwuhrẹ Osiwi mai” jẹ “kẹ Ọghẹnẹ oruaro.” (Taitọs 2:10; 1 Pita 2:12) Ma tẹ be gọ ẹgọ kpatiẹ kpohọ iwuhrẹ mai, u re ru nọ amọfa a je wo adhẹẹ kẹ egagọ Jihova.

Whọ gbẹ maki wo iwu nọ e rrọ kpatiẹ obọnana ha, who ru re oyena o whaha owhẹ iwuhrẹ mai hi. U du gwọlọ nọ ma re wo iwu eghaghae hayo enọ i bi lo taure ma te ti kpohọ iwuhrẹ mai hi, oware nọ o gwọlọ kpobi họ, ewu na ọ rẹ fo jẹ jọ kpatiẹ.

• Ẹvẹ emamọ ẹgọ nọ ma rẹ gọ nọ ma tẹ be nyae gọ Ọghẹnẹ u wuzou te?

• Ehri-izi Ebaibol vẹ e rẹ kpọ omai nọ ma tẹ be salọ ẹgọ gbe osẹ mai?

Otẹrọnọ omọvo Isẹri Jihova jọ o bi wuhrẹ Ebaibol na kugbe owhẹ, ẹsejọhọ whọ be hai se oria kpobi nọ wha ti wuhrẹ na kpahotọ. Ere ọvona re, re whọ sai wo erere vọvọ no iwuhrẹ ukoko mai ze, o gwọlọ nọ whọ rẹ ruẹrẹ oma kpahe. Ma rẹ sai wo irere nana tobọ nọ ma te wo emamọ omaa nọ ma rẹ nya lele.

Ruẹrẹ oke gbe oria fihọ. Oke vẹ eware nọ who bi se e rẹ mae rọ daji owhẹ uzou? Kọ irioke, taure who te ti mu iruo okpẹdẹ na họ, manikọ owọwọ nọ emọ ra e tẹ wezẹ no? O tẹ make rọnọ whọ rẹ sai se obe etoke thethei hi, daoma fi oke jọ họ nọ who re ro se obe, jẹ ruẹ nọ oware ovo o rehọ oke nana mi owhẹ hẹ. Gwọlọ oria nọ edo ọ rrọ họ, jẹ whaha eware kpobi nọ e rẹ sai si iroro ra no uwuhrẹ na, koyehọ who re furie iredio, etẹlẹvisiọno, gbe ifonu ra. Whọ tẹ rọ olẹ muhọ, u re fiobọhọ kẹ owhẹ kpairoro vrẹ awaọruọ okpẹdoke na re whọ sae tẹrovi Ẹme Ọghẹnẹ.​—Ahwo Filipai 4:6, 7.

Si usi họ otọ iyo na, jẹ ruẹrẹ oma họ nọ whọ te kpahe ẹme evaọ obọ ewuhrẹ. Daoma kake riẹ oware nọ uzoẹme na o be ta kpahe. Romatotọ roro kpahe uzoẹme uwuhrẹ hayo uzou na, roro kpahe epanọ izoeme-esese na e rọ jẹhọ uzoẹme na, gbe epanọ iwoho avọ enọ ọkiẹkpemu na i ro ru igogo eme na vẹ. Kẹsena who ve se edhe-ẹme ọvuọvo jẹ gwọlọ uyo onọ nọ a nọ fihọ iẹe via. Se eria ikere nọ a fodẹ na, je roro kpahe epanọ i ro kiekpahe oware nọ who bi wuhrẹ na. (Iruẹru Ikọ 17:11) Nọ whọ tẹ ruẹ uyo na no, si usi họ otọ riẹ, re o sai fiobọhọ kẹ owhẹ kareghẹhọ iẹe evaọ obọ ewuhrẹ. Kẹsena, nọ a tẹ nọ onọ na evaọ obọ ewuhrẹ, o tẹ were owhẹ, whọ sae kpare obọ re whọ rọ eme obọra kẹ uyo okpẹkpẹe.

Whọ tẹ be ruẹrẹ eme sa-sa nọ a ti ru koka koka evaọ iwuhrẹ họ, whọ te hai fi eriariẹ ekpokpọ ba “oria nọ [whọ] rẹ jọ sẹro ekwakwa-aghae” ra orọ eriariẹ Ebaibol.​—Matiu 13:51, 52.

• Oghẹrẹ omaa vẹ o gwọlọ nọ who re wo re whọ sae ruẹrẹ oma kpahe kẹ iwuhrẹ?

• Ẹvẹ whọ sae rọ ruẹrẹ oma kpahe re whọ ruẹse kuyo evaọ obọ ewuhrẹ?

