Enọ Ahwo Nọ A S’ebe
Eme họ otọ ẹme Pọl ukọ na inọ: “Mẹ rọ ẹkwoma ekoko uzi whu no evaọ abọ uzi”?—Gal. 2:19.
Pọl o kere nọ: “Mẹ rọ ẹkwoma ekoko uzi whu no evaọ abọ uzi, re mẹ ruẹse jọ uzuazọ evaọ abọ Ọghẹnẹ.”—Gal. 2:19.
Galesha yọ ubrotọ jọ nọ ahwo Rom a je su. Yọ u wo oware jọ nọ Pọl o je kere se ikoko nọ e jọ obei nọ o wha riẹ ze nọ ọ rọ ta ẹme yena. Otu iwuhrẹ erue a je su Ileleikristi jọ thọ evaọ Galesha. A je wuhrẹ nọ ohwo o gbe koko Uzi nọ Ọghẹnẹ ọ rọ Mosis kẹ ahwo Izrẹl na ha ọ sai wo esiwo ho, maero kọ uzi oyawo na. Rekọ Pọl ọ riẹ nọ u gbe du gwọlọ nọ ohwo ọ rẹ yawo tao re Ọghẹnẹ ọ tẹ jẹe rehọ họ. Ọ ta eme buobu ro dhesẹ vevẹ nọ eware nọ ahwo na a je wuhrẹ na yọ erue. Ọ tẹ rọ ere ru nọ ẹrọwọ nọ Ileleikristi na a fihọ idhe ẹtanigbo Kristi ọ rọ ga ziezi.—Gal. 2:4; 5:2.
Ebaibol na ọ ta vevẹ nọ ohwo o te whu no, ọ rẹ gbẹ riẹ hẹ sọ oware jọ o be via hayo o be via ha. Oware kpobi nọ a ru kẹhẹ u re gbe tei hi. (Ọtausi. 9:5) Fikiere nọ Pọl ọ ta nọ: “Mẹ rọ ẹkwoma ekoko uzi whu no,” ẹme nọ ọ jẹ ta na họ, ọ gbẹ rrọ otọ Uzi nọ Ọghẹnẹ ọ rọ Mosis kẹ ahwo Izrẹl na ha. Uzi na u gbe tei hi. Ukpoye u mu Pọl ẹro inọ ọ rrọ “uzuazọ evaọ abọ Ọghẹnẹ” keme o fi ẹrọwọ họ ẹtanigbo Jesu.
“Ekoko uzi” na oye u fiobọhọ nọ Pọl ọ sai ro fi ẹrọwọ họ ẹtanigbo na. Fikieme ma rọ ta ere? Whaọ taure ọ tẹ te ta ẹme nọ ọ rrọ oria ikere yena, ọ ta nọ “ẹkwoma ẹrọwọ nọ ohwo o fihọ Jesu Kristi ọvo a re ro kuenu kẹe nọ o kiẹrẹe, orọnikọ fiki eruo eware nọ uzi o ta ha.” (Gal. 2:16) Uzi na u gine fiobọhọ ru oware jọ nọ u wuzou gaga. Pọl ọ ta oware na kẹ Ileleikristi obọ Galesha inọ: “A kẹ Uzi na re u ru iruthọ dhesẹ oma via, bẹsenọ ọmọ nọ a ya eyaa na kẹ ọ rẹ nyaze.” (Gal. 3:19) Uzi na u ru ahwo riẹ vevẹ nọ ohwo-akpọ nọ a yẹ avọ uzioraha ọ sai koko Uzi na gbagba ha. O gwọlọ ohwo ọgbagba jọ nọ o re dheidhe kẹ ahwo-akpọ ẹsiẹvo bẹdẹ bẹdẹ. Fikiere, Uzi na u su ahwo bru “ọmọ” na, koyehọ Jesu Kristi. Nọ ohwo o te fi ẹrọwọ họ Jesu, Ọghẹnẹ o re rri rie nọ o kiẹrẹe. (Gal. 3:24) Ọghẹnẹ o rri Pọl nọ o kiẹrẹe keme Uzi na u fiobọhọ kẹe fi ẹrọwọ họ Jesu. Ere Pọl o ro ‘whu evaọ abọ uzi’ je zihe ze “uzuazọ evaọ abọ Ọghẹnẹ.” Uzi na u gbe tei hayo wo ẹgba evaọ oma riẹ hẹ, ukpoye kọ Ọghẹnẹ họ ọnọ o wo ẹgba evaọ oma riẹ.
Pọl ọ ta oghẹrẹ ẹme ọvona evaọ ileta nọ o kere se Ileleikristi obọ Rom. Ọ ta nọ: “Inievo mẹ, epọvo na a ru owhai whu no ro si owhai no otọ Uzi na ẹkwoma ugboma Kristi . . . A si omai no otọ Uzi na no, keme ma whu kẹ onọ o jẹ rọ ifi gba omai na no.” (Rom 7:4, 6) Oria Ebaibol nana gbe obe Ahwo Galesha 2:19 i dhesẹ nọ orọnikọ Pọl ọ jẹ ta nọ ọyomariẹ yọ ọrahauzi nọ Uzi na u bruoziẹ uwhu kpe no ho. Ukpoye ọ jẹ ta nọ o no otọ Uzi na no, o wo ufuoma no. Uzi na u gbe tei hi, koyehọ u gbe wo ẹgba ọvo evaọ oma riẹ hẹ gbe amọfa nọ a fi ẹrọwọ họ Jesu. A wo ufuoma no keme a fi ẹrọwọ họ idhe ẹtanigbo Jesu.