Oware nọ Ọghẹnẹ O Ru re Ma Sai Wo Esiwo

Ọghẹnẹ ọ ya eyaa kẹ Abraham nọ, “ubi” nọ a ruẹaro riẹ na u ti no uyẹ riẹ ze. Yọ ẹkwoma ubi yena, “erẹwho akpọ na kpobi” a ti ro wo eghale. (Emuhọ 22:18) Uwhremu na, ọmọ-oruọmọ Abraham nọ a re se Jekọp ọ tẹ kwa kpohọ Ijipti, oria nọ uviuwou riẹ o jọ rro zihe ruọ orẹwho ulogbo Izrẹl.

Evaọ obọ Ijipti, Fẹro ovie ọgeva na o te zihe emọ Izrẹl ruọ erigbo bẹsenọ Ọghẹnẹ o ro vi ọruẹaro riẹ Mosis nyai siwi ae no igbo, nọ a rọ rehọ edhere igbunu fa Abade Ọwawae na vrẹ. Nọ oyena o vrẹ no, Ọghẹnẹ ọ tẹ te kẹ emọ Izrẹl izi nọ e rẹ kpọ ae nọ u kugbe Izi Ikpe na. Izi yena e ta kpahe oghẹrẹ idhe nọ a re dhe kẹ ẹrọvrẹ izieraha. Ọghẹnẹ ọ rọ ẹkwoma Mosis ta nọ o ti vi ọruẹaro ọfa ze. Ọruẹaro yena ọ te jọ “ubi” nọ a ya eyaa riẹ na.

Bu vi ikpe egba ene (400) nọ i lelei riẹ, Ọghẹnẹ ọ tẹ ya eyaa kẹ Devidi ovie na inọ, “ubi” nọ a ruẹaro riẹ evaọ obọ ọgbọ Idẹn na, o ti su bẹdẹ bẹdẹ. Ubi nana họ Mesaya na, ọnọ Ọghẹnẹ o ti ro siwi ahwo-akpọ je ru otọakpọ na zihe ruọ aparadase.

Ọghẹnẹ ọ rọ ẹkwoma Devidi gbe eruẹaro efa ta kpahe oghẹrẹ ohwo nọ Mesaya na ọ te jọ. A ruẹaro nọ Mesaya na ọ te jọ wowou avọ omaurokpotọ, yọ ohọo, okienyẹ gbe ẹmo e te jọ otọ isuẹsu riẹ hẹ. Udhedhẹ o te jọ udevie ahwo kpobi gbe erao. Ẹyao, uye-oruẹ gbe uwhu o gbẹ te jọ họ wọhọ epanọ o jọ ẹjiroro Ọghẹnẹ vẹre, yọ a te kpare ahwo nọ a whu no ziọ uzuazọ.

Maeka ọ ruẹaro nọ a ti yẹ Mesaya na evaọ Bẹtlẹhẹm, yọ Daniẹl ọ ruẹaro nọ a ti kpei. Rekọ Ọghẹnẹ ọ te kpare iẹe no uwhu ze jẹ rehọ iẹe mu Ovie evaọ obọ odhiwu. Daniẹl ọ tẹ jẹ ruẹaro nọ Uvie Mesaya na o te raha isuẹsu ahwo-akpọ na kpobi no jẹ rehọ ẹta rai. Kọ Mesaya na ọ ginẹ nyaze wọhọ epanọ a ruẹaro riẹ na?

​—Whọ rẹ ruẹ iku nana se evaọ obe Emuhọ uzou avọ 22-50, gbe obe Ọnyano, Iziewariẹ, 2 Samuẹle, Ilezi, Aizaya, Daniẹl, Maeka, Zekaraya 9:9.