Fikieme Ọghẹnẹ Ọ Gbẹ rọ Kuyo Elẹ Kpobi Hi?

Jihova Ọsẹ mai nọ ọ rrọ obọ odhiwu na o re yo elẹ mai nọ ma tẹ lẹ no udu ze. Rekọ u wo eware jọ nọ i re ru nọ ọ gbẹ rọ kuyo elẹ mai hi. Eware vẹ eye? Kọ eme u fo nọ ma rẹ kareghẹhọ nọ ma tẹ be lẹ? Joma ta kpahe eware jọ nọ Ebaibol ọ vuẹ omai.

Ahwo jọ nọ a be lẹ evaọ ichọche nọ a bi se olẹ rai no obe ze.

“Nọ whọ tẹ be lẹ, who dhe eme evona ẹwẹwariẹ hẹ.”—Matiu 6:7.

Jihova ọ gwọlọ nọ ma rẹ lẹ elẹ mai no udu ze, orọnikọ elẹ nọ a se fihọ uzou no hayo enọ a kere fihọ obe eye ma re dhe ẹwẹwariẹ hẹ. Wọhọ oriruo, dae rehọ iẹe nọ who wo ogbẹnyusu jọ, rekọ ẹsikpobi nọ wha tẹ ruẹ ẹro, nọ wha tẹ be ta ẹme, eme evona ọ rẹ wariẹ kẹdẹ kẹdẹ nọ ọ rrọ akpọ na. Kọ oware utioye o rẹ were owhẹ? Nọ egbẹnyusu ivẹ a tẹ be ta ẹme, orọnikọ eme nọ a kere fihotọ a re rri ro lele ohwohwo ta ẹme he, rekọ a rẹ ta ẹme no udu ze. Ma tẹ be rọ eme obọmai rọ lẹ se Jihova, u re dhesẹ nọ ma rehọ e riẹ wọhọ ogbẹnyusu mai.

Ọzae jọ nọ o bi fi elọtri nọ o bi rri obehru re Ọghẹnẹ o fiobọhọ kẹe.

“Nọ wha tẹ make yare dede, wha bi wo ho keme fiki ẹjiroro ọthọthọ wha be rọ yare.”—Jemis 4:3.

Ma re rẹro nọ Ọghẹnẹ ọ te kuyo elẹ mai hi nọ ma tẹ be lẹe nọ o fiobọhọ kẹ omai ru eware nọ ma riẹ nọ e rẹ dhae eva. Wọhọ oriruo, ohwo nọ o re fi edhọ ọ tẹ be lẹ se Ọghẹnẹ re o fiobọhọ kẹe wou uzou re ọ hwẹ igho họ ẹkpa, kọ Ọghẹnẹ o re yo olẹ utioye na? Vievie! Keme ọ vẹvẹ omai unu nọ ahwo nọ a wo uvou-uthei gbe enọ i re rẹro nọ ọghẹnẹ emamuzo o ti fiobọhọ kẹ ae a rẹ dhae eva. (Aizaya 65:11; Luk 12:15) Fikiere, re Ọghẹnẹ ọ sai yo elẹ mai, o gwọlọ nọ oware nọ ma be yare nọ o ru kẹ omai na o rẹ rọwokugbe ẹme nọ Ebaibol ọ ta.

“Ọnọ ọ rẹ rọwo koko uzi na ha, makọ olẹ riẹ dede u re tuoma.”—Itẹ 28:9.

Iku buobu e rrọ Ebaibol na nọ i dhesẹ nọ ahwo nọ a je keke aro fihọ raha izi Ọghẹnẹ, o je yo elẹ rai hi. (Aizaya 1:15, 16) Yọ ere o bi ru nẹnẹ re. (Malakae 3:6) Ma tẹ gwọlọ nọ Ọghẹnẹ o yo elẹ mai, ma re koko izi riẹ. Kọ otẹrọnọ ma ru eware iyoma jọ evaọ oke nọ u kpemu, kọ oyena u dhesẹ nọ Ọghẹnẹ ọ te gbẹ gaviezọ kẹ elẹ mai hi? Ijo! Nọ ma te kurẹriẹ jẹ be dawo utho ẹgba mai kpobi re ma ru oreva Ọghẹnẹ, ọ rẹ rọvrẹ omai.—Iruẹru Ikọ 3:19.

“Ohwo kpobi nọ o bi bru Ọghẹnẹ ze ọ rẹ rọwo nọ ọ rrọ gbe nọ ọ rẹ hwosa kẹ enọ e be rọ ọwhọ gwọlọ iẹe.”—Ahwo Hibru 11:6.

Olẹ yọ edhere nọ ma re ro dhesẹ nọ ma fi ẹrọwọ họ Ọghẹnẹ jẹ be gọe orọnikọ oware nọ ma rẹ thakpi ru re udu u te omai otọ ọvo ho. Jemis olele na o kere nọ ohwo nọ ọ be “yare avọ ẹrọwọ” họ “o rẹro nọ o ti wo oware jọ mi Jihova ha.” (Jemis 1:6, 7) Re ma sai fi ẹrọwọ họ Ọghẹnẹ, o gwọlọ nọ ma rẹ riẹe ziezi. Yọ re ma sae riẹ Ọghẹnẹ ziezi, ma rẹ romatotọ wuhrẹ Ebaibol na. Ma te ru ere, ẹsiẹ ma te rọ riẹ oware nọ ọ gwọlọ. Nọ ma jẹ be lẹ sei, u ve mu omai ẹro nọ ọ be ginẹ gaviezọ kẹ omai.