Kọ Whọ Kareghẹhọ?

Kọ whọ reawere ese Uwou-Eroro nọ i kpozi kẹle na? Dai rri sọ whọ sae kẹ iyo enọ nọ e rrọ obotọ na:

• Ẹvẹ ma rẹ sae rọ jẹ ‘emamọ ẹrọunu’ na ziezi, koyehọ uzẹme kpahe Ọghẹnẹ gbe ẹjiroro riẹ? (Zef. 3:9)

Wọhọ epanọ evẹrẹ kpobi e rrọ, re ma sae jẹ ‘emamọ ẹrọunu’ na ziezi u fo nọ ma rẹ gaviezọ ziezi, raro kele enọ e be jẹ ẹvẹrẹ na ziezi, fi edẹ ebe Ebaibol gbe eria Ebaibol jọ họ uzou, dhe eware nọ ma wuhrẹ no ẹwẹwariẹ, se do via, kiẹ ona-ẹme uzẹme na riwi, daoma wo ẹnyaharo, fi uzedhe oke họ nọ who re ro wuhrẹ, ma vẹ jẹ hae ta emamọ ẹrọunu na oke kpobi.—8/15, ẹwẹ-obe avọ 21-25.

• Ẹvẹ oriruo “ufi nọ a thahe akuasa” u ro kie kpahe orọo?

“Ufi nọ a thahe akuasa” yọ ẹme ozee. (Ọtausi. 4:12) A tẹ rehọ oriruo nana ta ẹme kpahe orọo, egẹ ivẹ ọsosuọ na i dikihẹ kẹ ọzae avọ aye na, enọ a thahe wariẹ ugogo ogẹ na, Ọghẹnẹ. Nọ ọzae avọ aye a te ku Ọghẹnẹ gbe usu rai, o rẹ kẹ ae ẹgba nọ a re ro thihakọ ebẹbẹ jẹ lẹliẹ aimava na wo evawere.—9/15, ẹwẹ-obe avọ 16.

• Eme họ “abọrọ kpahe uzou” nọ a ta ẹme te evaọ Ahwo Hibru 6:2 na?

Orọnikọ u dhesẹ ekpako ukoko nọ a re ro mu hu, rekọ o wọhọ nnọ u dhesẹ obọ nọ a rẹ rọ kpahe ahwo uzou re a ruẹsi wo okẹ ẹzi na. (Iruẹru 8:14-17; 19:6)—9/15, ẹwẹ-obe avọ 32.

• Ẹvẹ ekpako ukoko a sae rọ rehọ ọghọ kẹ amọfa?

Edhere jọ nọ ọkpako ukoko ọ sai ro ru ere họ ọ rẹ ta kẹ ae he inọ a ru oware nọ ọ rẹ gwọlọ ru hu. Edhere ọfa nọ ọ rẹ sai ro ru ere họ ọ rẹ fodẹ ẹjiroro nọ ọ be rọ ta kẹ ae inọ a ru oware jọ.—10/15, ẹwẹ-obe avọ 22.

• Eme ọkpako ukoko ọ rẹ sai wuhrẹ no oghẹrẹ nọ othuru-igodẹ evaọ oke emọ Izrẹl ọ jẹ hae rọ rehọ ọkpọ su igodẹ riẹ ze?

Ithuru-igodẹ evaọ oke Izrẹl a jẹ hae rehọ ọkpọ su igodẹ rai. Nọ igodẹ na e be ziọ uwou rai hayo no uwou rai ruọ otafe, e rẹ nya otọ ọkpọ na vrẹ, ere othuru-igodẹ na ọ sai ro kele igodẹ riẹ ọvuọvo. (Izerẹ 27:32) Ere ọvona u fo inọ ọkpako ukoko o re fi ẹro họ igodẹ Ọghẹnẹ ọvuọvo nọ ọ rrọ otọ ẹruọsa riẹ.—11/15, ẹwẹ-obe avọ 9.