Oghẹrẹ nọ Ahwo Buobu A Rri Olẹ
“Nọ mẹ tẹ be lẹ, o rẹ wọhọ ẹsenọ Ọghẹnẹ ọ rrọ akotọ mẹ, je bi kru omẹ obọ nya nọ mẹ gbẹ riẹ onọ me re ru hu.”—MARÍA.
“Nọ aye mẹ ọ mọ ẹyao ọta te ikpe ikpegbesa no, o te whu uwhremu na. Mẹ kareghẹhọ nọ evaọ oke yena mẹ jẹ hae lẹ se Ọghẹnẹ kẹdẹ kẹdẹ re o fiobọhọ kẹ omẹ, yọ mẹ riẹ nọ ọ jẹ ginẹ gaviezọ kẹ elẹ mẹ. Yọ onana u je ru udu te omẹ otọ.”—RAÚL.
“Olẹ yọ obọdẹ okẹ nọ Ọghẹnẹ ọ kẹ omai ahwo-akpọ.”—ARNE.
María, Raúl, Arne gbe amọfa buobu a rri olẹ wọhọ obọdẹ okẹ nọ a rẹ ruẹ obọ riẹ hẹ. A rri rie wọhọ edhere nọ a sae rọ ta ẹme kẹ Ọghẹnẹ, yere iei, jẹ vuẹe nọ o fiobọhọ kẹ ae. U mu rai ẹro nọ, oware nana nọ Ebaibol ọ ta kpahe olẹ na ginọ uzẹme, inọ: “Ma wo imuẹro nana kpahe Ọghẹnẹ inọ, oware kpobi nọ ma yare riẹ nọ o rọwokugbe oreva riẹ, ọ rẹ gaviezọ kẹ omai.”—1 Jọn 5:14.
Rekọ ahwo buobu a rọwo oware nọ oria Ebaibol yena o ta kpahe olẹ na ha. Steve ọ ta kpahe oghẹrẹ nọ ọyomariẹ o rri olẹ. Ọ ta nọ: “Okenọ mẹ jọ ikpe ikpegbihrẹ, egbẹnyusu esa mẹ i te whu, asidẹnte o kpe ọjọ, ivẹ nọ i kiọkọ e tẹ da ame whu evaọ obọ abade.” Kọ eme Steve o ru? Ọ ta nọ: “Mẹ jẹ lẹ se Ọghẹnẹ re mẹ riẹ oware nọ o wha riẹ ze nọ oghẹrẹ eware itieye e rọ via kẹ omẹ, rekọ ọ kuyo olẹ mẹ hẹ. Fikiere mẹ tẹ tubẹ ta nọ mẹ rẹ seba ẹlẹ.” Fikinọ ahwo jọ a roro nọ Ọghẹnẹ ọ kuyo elẹ nọ a lẹ evaọ oke jọ họ, u te ru nọ a be rọ ta nọ olẹ u wiruo ho.
Oware ofa jọ o riẹ nọ o rẹ lẹliẹ ahwo roro nọ olẹ u wiruo ho. A rẹ ta nọ, nọ orọnọ Ọghẹnẹ ọ riẹ eware kpobi na, ọ riẹ eware nọ ma gwọlọ gbe ebẹbẹ nọ i bi te omai, fikiere u du gwọlọ nọ ma rẹ jẹ vuẹe tao ho re ọ tẹ te riẹ.
Amọfa jọ a re roro nọ fiki eware iyoma nọ a ru evaọ oke nọ u kpemu, oyejabọ nọ Ọghẹnẹ o gbe bi ro yo olẹ rai hi na. Jenny ọ ta nọ: “Oware jọ nọ o rẹ kẹ omẹ uye họ, me re rri omamẹ nọ me fioka ha fiki eware jọ nọ me ru evaọ oke nọ u kpemu. Fikiere me re rri omamẹ nọ me te ohwo nọ Ọghẹnẹ o re yo olẹ riẹ hẹ.”
Kọ owhẹ omara, ẹvẹ who rri olẹ? Kọ oghẹrẹ nọ ahwo yena a rri olẹ na, ere who bi rri rie re? O tẹ rrọ ere, oware nọ Ebaibol na ọ ta kpahe olẹ o rẹ sae lẹliẹ eva were owhẹ. Yọ ma sai fievahọ oware nọ Ebaibol na ọ ta kpahe olẹ,a keme o rẹ sai fiobọhọ kẹ omai riẹ iyo enọ wọhọ:
Kọ Ọghẹnẹ o re gine yo olẹ mai?
Fikieme Ọghẹnẹ ọ gbẹ rọ kuyo elẹ jọ họ?
Oghẹrẹ vẹ ma rẹ rọ lẹ re Ọghẹnẹ ọ ruẹsi yo olẹ mai?
Ẹvẹ olẹ o sai ro fiobọhọ kẹ owhẹ?
a Ma rẹ jọ Ebaibol na ruẹ elẹ nọ idibo Ọghẹnẹ buobu a lẹ evaọ oke anwae, te enọ Jesu omariẹ ọ lẹ re. Ma te rri Ikereakere Hibru na, nọ a re je se Ọvọ Anwae na, ma rẹ ruẹ elẹ nọ i bu vrẹ udhuhrẹ-gbikpe.