Oware nọ Hulda Ọ jẹ Gwọlọ U Te Rie Obọ
U WO ẹmẹwho jọ nọ a re se Sangir Besar nọ ọ kẹle abade evaọ obọ Indonesia. Inievo-emetẹ esa jọ a be rria ẹwho na. Ahwo ẹwho na a riẹ nọ inievo na a rẹ ta usi uwoma gaga. Imikpe jọ nọ e vrẹ na, aimasa na a te je ru oware jọ evaọ akotọ abade, rekọ orọnọ usi uwoma a jẹ ta ha. Kọ eme a je ru?
Ẹmẹwho nọ a re se Sangir Besar evaọ ofẹ ẹkpẹlobọ ovatha-ọre Indonesia
A ruọ eva abade na, a tẹ wọ itho egbẹgbẹdẹ jọ noi ze fihọ okpa. Itho na jọ e rro te obọro. A tẹ rọ ogbokọ kpe itho na ehehẹhẹ. Ehẹhẹ na e kawo vi ike arifẹ. A tẹ kwa itho na fihọ ibokiti, a tẹ wọ ae gadiẹ kpobọ uwou rai nọ a be rria. A tẹ kwa itho na no ibokiti fihọ ekpa ilogbo re omoto ologbo ọ dhẹ ze te wọ ae kpohọ obonọ a rẹ jọ rehọ itho na ru edhere.
Hulda nọ ọ be kwa itho koko evaọ akotọ abade
Odẹ ọjọ evaọ usu aimasa na Hulda. O je wo uvẹ ru iruo na ziezi vi ahwo nọ i kiọkọ. Ọ jẹ hae rọ ugho kpobi nọ ọ jẹ jọ iruo na wo kuọ uviuwou riẹ. Rekọ nọ u te oria jọ, ọ tẹ gwọlọ nọ ọ rẹ dẹ ifonu hayo etablẹte nọ ọ rẹ danlodu JW Library® fihọ. Hulda ọ riẹ nọ o te wo ifonu na, ọ te hae rehọ ividio gbe eware efa nọ e rrọ JW Library® na ta usi uwoma kẹ ahwo ziezi, yọ u ti fiobọhọ kẹe wuhrẹ eware efa nọ o te bi ru uwuhrẹ omobọ riẹ.
Evaọ amara ọvo gbọ, Hulda ọ jẹ hae rọ euwa ivẹ ru iruo kohiohiẹ kohiohiẹ. Ọ jẹ hai kpe itho nọ e rẹ vọ ipikọpo ọsese. O te ti wo ugho nọ ọ rẹ rọ dẹ ifonu na.
Hulda nọ o kru etablẹte riẹ họ obọ
Hulda ọ ta nọ: “Uzẹme riẹ họ, oma o jẹ da omẹ, yọ evabọ mẹ e hiẹ no fiki itho nọ me je kpe na. Rekọ nọ mẹ dẹ ifonu na no, nọ mẹ jẹ be rehọ iẹe dhesẹ ividio kẹ ahwo nọ me te kpohọ usi uwoma jẹ rehọ iẹe ruẹrẹ oma kpahe kẹ ewuhrẹ, mẹ gbẹ kareghẹhọ uye nọ o bẹ omẹ hẹ.” Oniọvo na ọ ta nọ ifonu na o fiobọhọ kẹe nọ ẹyao COVID-19 na o muhọ obọ. Keme oke yena ifonu ọvo ma je ro ru ewuhrẹ jẹ ta usi uwoma. Eva e were omai nọ oware nọ Sista Hulda ọ jẹ gwọlọ, u te rie obọ.