Fikieme Isẹri Jihova A Gbe ro Kpohọ Ẹmo Ho?
Isẹri Jihova a re kpohọ ẹmo ho fiki eware nọ ma be ta fodẹ na:
Ẹmeoyo kẹ Ọghẹnẹ. Ebaibol na ọ ta nọ idibo Ọghẹnẹ a “ti duwu egbọdọ rai zihe ruọ etọẹkpẹ,” yọ a gbe ti “wuhrẹ kpahọ ẹmo-ofio ofa ha.”—Aizaya 2:4.
Ẹmeoyo kẹ Jesu. Jesu ọ ta kẹ Pita ukọ na inọ: “Zihe ọgbọdọ ra fihọ oria riẹ, keme enọ e tọlọ ọgbọdọ kpobi a ti whu uwhu ọgbọdọ.” (Matiu 26:52) Jesu ọ rọ ẹme nana dhesẹ nọ ilele riẹ a re fi ẹmo ho.
Ilele Jesu a re ru lele uzi riẹ nọ o ta nọ, “a wo obọ kugbe akpọ na ha,” ẹkwoma oma nọ a re dhehọ esuo-ohrowo ho. (Jọn 17:16) Ma re kuomagbe ahwo nọ a bi veghe uzou kẹ isoja ha, yọ ma rẹ whaha ahwo nọ a salọ nọ a bi kpohọ iruo isoja ha.
Uyoyou kẹ amọfa. Jesu ọ juzi kẹ ilele riẹ nọ a re “you ohwohwo.” (Jọn 13:34, 35) Nọ a te you ohwohwo, a ve ti wo okugbe evaọ udevie rai, yọ ohwo ọvuọvo ọ te wọ ẹmo bru ọdekọ họ.—1 Jọn 3:10-12.
Oriruo Ileleikristi ikpe-udhusoi ọsosuọ. Obe na Encyclopedia of Religion and War o ta nọ: “Ileleikristi ikpe-udhusoi ọsosuọ a dhomahọ ẹmo-ofio hayo iruo isoja ha,” keme a riẹ nọ onana “o wọso uzi Jesu nọ o ta nọ a you erivẹ gbe ewegrẹ rai.” Ere ọvona owuhrẹ egagọ obọ Germany jọ nọ a re se Peter Meinhold ọ ta kpahe Ileleikristi ikpe-udhusoi ọsosuọ na inọ: “Ohwo ọ rẹ sae jọ Oleleikristi jẹ jọ osoja vievie he.”
Oghẹrẹ nọ ma re ro fiobọhọ kẹ orẹwho nọ ma rrọ
Mai Isẹri Jihova ma rẹ romakpotọ kẹ egọmeti orẹwho nọ ma rrọ, yọ ma rẹ gwọlọ ẹme vievie he. Ma re veghe uzou kẹ izi egọmeti orẹwho nọ ma rrọ họ, keme Ebaibol na o juzi nọ:
“Jọ ohwo kpobi ọ romakpotọ kẹ enọ i wo udu-esuo okpehru.”—Ahwo Rom 13:1.
“Hwa eware Siza zihe kẹ Siza, rekọ eware Ọghẹnẹ kẹ Ọghẹnẹ.”—Matiu 22:21.
Fikiere ma re koko uzi, hwa osa-uzou mai, je ru lele ọruẹrẹfihotọ egọmeti nọ a bi ro fiobọhọ kẹ ahwo.