No oke anwae ze, Jihova ọ gwọlọ nọ ahwo uviuwou kpobi a keria re a wuhrẹ kpahe ọyomariẹ, re a sae rọ ere wo usu okpekpe kugbei je kugbe ohwohwo evaọ uviuwou na. (Iziewariẹ 6:6, 7) Oyejabọ nọ Isẹri Jihova a ro fi oke jọ họ koka koka nọ uviuwou u re ro kuomagbe gọ Ọghẹnẹ, yọ a rẹ rehọ etoke nana ta kpahe eme Ebaibol nọ i kiekpahe uyero rai evaọ oghẹrẹ nọ o rẹ were ohwo kpobi oma. O tẹ make rọnọ whẹ ọvo whọ be rria uwou, whọ sae raha oke nana kugbe Ọghẹnẹ ẹkwoma oware jọ nọ whọ rẹ jọ Ebaibol na salọ nọ who re wuhrẹ kpahe.

Nọ oke nọ ohwo o re ro si kẹle Jihova. “Wha si kẹle Ọghẹnẹ, o re ti si kẹle owhai.” (Jemis 4:8) Ma rẹ riẹ Jihova ziezi nọ ma te bi wuhrẹ kpahe iruemu gbe iruẹru riẹ evaọ Ebaibol na. Edhere ọlọlọhọ jọ nọ whọ sai ro mu egagọ uviuwou ra họ họ, wha rẹ rehọ omoke jọ se Ebaibol na dovia kugbe, wha sai lele omaa isase Ebaibol nọ a ruẹrẹhọ evaọ Ewuhrẹ Uzuazọ gbe Usi Uwoma Ota na. A rẹ sae ghale oria nọ a bi ti se na re ohwo kpobi evaọ uviuwou na o wobọ evaọ isase na, kẹsena nọ a te sei no, ohwo kpobi ọ vẹ ta oware jọ nọ o wuhrẹ no oria na ze.

Nọ oke nọ ohwo o re ro si kẹle ahwo uviuwou riẹ. Nọ uviuwou u te bi wuhrẹ Ebaibol na kugbe, u re si ọzae avọ aye kẹle ohwohwo, je si esẹgbini avọ emọ rai kẹle ohwohwo. U fo nọ o rẹ jọ etoke evawere, nọ ohwo kpobi evaọ uviuwou na o re rẹro riẹ koka koka. Esẹgbini a rẹ sae salọ izoẹme nọ i re duobọte ẹgwọlọ uviuwou na, wọhọ enọ e rẹ romavia evaọ Uwou-Eroro Na gbe Awake! hayo oria evuẹ Itanẹte jw.org mai, yọ a re wo unuikpe nọ emọ rai e rrọ fihọ iroro nọ a te bi ru onana. Wha rẹ sae ta kpahe ẹbẹbẹ jọ nọ emọ rai a nyaku evaọ obọ isukulu, gbe oware nọ a re ru re a sai fi ei kparobọ. Wha sai je rri ividio jọ evaọ JW Broadcasting^® (tv.jw.org) jẹ ta ẹme kpahe iẹe kugbe. Hayo wha rẹ sai wuhrẹ ile nọ a te jọ obọ ewuhrẹ so kugbe, jẹ re omoware jọ kugbe nọ egagọ uviuwou na u te kuhọ no.

Obọdẹ oke utiona nọ a rẹ raha kugbe rọ gọ Jihova koka koka, u re ru Ẹme Ọghẹnẹ were ahwo kpobi nọ a rrọ uviuwou na, yọ ọ te ghale omodawọ ra ziezi.​—Olezi 1:1-3.

• Fikieme ma ro fi oke jọ họ kẹ egagọ uviuwou?

• Ẹvẹ esẹgbini a sae rọ ruẹ nọ onana o rrọ etoke evawere kẹ ohwo kpobi evaọ uviuwou na?

Fikieme eva e be rọ were ahwo nana kpobi tenẹ? A rrọ okokohọ mai jọ. Wọhọ epaọ idibo Ọghẹnẹ evaọ oke anwae, enọ ọ ta kẹ nọ a hai kokohọ isiasa ẹgbukpe, ma be hae rẹro oke nọ ma re ro kuomagbe evaọ ikokohọ mai. (Iziewariẹ 16:16) Kukpe kukpe, ma wo ikokohọ esa: ikokohọ ikogho ivẹ nọ a rẹ rọ ẹdẹ ọvuọvo ru, gbe okokohọ ubrotọ nọ a re ru edẹ esa. Didi irere i bi te omai evaọ ikokohọ nana?

