Enọ Nọ Ebaibol Ọ Kẹ Iyo Rai
Fikieme u ro fo nọ ma lẹ re Uvie Ọghẹnẹ o ze?
Kọ whọ gwọlọ gbẹ riẹ kpahe Uvie Ọghẹnẹ gbe eware nọ u ti ru?
Uvie Ọghẹnẹ yọ egọmeti obọ odhiwu. Jesu ọ ta kẹ ilele riẹ nọ a lẹ re Uvie na o ze, keme o te wha ẹrẹreokie gbe udhedhẹ ze akpọ na. Egọmeti ahwo-akpọ ọvuọvo ọ sai si ozighi, okienyẹ, hayo ẹyao n’otọ họ, rekọ Uvie Ọghẹnẹ o sai ru ei yọ u ti gine ru ere. Ọghẹnẹ ọ salọ Jesu no re ọ jọ Ovie Uvie na. Jihova ọ tẹ jẹ salọ Ileleikristi jọ nọ i ti lele Jesu su evaọ Uvie na.—Se Luk 11:2; 22:28-30.
Kẹle na, Uvie Ọghẹnẹ o te raha ahwo kpobi nọ a be wọso iẹe no. Fikiere olẹ na re Uvie Ọghẹnẹ o ze, u dhesẹ nọ jọ egọmeti Ọghẹnẹ o ze te rehọ ẹta egọmeti ahwo-akpọ kpobi.—Se Daniẹl 7:13, 14; Eviavia 11:15, 18.
Oghẹrẹ vẹ Uvie Ọghẹnẹ o te rọ wha erere se ahwo?
Jesu họ ohwo nọ o te nọ o re su Uvie na keme ọ rrọ wowou. O te je wo ogaga nọ ọ sai ro fiobọhọ kẹ enọ i bi bo se Ọghẹnẹ rọkẹ obufihọ keme ọyomariẹ yọ Ọmọ Ọghẹnẹ.—Se Olezi 72:8, 12-14.
Uvie Ọghẹnẹ o te wha erere se ahwo nọ a bi ru oreva Ọghẹnẹ jẹ be rọ emamọ eva lẹ nọ jọ o ze. Eware nọ whọ te jọ Ebaibol na wuhrẹ kpahe Uvie Ọghẹnẹ e te were owhẹ gaga.—Se Luk 18:16, 17; Jọn 4:23.