Enọ I bi Se Ebe Mai A Nọ Inọ

Fikieme Isẹri Jihova A Gbe Ro Kpohọ Ẹmo-ofio ho?

Notọ avọ otọ ze, a riẹ Isẹri Jihova evaọ oria kpobi nọ a rrọ wọhọ ahwo nọ a re wobọ evaọ ẹmo-ofio orẹwho wọso orẹwho hayo udevie orẹwho ovona ha. Evaọ ikpe udhuvẹ-gbikpe nọ i kpemu, obe na Australian Encyclopædia o ta nọ: “Isẹri Jihova a rẹ whoma họ abọ ọvuọvo vievie he nọ ẹmo ọ tẹ rrọ otọ.”

Ugogo oware nọ Isẹri Jihova a gbe ro wobọ evaọ ẹmo-ofio ha họ, fikinọ o rọwokugbe obruoziẹ-iroro rai nọ a rọ Ebaibol wuhrẹ no ho. A rehọ ijaje Jesu Kristi gbe oriruo riẹ wuhrẹ obruoziẹ-iroro rai no. Jesu ọ ta kẹ ilele riẹ nọ a you ọrivẹ rai. Ọ tẹ jẹ kẹ ujaje nọ: “Wha you ewegrẹ rai, ru uwoma kẹ enọ i mukpahe owhai.” (Luk 6:27; Matiu 22:39) Nọ omọvo ilele Jesu jọ ọ tọlọ ọlọkọ re ọ ruẹse thọe, Jesu ọ tẹ ta kẹe nọ: “Zihe ọlọkọ ra fihọ ẹta riẹ; keme e nọ e tọlọ ọlọkọ kpobi a re ti whuwhu ọlọkọ.” (Matiu 26:52) Fikiere, Jesu ọ rehọ ẹme gbe oriruo dhesẹ vevẹ nọ ilele riẹ a rẹ tọlọ ekwakwa ẹmo ho.

Oware ofa nọ Isẹri Jihova a gbe ro fi ẹmo ha họ, ibe Ileleikristi rai a rrọ eria sa-sa wariẹ akpọ na kpobi họ. Ẹmo-ofio ọ rẹ lẹliẹ inievo họre inievo, yọ ere oruo o wọso ujaje Jesu nọ o ta nọ jọ ‘ohwo o you ohwo.’—Jọn 13:35.

Ehri-izi uyoyou Ọghẹnẹ nọ ma fodẹ na orọnikọ ẹme-unu o rrọ kẹ Isẹri Jihova ha. Wọhọ oriruo, muẹrohọ oware nọ a ru evaọ etoke Ẹmo Akpọ II, 1939-1945. Evaọ obọ America, a mu Isẹri Jihova nọ i bu vi idu-ene gbe egba-esa (4,300) fihọ iwou-odi egọmeti fikinọ a se inọ a re wobọ evaọ ẹmo-ofio na ha. Evaọ Britain, a mu Isẹri Jihova nọ i bu vi odu-ọvo gbe egba-isoi (1,500), avọ eyae nọ i bu vi egba-esa (300) soso, fihọ iwou-odi fikinọ a rọwo nọ a re wobọ evaọ iruẹru ẹmo ho. Evaọ Nazi Germany, egọmeti o kpe Isẹri Jihova nọ i bu vi egba-ivẹ gbe ikpe-ihrẹ (270) fikinọ a rọwo nọ a re kpohọ ẹmo ho. Evaọ otọ esuo Nazi, Isẹri Jihova nọ i bu vi idu ikpe (10,000) a mu fihọ iwou-odi hayo ega uye. Uye o bẹ Isẹri Jihova nọ e jọ obọ Japan gaga re. Ohwo kpobi nọ a kpe ohwo riẹ jọ evaọ Ẹmo Akpọ II na—hayo evaọ ẹmo ọfa kpobi—ọ rẹ sai wo imuẹro inọ omọvo Isẹri Jihova ọvuọvo o wobọ evaọ ikpakpe yena ha.

Omọvo Isẹri Jihova jọ nọ a re se Wolfgang Kusserow nọ ọ rrọ ohwo Germany o dhesẹ eriwo Isẹri Jihova vevẹ evaọ eme urere nọ ọ ta taure a te ti kpei. Evaọ 1942, ahwo Nazi a bru uzou ọmọzae ikpe udhe (20) nana fikinọ ọ se inọ o re kpohọ ẹmo-ofio ho. (Aizaya 2:4) Evaọ okenọ isoja a jẹ rehọ iẹe gu-ẹdhọ ọ ta nọ: “A yọrọ omẹ whẹro wọhọ omọvo Isẹri Jihova, jẹ rehọ ẹme Ọghẹnẹ nọ ọ rrọ Ikereakere Efuafo na wuhrẹ omẹ. Uzi riẹ nọ o mae rro jẹ mae rrọ ọrẹri nọ o jie kẹ ahwo-akpọ họ: ‘Who re you Ọghẹnẹ ra vi oware ofa kpobi je you ọrivẹ ra wọhọ epanọ who you omara.’ Uzi ofa o ta nọ: ‘Who kpe ohwo ho.’ Kọ ire eye Ọghẹnẹ nọ ọ ma omai na o kere izi nana kpobi fihotọ kẹ?”—Mak 12:29-31; Ọnyano 20:13.

Isẹri Jihova a rọwo nọ Jihova, Ọghẹnẹ Erumeru na ọvo ọ te rọ udhedhẹ ebẹdẹ bẹdẹ ziọ otọakpọ na. A rẹroso Ọghẹnẹ nọ o ti ru eyaa riẹ gba inọ o ti “ru akpọ na kpobi nọ ẹmo o je serihọ ri te oka akpọ.”—Olezi 46:9.