I bi fiobọhọ kẹ omai bọ okugbe nọ ọ rrọ udevie mai ga. Wọhọ epanọ ahwo Izrẹl a jẹ hae rọ evawere jiri Jihova “evaọ udevie ikokohọ” na, ere ọvona ma be hae rọ evawere kuomagbe jiri Jihova evaọ ikokohọ mai. (Olezi 26:12, ẹme-obotọ; 111:1) Ikokohọ nana i bi ru ei lọhọ kẹ omai re ma kuomagbe Isẹri Jihova efa nọ i no ikoko efa hayo erẹwho efa ze. Evaọ oke uvo, ma rẹ jọ oria okokohọ na re emu kugbe, yọ onana u re fiba evawere nọ o rẹ jọ ikokohọ enana. (Iruẹru Ikọ 2:42) Ma rẹ jọ ikokohọ nana rọ ẹro ruẹ uyoyou nọ u bi ku “inievo na kpobi” nọ e rrọ akpọ na soso kugbe.​—1 Pita 2:17.

I bi fiobọhọ kẹ omai ru usu mai kugbe Ọghẹnẹ ga. Ahwo Izrẹl a wo erere ọfa no ikokohọ rai ze keme i ru nọ a sai ro “wo otoriẹ eme” Ikereakere na nọ a je ru vẹ kẹ ae. (Nehemaya 8:8, 12) Ere ọvona ma bi wo erere no ithubro Ebaibol nọ a be hae kẹ omai evaọ ikokohọ mai ze. Ebaibol na a be hae rehọ uzoẹme okokohọ kpobi no ze. Ẹkwoma evuẹ ewewere, eme-ọzọhọkugbe, gbe idhesẹvia eware nọ e via vrẹ no nọ a be hai ru, ma be hai wuhrẹ epanọ ma re ro ru oreva Ọghẹnẹ evaọ uzuazọ mai. Nọ ma te yo iku ahwo nọ a bi thihakọ ebẹbẹ nọ i bi te ai fikinọ a rrọ Ileleikristi evaọ oke obẹbẹ nana, o be hae bọ omai ga. A rẹ jọ ikokohọ ilogbo mai dhesẹ edrama nọ i re ru ikuigbe Ebaibol vẹ omai ẹro ziezi, yọ u wo eware buobu nọ ma bi wuhrẹ no ai ze. Evaọ okokohọ kpobi, a rẹ họ ahwo nọ a gwọlọ dhesẹ via nọ a roma mudhe kẹ Ọghẹnẹ no ame.

• Fikieme ikokohọ mai e rọ rrọ etoke evawere?

• Irere vẹ e rẹ sai te omai nọ ma te kpohọ okokohọ?

Taure Jesu o te ti whu, ọ ta nọ: “A te ta usi uwoma Uvie na evaọ akpọ na soso re o jọ isẹri kẹ erẹwho na kpobi, kẹsena urere na o vẹ te ze.” (Matiu 24:14) Rekọ ẹvẹ a sae rọ ta usi uwoma na evaọ akpọ na soso? Onana o rẹ sae lọhọ nọ ma te bi ru lele oriruo nọ Jesu o fihotọ evaọ okenọ ọ jọ otọakpọ.​—Luk 8:1.

Ma be daoma nyabru ahwo evaọ obọ iwou rai. Jesu o wuhrẹ ilele riẹ re a ta usi uwoma na no uwou ruọ uwou. (Matiu 10:11-13; Iruẹru Ikọ 5:42; 20:20) A ghale ugogo ekwotọ sa-sa kẹ Ileleikristi ikpe-udhusoi ọsosuọ nọ a jẹ jọ ta usi uwoma. (Matiu 10:5, 6; 2 Ahwo Kọrint 10:13) Epọvo na re nẹnẹ, a ruẹrẹ iruo usi uwoma ota mai na họ kpatiẹ, yọ ukoko kpobi u wo ẹkwotọ nọ a ghale kẹ ae nọ a rẹ jọ ta usi uwoma. Onana u bi fiobọhọ kẹ omai ru ujaje Jesu gba inọ ma “vuẹ ahwo je se isẹri ziezi.”​—Iruẹru Ikọ 10:42.

