ENỌ NỌ EBAIBOL Ọ KẸ IYO RAI

Kọ elẹ kpobi Ọghẹnẹ o re yo?

Ọghẹnẹ ọ rẹ gaviezọ kẹ elẹ ahwo erẹwho kpobi. (Olezi 145:18, 19) Ebaibol na ọ tuduhọ omai awọ nọ ma lẹ se Ọghẹnẹ kẹ oware kpobi nọ o be kẹ omai uye. (Ahwo Filipai 4:6, 7) Rekọ elẹ jọ e rẹ dha Ọghẹnẹ eva. Wọhọ oriruo, elẹ nọ a re dhe ẹwẹwariẹ e rẹ were iẹe he.—Se Matiu 6:7.

Ofariẹ, Jihova o re yo elẹ ahwo nọ a bi keke aro fihọ thọ izi riẹ hẹ. (Itẹ 28:9) Wọhọ oriruo, fikinọ emọ Izrẹl a reabe azẹ, Ọghẹnẹ ọ rọwo yo elẹ rai hi. Onana u dhesẹ nọ, re Ọghẹnẹ ọ sai yo elẹ mai, u wo eware jọ nọ o gwọlọ nọ ma re ru.—Se Aizaya 1:15.

Eme ma re ru re Ọghẹnẹ ọ sai yo elẹ mai?

Ma gbe fi ẹrọwọ họ Ọghẹnẹ hẹ, o re yo elẹ mai hi. (Jemis 1:5, 6) Ma rẹ rọwo nọ Ọghẹnẹ ọ rrọ, gbe nọ ọ be daezọ mai. Ebaibol na nọ ma re wuhrẹ o rẹ bọ ẹrọwọ mai ga, keme u re mu ohwo nọ o fi ẹrọwọ họ Ọghẹnẹ ẹro inọ eware nọ a ya eyaa rai fihọ Ebaibol na e te seba erugba ha.—Se Ahwo Hibru 11:1, 6.

O gwọlọ nọ ma rẹ rọ eva kpobi lẹ sei avọ omaurokpotọ. Makọ Jesu dede ọ lẹ se Ọghẹnẹ avọ omaurokpotọ. (Luk 22:41, 42) Fikiere, o gwọlọ nọ ma re se Ebaibol na re ma riẹ oware nọ Ọghẹnẹ ọ gwọlọ, viukpenọ ma rẹ ta họ iẹe obọ. Ere oruo ma sae rọ lẹ rọwokugbe oreva riẹ.—Se 1 Jọn 5:14.