Ma be daoma ta usi uwoma na evaọ oria kpobi nọ a sai jo duku ahwo. Jesu o te je fi oriruo hotọ ẹkwoma usi uwoma na nọ ọ jẹ ta evaọ ẹgbede, eria wọhọ, akotọ abade hayo oza nọ ahwo a jẹ hae jọ vo ame. (Mak 4:1; Jọn 4:5-15) Epọvo na re, oria kpobi nọ ma jọ ruẹ ahwo ma rẹ jọ lele ai ta ẹme kpahe Ebaibol na​—evaọ iyẹrẹ, oria ekiọthuọ, igege eriosehọ avọ erozaha, hayo evaọ ifonu. Yọ uvẹ u te rovie kẹ omai, ma rẹ ta usi uwoma kẹ ahwo nọ ma gbẹ be rria kẹle oma, ahwo nọ ma gbe bi ru iruo, ibe emọ-eklase mai, gbe imoni mai. Omodawọ nana kpobi u ru nọ ima ahwo buobu wariẹ akpọ na họ a bi ro yo “emamọ usi esiwo” na.​—Olezi 96:2.

Kọ whọ sai roro te ohwo jọ nọ whọ sae ta usi uwoma kẹ kpahe Uvie Ọghẹnẹ gbe irere nọ usi uwoma na o te wha se ahwo evaọ obaro? Ajọ who di ovuẹ ẹruore nana họ eva ha. Rehọ uvẹ kpobi nọ who wo ro whowho iei.

• “Usi uwoma” vẹ o gba họ nọ ma re whowho?

• Oghẹrẹ vẹ Isẹri Jihova a be rọ rọ aro kele epanọ Jesu ọ jẹ rọ ta usi uwoma?

Ẹsibuobu, a rẹ rọ ẹme na “ọkobaro” dhesẹ ohwo nọ o re kpohọ ẹkwotọ ọkpokpọ, o ve rovie edhere fihọ kẹ amọfa. Jesu ọ jọ wọhọ ọkobaro, keme a vi rie ziọ otọakpọ re o ru iruo odibọgba nọ o rẹ kẹ uzuazọ, je rovie edhere esiwo fihọ kẹ ahwo-akpọ. (Matiu 20:28) Nẹnẹ, ilele Jesu a be rọ aro kele oriruo riẹ ẹkwoma oke buobu nọ a be raha ro “ru ahwo zihe ruọ ilele.” (Matiu 28:19, 20) Ejọ rai e ruọ iruo nọ ma be hai se iruo ọkobaro na no.

Ọkobaro yọ ohwo nọ ọ rẹ ta usi uwoma oke-kpobi. Isẹri Jihova kpobi yọ iwhowho-uvie nọ e be ta usi uwoma. Rekọ ejọ evaọ usu rai a ma omaa inọ a be jọ ekobaro oke-kpobi, yọ enana e be rehọ euwa udhosa-gbikpe (70) rọ ta usi uwoma kamara kamara. Re a sai ru onana gba, ekobaro buobu a be rọ ubroke ru iruo nọ a sae rọ kuoma rai. Ukoko Isẹri Jihova u re vi efa jọ nọ a se ekobaro obọdẹ kpohọ eria nọ ẹgwọlọ kẹ iwhowho-uvie ọ jọ mae rro, yọ enana e rẹ rọ euwa udhozeza-gbikpe (130) hayo bu viere rọ ta usi uwoma kamara kamara. Umutho oware nọ ekobaro na a wo o be dae ẹro, yọ u mu rai ẹro inọ Jihova ọ te rẹrote ai. (Matiu 6:31-33; 1 Timoti 6:6-8) Enọ uyero rai o kuvẹ re a ru ọkobaro oke-kpobi hi a rẹ sai ru ọkobaro obufihọ, yọ enana e rẹ rehọ euwa ọgba (30) hayo udhuvẹ-gbikpe (50) evaọ amara rọ ta usi uwoma.

Uyoyou nọ ọkobaro o wo kẹ Ọghẹnẹ gbe amọfa o rẹ wọe nyae ta usi uwoma. Jesu ọ ruẹ ahwo nọ ohọo ẹme Ọghẹnẹ u je kpe, yọ ere ọvona ma be ruẹ ahwo buobu nọ ohọo ẹme Ọghẹnẹ u bi kpe nẹnẹ. (Mak 6:34) Rekọ ma wo eriariẹ nọ ma sai ro fiobọhọ kẹ ae evaọ obọnana, onọ o rẹ lẹliẹ ai wo ẹruore emamọ uzuazọ evaọ obaro. Uyoyou nọ ọkobaro o wo kẹ amọfa o rẹ wọe rehọ oke gbe ẹgba riẹ ro wuhrẹ ae Ẹme Ọghẹnẹ. (Matiu 22:39; 1 Ahwo Tẹsalonika 2:8) Onana o rẹ bọ ẹrọwọ ọkobaro na ga, ru ei kẹle Ọghẹnẹ, jẹ wha evawere ulogbo sei.​—Iruẹru Ikọ 20:35.

• Ono a re se ọkobaro?

• Eme ọ be wọ ahwo jọ ru iruo ọkobaro oke-kpobi?

U kri no nọ ewuhrẹ ọ rọ rrọ abọ ologbo egagọ Isẹri Jihova. A ruẹrẹ isukulu obọdẹ họ kẹ ahwo nọ a be rehọ oke rai kpobi ta usi uwoma Uvie na re a sai ‘ru iruo odibọgba rai gba ziezi.’​—2 Timoti 4:5.

Isukulu Ekobaro. Nọ ohwo ọ tẹ rrọ ọkobaro oke-kpobi te ẹgbukpe no, a re zizie iei kpohọ isukulu edẹ ezeza, yọ o sae jọnọ Ọgwa Uvie nọ ọ rrọ ekẹloma a te jọ ru ei. Ẹjiroro isukulu na họ re i fiobọhọ kẹ ọkobaro na si kẹle Jihova vi epaọ anwẹdẹ, wo onaa usi uwoma ota ziezi, re ọ jẹ ruabọhọ iruo na ziezi.

Isukulu Rọkẹ Etausiuwoma Uvie Na. A ruẹrẹ isukulu emerae ivẹ nana họ re a jariẹ wuhrẹ ekobaro nọ i wo onaa ziezi nọ u no eva ze nọ a re no oria rai kpohọ oria kpobi nọ ẹgwọlọ ọ mae rrọ. O wọhọ ẹsenọ a be ta nọ, “Mẹ na! Vi omẹ!” be rọ aro kele Ọtausiuwoma nọ ọ mae rro evaọ otọakpọ na, Jesu Kristi. (Aizaya 6:8; Jọn 7:29) Re ohwo ọ kwa kpohọ ẹkwotọ nọ o thabọ no uwou riẹ, ẹsejọ o rẹ gwọlọ nọ o wuhrẹ epanọ o re ro ru uzuazọ riẹ lọhọ. Uruemu ẹwho, ẹroro hayo edhedhẹ, gbe emu obonọ ọ kwa nya na e sai wo ohẹriẹ no obonọ o noze. O sae tubẹ gwọlọ nọ o re wuhrẹ ẹvẹrẹ ọfa dede. Inievo-emezae gbe inievo-emetẹ nọ e rrọ umuo ikpe 23 rite ikpe 65 nọ e re te rọo ho gbe enọ e rọo no a re kpohọ isukulu nana, yọ isukulu na i re fiobọhọ kẹ ai wo emamọ iruemu nọ o gwọlọ nọ a re wo evaọ iruo na gbe onaa sa-sa nọ u re ru ei lọhọ re Jihova avọ ukoko riẹ a sae rehọ ai ru iruo vọvọ.

Isukulu Giliad. Evaọ ẹvẹrẹ Hibru, otofa “Giliad” họ “Ẹre-Itho Isẹri.” Anwọ 1943 nọ a rọ to isukulu na họ na, inievo nọ i nwrotọ no isukulu na no i bu vrẹ idu eree (8,000) no, yọ a vi rai kpohọ iruo imishọnare re a se isẹri evaọ “oka avọ oka otọakpọ na,” onọ emamọ iyẹrẹ buobu i bi no ze. (Iruẹru Ikọ 13:47) Oke ọsosuọ nọ imishọnare a te orẹwho Peru, ukoko ovuovo o jariẹ hẹ. Rekọ ikoko nọ e rrọ orẹwho yena enẹna i bu vrẹ odu ọvo (1,000). Oke ọsosuọ nọ imishọnare mai a te Japan, Isẹri Jihova nọ e jọ orẹwho na a te imakpe he. Rekọ Isẹri Jihova nọ e riẹ enẹna a bu vrẹ idu egba ivẹ (200,000). A re wuhrẹ Ebaibol na totọ ziezi evaọ etoke isukulu Giliad nọ a rẹ rọ emerae isoi ru na. A re zizie inievo nọ e rrọ ekobaro obọdẹ hayo imishọnare usi uwoma ota, inievo nọ e rrọ uwou ogha, gbe esẹro okogho kpohọ isukulu na, yọ a rẹ romatotọ wuhrẹ ai ziezi re a fiobọhọ ru iruo Uvie na nọ ma be jọ akpọ-soso ru na nyaharo je dikihẹ ziezi.

• Eme họ ẹjiroro Isukulu Ekobaro na?

• Amono a re kpohọ Isukulu Rọkẹ Etausiuwoma Uvie Na?